YAKOBO 5

1Mbwenu nainywe abatungi mulire muboroge aha rw'enaku ezaija kubagwera. 2Eitunga lyanyu lijunzire, n'ebijwaro byanyu biliirwe enyenje. 3Ezahabu yanyu n'efeza bimomire, mara okumoma kwazo nikwo kurababanja, kandi kubokye nk'omuliro. Ebiro ebi by'amaheleeruka, inywe mwagyaho mwatuuma eitunga. 4Mulebe abakozi abagesire emisiri yanyu, abo mugobeize mukabaima empeerwa zabo nibabatonga. Mara Omukama w'amahe yahuliire okutaka kw'abagesi abo. 5Mutwire omu nsi mwagoijagira, mwayehuuba; mwasiga gaba amaheleruka g'enaku mwaba nirwo mutunga mukaganagana. 6Muramwire omugorogoki mwamwita; wenene agabangira tainago. 7Kityo barumuna bange, mwegumisilize kuhika orwo Omukama aliija. Leba omulimi aliho etegeleize emyaka y'eiguzi lingi, kyonkai nayegumisiliza kuhika orwo enjura y'omuhanguko n'etoigo eragwa. 8Nainywe kutyo mwegumisilize. Mugume emitima, Omukama ali haihi kwija. 9Barumuna bange muleke kulyangana mutaija mukaramurwa; Omuramuzi yaizire. 10Barumuna bange, obulebero bw'obushasi n'obwegumisiliza, murondore abarangi abagambaga omw'ibara ly'Omukama. 11Muraleba, abagumire nibo tulikweta baberwa. Murahuliire obumanzi bwa Yobu, mwashuba mwabona ekyo Omukama wenene yabaire agendeleire, okwo agira embabazi n'obuganyizi. 12Kyonkai barumuna bange, ekilikukira byona, mutalinahira mukajuliza iguru anga nsi, anga kugira eminahilire endijo yona yona. Kamurakunda mukundekwo, kamurayanga mwangekwo, mutalija mukasingwa omushango. 13Mwinayo atangirwe? Ashome enshara. Haliho alikushanduka? Asiime. 14Mwinayo omurwaire? Atumeho abagurusi b'enteko, bamushabire nibamusiiga amajuta omw'ibara ly'Omukama. 15Enshara egyo einamu okwesiga erarokora omurwaire, Omukama aramukiza. K'arashangwa akozire amafu aragagarulirwa. 16Aha rw'ekyo mwatulirangane amafu ganyu, mara mushabirangane, mubone kukira. Enshara y'omugorogoki egira amani gangi. 17Eliya akaba ali muntu nka ichwe, yashaba muno enjura etagwa, mara yamara emyaka eshatu n'emyezi mukaaga enjura etagwa hansi. 18Yashuba yashaba, yagwa, n'ensi yayeza. 19Barumuna bange, k'omuntu araruga aha mazima akalyenagamu, kandi ondijo akamugarura, 20ogwo ayamugarura amanye okwo buli muntu agarura omufakare abaire agwire, amukiza ahali rufu mara amushoboza okugarulirwa amafu gangi.

will be added

X\