YAKOBO 3

1Barumuna bange, abangi omuli inywe mutaligonza kuba begesa, aha rw'okuba nimumanya okwo ichwe abegesa tuliramurwa eiramu elilikukira ely'abandi. 2Nobona ichwena tushobya omuli bingi. Kyonkai k'omuntu aba atashobize mu migambire ogwo aba ali mugorogoki, nashobora kugelera n'omubiligwe gwona. 3Orwo tuteka ebyoma omu kanwa k'efarasi kazituhulira, tuba tuzigeleire emibili yazo yona. 4Kwakwo muraleba n'emeli. N'orwo ziba zihango mara zitwarwa omuyaga ogw'amani, zihaburwa akabaho kake muno zigiire mbali omubugi alikuzolekeza. 5N'orulimi narwo nikwo ruli; rwonene ruba kagingo kake akekuza omu bintu bihango. Muraleba okwo ekibira kimarwaho akaliro kake n'orwo kyakuba kili kihango kitai! 6Orulimi narwo ruba muliro. Orulimi ruba nsi mbi omu ngingo zaitu, rutera omubili gwona eibara libi, rwokya ebitondwa byona, kandi narwo rushuba rwokibwa omuliro gw'eirai lyona. 7Nimumanya okwo engeli zona z'ebigunju, n'ebinyonyi, n'ebyekurura, n'enfuru, nibishobora kworoorwa mara byoroorwa abantu. 8Kyonkai taliho muntu yakworoora rulimi, omubisha atageleerwa, rwijwire esumu nyamwita. 9Nirwo tukoza kusingiza Omukama mara Isheichwe, rwonene rwonene tuba nirwo tukeenesa abantu abatonzirwe omu mishusire ya Ruhanga. 10Akanwa konene konene karugwamu okusingiza n'okukeena. Barumuna bange, ebi tikwo bilikuragirwa kuba. 11Enchuro yakutabukwamu amaizi agarungi n'agalikushalira? 12Barumuna bange inywe! Omuti gw'omutini gwakuraba ezeituni, anga omuzabibu kuraba etini? Nikwo n'amaizi g'omwonyu gatakurugwamu maizi garungi. 13Okwo muli n'ohai omumanyi anga omushobokerwa? Akoze oburorabwe oburungi kwoleka ebikorwabye omu bwetohya n'obumanyi. 14Kyonkai kamuragyaho mukagira ekiisho ekishaguliraine n'okweyenda, muleke kwesiima n'okugamba ebishuba nimuhakanisa amazima. 15Obumanyi obu tibwo bulinya oburuga mw'iguru. Obu bw'omu nsi, bw'obunyama mara bwinamu orwango. 16Mbali hali ekiisho n'okweyenda, niho haba omwaga n'ensika. 17Kyonkai obumanyi oburuga oruguru ekya mbere buba burungi, kandi bw'emilembe, bw'obuchulezi, bw'entwaza nungi, bwina obuganyizi bungi mara burugwamu ebirungi, tibulengeshanyia kandi tibugiramu ka bugobya. 18Abantu abagonza emilembe nibo babiba embibo omu milembe, omwo hakaija hakarugwamu ebiraba by'obugorogoki.

will be added

X\