LUKA 14

1Limoi eli Sabato, Yesu agya omw'omutwazi omoi Omufarisayo kuraagira, abantu bamutaho amaisho. 2Mwonene omwo hakaba halimu omushaija azimbiire emikono n'amaguru amuli omu maisho. 3Yesu abaza abeegesa b'Amateka n'Abafarisayo ati, «Nikijuburwa kukiza omuntu ahali Sabato anga chei?» 4Bonene besiza. Aho Yesu akwata aha murwaire amukiza, ashuba amutaishura agenda. 5Yesu ashuba ababaza ati, «N'ohai omuli inywe ayakuba aina omwana, anga ente, akagwa omw'iziba atanguhire akamunyururamu aha kiro kya Sabato?» 6N'ekyo tibashoboire kukihorora. 7Aho ababaire banyegeziibwe, Yesu abachwera enfumo, orwo yaboine baihyaho emyanya y'ekitinwa, abagambira ati, 8«K'omuntu alikuraliza aha bugenyi bw'obushwere, otanshutama mu mwanya gwa kitinwa, ataija akashangwa araliize n'omuntu alikukushaagya ekitinwa. 9Ogwo abaraliize inywembili ataija akakugambira ati, ‹Higiza ogu,› aho kandi okakwatwa enshoni ogiire omu mwanya ogutali gwa kitinwa. 10K'oraralizibwaga ogende oshuntame omu mwanya ogw'ahansi muno, kikuraliza k'araija akugambiire ati, ‹Munywanyi wange, garuka oku aharungi kushaaga.› Aho ab'orashangwa nolya nabo bakukunire. 11Manyasi kaishe muntu weena ayekuza balimutohya, kandi ayetohya balimukuza.» 12Amara agambira n'ayabaire amuraliize ati, «K'oraralizaga abantu aha kyakulya kya bwaigoro anga aha bugenyi, oleke kuraliza banywanyi bawe anga barumuna bawe anga abanyaruganda, anga bataahi bawe abagaiga, bataija nabo bakakuraliza, gakaba marongorane. 13Iwe k'orakoraga obugenyi, oralize abanaku, abalikuchumbagira, abalema n'empume. 14Aho olisiimwa, ebyo wabakolera bonene tibaina kubikukolera. Orwo abatakatifu balihimbuka nirwo olirongorwa.» 15Ababaire nibaraagira na Yesu kabamuhuliire nagamba atyo, abagambira ati, «Muberwa alilya ekyakulya omu bukama bwa Ruhanga!» 16Ashuba abagambira ati, «Ekiro kimoi omuntu akakora obugenyi buhango, yaraaliza abantu bangi. 17K'obugenyi bwagobire yatuma omwiruwe kugambira abaralizibwa ati, ‹Mwije, buli kantu kabaireho.› 18Bona babanza kugira ebyekwaso nk'abaragaine. Owa mbere agambira omwiru ogwo ati, ‹Nguzire endimiro, nimbanza kugya kugileba. Ninkutagiliza onganyire.› 19Ondijo amugambira ati, ‹Nguzire ente 10 z'okulimisa, ningenda kugya kuzilenga. Ninkutagiliza onganyire.› 20Ondijo amugambira ati, ‹Tindikwija aha rw'okuba nyina omugore.› 21Kityo omwiru aija amanyisa mukamawe amakuru ago. Aho nyin'enju anigara, agambira omwiruwe ati, ‹Yanguha ogye omu kigo omu mbarabara n'omu buhanda bulikuguturana, olete abanaku n'abalikuchumbagira, n'empume n'abalema.› 22Omwiru agambira mukamawe ati, ‹Waitu, eby'olikundagira byakozirwe, kyonkai omwanya tigukaijwire.› 23Mukamawe amugambira ati, ‹Iroko omu mbarabara ezihango n'omu buhanda obw'emparo ogambire abantu baije rwamani, enju yange eijure. 24Kambagambire, omu bantu balinya abaraliziibwe taliho n'omoi aliroza aha bugenyi bwange.› » 25Abantu bangi muno bakashangwa nibahondera Yesu. Aho ahinduka abagambira ati, 26«K'omuntu aramponderaga atanobire ishe anga nyina anga mukaziwe anga abaana anga barumuna anga banyanya, nangu n'oburorabwe, ogwo tiyakuba mwegesibwa wange. 27Atalikwetweka musarabagwe taina kuba mwegesibwa wange. 28N'ohai omuli inywe alikugonza kwombeka omunara, atabandize kushuntama akabara ebilikwetagwa aha lyombeka elyo, akamanya nk'ebyainabyo biramara? 29Kitali kityo, k'alikuba yayombekire omusingi kandi akalemwa kumara, bona abalikubona okwo elyombeka lyamulema babanza kumushekelera 30bati, ‹Omuntu ogu akabanza elyombeka lyamulema kulimara.› 31Anga ni mukamaki alikugya kurashana na mukama ondijo, atabandize kushuntama akehanuza nk'arashobora kurashana n'owa 20,000 okwo wenene aina 10,000 zonkai? 32Kitali kityo, k'asiga omukama ondijo akyali harai muno, amutumaho entumwa kumushaba kabagira emilembe. 33Aha rw'ekyo omuntu atalikwesigisa by'ainabyo taina kuba mwegesibwa wange. 34«Omwonyu guba gurungi. Kyonkai kagwakumara kurunguka, wakugurungisaki? 35Tigukigasha mw'itaka anga mu rubungo rwa busha. Ekiliho abantu baguchunkya aheru. Aina amatwi g'okuhulira ahulire.»

will be added

X\