LUKA 16

1Yesu ashuba agambira abegesibwabe ati, «Hakaba haliho omugaiga aina omugelezi. Baija bamugambira okwo omugeleezi ogu alikumwitaitira ebye. 2Amweta amubaza ati, ‹Biki ebi ebyo ndikukuhulizaho? Oyetonde obugeleezi, aha rw'okuba aha nabukwaka.› 3Omugeleezi atekeleza ati, ‹Nkoreki, orwo mukama wange yanyaka obugeleezi? Agalima tingagira, kandi okushabiiliza nikunkwasa enshoni. 4Mbwenu naramura ekyo ndakora, abantu baije banyegeze omu maka gabo orwo ndaba nabingirwe omu bugelezi.› 5Abo mukamawe yabaire natonga abeta omoi omoi omoi. Abaza owa mbere ati, ‹Iwe, mukama wange nakutonga bitai?› 6Ndi ogu ati, ‹Amapipa kikumi g'amajuta.› Omugeleezi amugambira ati, ‹Kwata ebarua yawe y'eibanja; yanguha oshuntame ohandike makumi gatanu.› 7Ashuba abaza ondijo ati, ‹Iwe notongwa bitai?› Ogu ati, ‹Amagunia kikumi g'engano.› Omugeleezi amugambira ati, ‹Kwata ebarua yawe y'eibanja; handika kinana.› 8Ekyarugir'omwo mukamawe akamusiima n'orwo yabaire atali mwesigwa, yamusiimira obugeleezibwe; aha rw'enshonga abantu b'ensi egi baina obugezi omu byabo kushaaga omuzarwa gw'abantu abalikubona. 9Nimbagambira, mwehigire emikago nimukoza eitunga libi, kaliliba lyahoireho ahanyuma mwije mutahe omu burora obutahwaho. 10«Omwesigwa omu kike bwoli aba mwesigwa n'omu bingi. Atali mwesigwa omu kike bwoli, n'omu bingi ti mwesigwa. 11Kamuraba mutali besigwa omw'itunga libi, alibakwasa eitunga kamaanya aliruga nkahai? 12Kamutabaire besigwa omu by'abandi, alibakwasa ebilibye nyabwe n'ohai? 13Taliho mwiru yakukolera bakama babili. Aranoba omoi, agonze asigaire; anga aragilira ogu ekihika, ayasigara amugaye. Timwakukolera Ruhanga na itunga.» 14Abafarisayo abo empiha zabatwaraga omwoyo. Kabahuliire ekigambo ekyo bamushekelera. 15Kyonkai Yesu abagambira ati, «N'inywe mweyolekya okuba barungi omu maisho g'abantu, kyonkai Ruhanga namanya emitima yanyu. Manya ebyo abantu basiima, biba bizira ahali Ruhanga. 16«Amateka n'eby'abarangi basigire bagambire nibigoba ahali Yohana. Kwema ahali Yohana evangeli y'obukama bwa Ruhanga nerangwa, mara buli omoi natahamu rwamani. 17Nikyoroba eiguru n'ensi kuhwaho, kushaaga akantu kati aha Mateka kuburwa enshonga. 18«Buli omoi atambya mukaziwe akashwera ondijo aba nasiyana. Kandi n'ashwera omukazi atambiibwe iba nawe aba nasiyana. 19«Hakaba haliho omugaiga omoi, yajwaraga emyendo ya zambarau n'eya kitaani nungi. Wenene buli kiro bwabaga bugenyi. 20Aha kihigikye habyamwagaho omwanje, eibaralye Lazaro, akaba aina ebironda omubili gwona. 21Yagonzaga kulya ebyarugaga aha meza y'omugaiga bikaragara, lero kandi n'embwa zija nizimurambaramba ebironda ebyo. 22Kayafire, abamalaika baija bamutwara, bamuteka omu kifuba kya Aburahamu. Omugaiga nawe kwakwo afa, bamuziika, 23kyonkai agwa omu muliro ogutalihwaho. Kayabaire nabonabonera omwo, kugya kwimukya amaisho alengera Aburahamu ali harai, atoire Lazaro. 24Ayeta n'eiraka lihango ati, ‹Tata Aburahamu, banganyire, bagambire Lazaro agye ateke akara nshonga omu maizi ampolereze orulimi. Omu muliro omu ndimu ninyanja.› 25Ndi Aburahamu amushubamu ati, ‹Mwana wange, ijuka okwo omu burora bwawe okabona ebirungi. Kandi Lazaro ogwo akabona enaku. Mbwenu wenene kunu ali omu milembe, kandi iwe noshasha muno munonga. 26Kushaaga aho, omugati yaitu na iwe bakatamu ekinyanga kihango. Abakugondize kuruga kunu kwija okwo tibakushobora, kandi n'ow'okushabuka arugire okwo kwija kunu taliho.› 27Omugaiga agamba ati, ‹Mbwenu tata ninkutagiliza omutume omwaitu, 28nyinamu barumuna bange batanu, agende abatatire, batalija bakaija kunu omu naku ezibi.› 29Aburahamu amugambira ati, ‹Baina Musa n'abarangi; babahuliire.› 30Omugaiga ati, ‹Chei, tata Aburahamu; k'omuntu yakuruga omu bafu barayechuza.› 31Aburahamu amuhorora ati, ‹Kabatalikuhulira Musa na barangi, n'orwo omuntu yakuhimbuka omu bafu tiyakugamba bakaihyamu.› »

will be added

X\