LUKA 1

1Omukunirwa muno Teofilo, abantu bangi bataireho amani kuhandika amakuru g'ebyabaireho omuli ichwe. 2Tukashuba twabibarulirwa balinya ababiboine bubona kwema aha mbandizo bakashuba bakaranga amakuru garungi. 3Nanye kwakwo kamazire kwekomya kurungi ebigambo ebi kuruga enyuma, nshemeleirwe nabona mbikuhandikire bunyanungi, 4obone kumanya amazima agaijwire ahali buli kamoi kona ak'oraba oragambiirwe. 5Omu makiro g'Omukama Herode owa Buyahudi, hakaba haliho omukuhani nayetwa Zekaria, ow'eihiga lya Abiya omukuhani. Akaba aina omukazi namwihya omw'ihiga lya Aroni omukuhani, eibaralye Elizabeti. 6Bombili bakaba bali bagorogoki ahali Ruhanga, nibekomya emihango yona n'emigenzo y'Omukama bataina kamogo. 7Kyonkai bakaba bataina mwana, mara bakaba bakuzire muno. 8Zekaria kayabaire ali Rwensinga aha mwoga gw'obukuhani eli zamu y'eihigalye ely'abakuhani, 9kuhondera entwaza z'obukuhani, ekuura emugwera kutaaha Rwensinga y'Omukama kwotera obunuma. 10Omu saa egyo y'okwotera obunuma, embaga yona ekaba eli aheru neshoma enshara. 11Omumalaika w'Omukama amuhabukira, ayemeleire orubaju rwa bulyo rwa alutare y'okwotezaho obunuma. 12Zekaria kayamuboine yayechura, yatina. 13Kyonkai omumalaika amugambira ati, «Zekaria otatiina, aha rw'okuba enshara yawe ehuliirwe, n'omukazi wawe Elizabeti arakuzalira omwana w'omwojo, eibara oramweta Yohana. 14Aliba muntu w'ebyera n'amashemelerwa, n'abantu bangi barashemelerwa okuzarwakwe. 15Aliba muntu muhango w'Omukama, talinywa divai anga marwa, araijurwaga Mwoyo Mutakatifu, nangu kwema omunda ya nyina. 16Abangi omuli Isiraeli alibagarura aha Mukama Ruhanga wabo. 17Aragendaga ayebembeire Omukama, aina obumanzi n'amani nka Eliya, ahindure emitima ya baishebantu egye aha baana babo, n'abashengi abagarure omu mitekelereze ey'abagorogoki einamu obumanyi, atekatekere Omukama embagaye.» 18Zekaria abaza omumalaika ati, «Ekyo ndakimanyirahai? Inye nabaire mugurusi, na mukazi wange yakaikwire.» 19Omumalaika amuhorora ati, «Inye ndi Gaburieli, nyikara nyemeleire omu mabona ga Ruhanga. Natumwa kukugambira, kukuletera amakuru garungi. 20Leba noija kwesiza, tolikwija kugamba kulemwa kugoba mbali ebigambo ebi biliberaho. Aha rw'enshonga ebyo nakugambira tiwabiikiliza, Kyonkai akanya kabyo kakaligoba bilibaho.» 21Abantu bakaba balindiliire Zekaria, batangara kubona okwo yakelererwa Rwensinga. 22Kayaturukire tiyashoboire kubafumolera. Aho bamanyirayo okwo yabonekerwa omuli Rwensinga. Akabalengera kushai yaikara atitaire. 23K'ezamuye yahoire yashuba owe. 24Ebiro by'ezamu kabyahoire Elizabeti atwara enda, amara emyezi etanu yona ayeshelekire, nagira ati, 25«Omukama ansingiire yanyijuka, yanyihyaho enshoni omu bantu.» 26Guli mwezi gwa mukaga Elizabeti atwete enda, Ruhanga atuma Omumalaika Gaburieli omu kigo kya Galilaya, nikyetwa Nazareti, 27aha mubikira ayabaire nashelerwa omushaija eibaralye Yozefu, ow'oruganda rwa Daudi. Eibara ly'omubikira ogwo akaba ali Maria. 28Omumalaika amugoba amugambira ati, «Kamelere, iwe kilimugisha, Omukama aina iwe!» 29Kyonkai ekigambo ekyo kiita kubi Maria, ayebaza okwo ekiramyo ekyo kilikugenda. 30Omumalaika amugambira ati, «Maria oleke kutina. Oganzire ahali Ruhanga. 31Leba noija kutwara enda, ozare omwana w'omwojo, eibara olimweta Yesu. 32Aliba muhango, balimweta Mwana wa Rukirabyona; Omukama alimuha enketo ya Daudi ishe, 33alitwara eka ya Yakobo eirai lyona, n'obukamabwe tibulihwaho.» 34Maria agambira Omumalaika ati, «Kirabaho kitai orwo inye ntagira mushaija?» 35Omumalaika amugambira ati, «Mwoyo Mutakatifu arakwizira, amani ga Rushoborabyona gakugye aha mutwe, kityo n'omwana w'olizara alyetwa mutakatifu, Mwana wa Ruhanga. 36Leba na Elizabeti omunyabuzare wawe, ayayetwaga mugumba atwete enda y'omwana w'omwojo omu bukaikurubwe; kaanya aka aina enda y'emyezi mukaga. 37Ahakuba taliho kilikwija kulema Ruhanga.» 38Maria agamba ati, «Leba inye ndi muzana w'Omukama, mbe nk'okwo wagamba.» Aho omumalaika amurugaho agenda. 39Omu biro ebyo Maria aimukya, agenda bwangu omw'ibanga, omu nsi ya Yuda. 40Orwo yatahire omwa Zekaria, akeisa Elizabeti. 41Elizabeti kayahuliire ekishuuro kya Maria, enda omu rubunda eguragurukibwa amashemelerwa, na Elizabeti wenene aijurwa Mwoyo Mutakatifu, 42atangara, agamba n'eiraka lihango ati, «Omu bakazi bona oli kilimugisha, n'omwana w'olikwija kuzara ni kilimugisha! 43Na kyonene eki kyandugirahai inye nyina mukama wange kunzindukira? 44Kuba orwo nahulira nti ekishuuro kyawe, enda yanguraguruka omw'ibunda n'amashemelerwa. 45Mara oli muberwa orwo oikilize okwo eby'Omukama akugambiire bilikwija kugobeelera.» 46Maria nawe agamba ati, «Omwoyo gwange niguhaisiliza Omukama, 47n'omutima gwange nigushandukira Ruhanga Omurokozi wange, 48ahakuba yabona obujege bw'omuzanawe. Leba emizarwa yona elinyeta kilimugisha. 49Orwo ow'amani yankolera ebihango, eibaralye litakatifu. 50Aganyira abamutina, kwema muzarwa ogu kugoba muzarwa ogu. 51Yaimukya omukonogwe ogw'amani, yanaganaga ab'eikuru omu mitima yabo. 52Abakama yabaihya aha nketo zabo, yakuza abajege. 53Abajara yabagabira, yabaigusa ebirungi; abatungi yababinga ngaro zishai. 54Yajuna Isiraeli omwiruwe, orwo yaijuka obuganyizibwe, 55nk'okwo yagambiire batat'enkurw'uichwe, Aburahamu na baijukurube eirai lyona.» 56Maria akamara na Elizabeti emyezi nk'eshatu yagaruka omuka. 57Elizabeti agoba aha kaanya k'okuzara, azara omwana w'omwojo. 58Batanibe n'abanyabuzare bahulira okwo Omukama amugilire obuganyizi bungi, bamukwasa ebyera ebyo. 59Aha kiro kya munaana baija kutahiri omwana, bagonza kumweta Zekaria eibara lya ishe. 60Nawe nyina agamba ati, «Tibilikwija kugenda bityo. Ayetwe Yohana.» 61Bamugambira bati, «Omu banyabuzare bawe talimu muntu alikwetwa ibara eli.» 62Balengera ishe, nibamubaza okwo alikwenda omwana kwetwa. 63Abenza ekibaho ky'okuhandikaho, ahandikaho ati, «Eibaralye ni Yohana.» Batangara bona. 64Niho honkai akanwa kakinguka, orulimi rukomorogoka, agamba asingiza Ruhanga. 65Batani babo bona bakwatwa obutini. Ebigambo ebi bigambwa byona omu mabanga ga Buyahudi. 66Bona ababihuliire babibiika aha mutima nibebaza bati, «Omwana ogu aliba atai?» Kuba amani ga Ruhanga gakaba gamulimu. 67Zekaria ishe Yohana Omubatiza, aijurwa Mwoyo Mutakatifu, abaasha ati, 68«Asingizibwe Omukama Ruhanga wa Isiraeli, aha rw'okuba ahabukiire abantube yabachungura. 69Atuhaire Omurokozi w'amani omu ruganda rw'omwiruwe Daudi, 70nk'okwo yagambiire omu kanwa k'abarangibe abatakatifu ab'eirai, 71okwo tulirokoka aha babisha baitu, twihuke omu mani g'abatunoba bona; 72akagamba kugilira batat'enkurw'uichwe obuganyizi, n'okwo aliijuka endaganoye entakatifu, 73nikyo kinahiro ekyo yanahiliire isheichwe Aburahamu, 74kutushoboza kumukolera tutalikutina, k'aliba yamazire kutukiza aha babisha baitu, 75tuli batakatifu mara abagorogoki ahali wenene ebiro byaitu byona. 76Kandi iwe mwana, balikweta murangi wa Rukirabyona; manya olyebembera Omukama kumushemeleza emihandaye, 77kumanyisa abantube okwo balikwija kuchunguka orwo baligarulirwa amafu gabo, 78aha rw'obuganyizi bungi obwa Ruhanga waitu, kiro eky'alisinga akeema omw'iguru akatukeisheza obwire, 79akashamulira abashuntamire omu mwilima, n'omu kinyumanyumi kya rufu, kuturabya omu muhanda gw'emilembe.» 80Omwana Yohana akura mara aba manzi omu mwoyo. Yaturaga omw'irungu kuhika kiro ekyo yayeyarwire omuli Isiraeli.

will be added

X\