YUDA 1

1Inye Yuda, omwiru wa Yesu Kirisito, kandi murumuna Yakobo, n'inye ndikuhandikira inywe abayesirwe Ruhanga, abagonzibwa omuli Ruhanga Isheichwe mara nimulindwa Yesu Kirisito. 2Obuganyizi, emilembe n'engonzi byeyongere omuli inywe. 3Abagonzibwa, orwo mbaire nindibaliibwa muno kubahandikira aha kurokoka kwaitu okwa ichwena hamoi, mboine nikigasha kubahandikira nimbatagiliza kurabira okwikiliza okw'abakirisito bakwasiibwe limoi bikahwa. 4Haliho abantu bamoi abatushensheiremu batamanyikire, abarangiirwe karai okwo baligwerwa omushango ogu, abantu abatamanya Ruhanga, abanga ekisha kya Ruhanga bakahwera omu busiyani mara baketonga Omukama waitu omumoi wenkai mara Rugaba rwaitu Yesu Kirisito. 5Mbwenu n'orwo muraba mwamanyire kimoi buli kantu, ningonza kubaijukya okwo Omukama ayarokoire eihanga lya Isiraeli akalihya omu nsi ya Misri, ahanyuma ababaire batalikwikiliza akabasilikya. 6N'abamalaika abayekulize bakashaga obugarukiro bw'obushobora bwabo bakaruga omu mwanya gwabo ogwo baturagamu, akabakoma empingo ez'eirai lyona omu mwilima elindindi kuhika aha iramu ely'amaheleeruka. 7Sodoma na Gomora n'ebigo ebindi ebyabaire bibyataine nabo bakakora muno obusiyani n'eby'enshoni ebitali bya buhangwa, bahaabwa ekibonabonyio ky'omuliro ogutalihwaho, baba bulebero bw'abantu bona. 8Nikwo omu migilire yonene yonene egyo abantu aba abalikushusha abararu bahagaize emibili yabo, bagaya abatwazi, bashuba bajuma abakunirwa b'omw'iguru. 9Kyonkai orwo Mikaili Omumalaika Mukuru na Sitani barashaine nibarwanira omubili gwa Musa, Mikaili tiyakeenire Sitani n'akake, shana akagamba ati, «Olibonwa Mukama.» 10Kandi abantu aba nibajaamya kyona kyona ekyo batalikushobokerwa. Ebintu ebyo balikumanyisibwa obuhangwa nk'ebigunju nibyo byonene byonene ebilikubaita. 11Balikebona! Nibarondora Kaini. Aha rw'enshonga y'eitunga betubikire omu ntambara eyo Balaamu yakozire. Bashengi nka Kora, n'ekifere nibaija kufa nk'ekye. 12Abantu abo nibahagaza amagenyi ganyu ago muralilizangaine. Nibashemelerwa hamoi nainywe kyonkai omururu tigulikubaisa nshoni. Bonene abo bichwi ebitali bya kugwa njura, nibihutwa omuyaga kushai; miti etaina biraba omu kirumo kyabyo, basindukire bafa kabili. 13Nibashusha amayengo g'amani ag'enyanja, obuhemu bwabo nibubatutuubya ekifuzi. Nikyo kimoi n'enyanyinyi z'ekibonw'omoi, balinzire kwija kunagwa omu mwilima elindindi eirai lyona. 14Aba nibo Enoki ow'omuzarwa gwa mushanju kwema ahali Adamu yarangire ati, «Omukama aizire n'amahe g'abamalaika batakatifu, 15kuramura abantu bona, kubonabonyia bona abatatina Ruhanga aha rw'amafu gabo ago bafakaire omu bujanga bwabo, n'amahano gona ag'abafakare bamurogosireho.» 16Aba nibo batahwa kweboroboita, taliho rwo basanirwa, amairu g'obunyama nigabatwara kubi, bagambira eiguru, betutumura kundi, bajebeka abantu kugira ebyo babalyaho. 17Kyonkai bagonzibwa, mwijuke entumwa z'Omukama Yesu Kirisito zarangire. 18Bakabagambira bati, «Omu biro by'amaheleruka ab'okubajamya baliija, obunyama nibubabanja.» 19Nibo aba abaleta omwahukano omu bantu, bantu b'ensi abataina Mwoyo Mutakatifu. 20Kyonkai inywe bagonzibwa, mugume muno omu kwikiliza kwanyu okutakatifu muno; mara mushome enshara nimukoza amani ga Mwoyo Mutakatifu. 21Mugume mugonze Ruhanga, mulindiliire Omukama waitu Yesu Kirisito k'abagilira obuganyizi mukabona oburora obutalihwaho. 22Abalikulengeshanyia mubajune bagumire kimoi omu kwikiliza; 23mubashwaikure omu muliro, abandi mubaganyire nimwekenga, nangu n'ekijwaro ekihagaziibwe obuhwanshoni mukinuge. 24Ahabwe ekitiinwa, Ruhanga ogwo alikushobora kubalinda mutagwa, akabagobya omu busingebwe obw'ekitinwa mutaina kamogo mara nimushemelerwa muno. 25Ruhanga ogwo omoi wenkai, Omurokozi waitu omu bushobora bwa Yesu Kirisito Omukama waitu, agire ekitinwa, obukama, engoma n'obushobora, ebyo yabaire ainabyo kwema karai, na mambwenu n'eirai lyona. Amina.

will be added

X\