YAKOBO 2

1Barumuna bange, orwo mulikwikiliza Omukama waitu Yesu Kirisito, Omukama w'ekitinwa, muleke kugira ekigonzi n'akashororangano. 2Mbwenu k'omuntu yakwija mbali muteraniire ajwete empeta z'ezahabu n'emyendo emirungi, n'omunaku ajwete ebishambalita kwakwo akabataahamu, 3mukafaho ajwete emyendo emirungi mukwese, «Waitu garuka aha,» kandi omunaku mukamugambira muti, «Iwe yemelera kulinya! Nshuntaama omu maguru.» 4Aho timwashororangana, mara ebyo mukagoba aha kubikoza omutima gubi? 5Barumuna bange huliliza. Aboro omu nsi egi tibo Ruhanga yaronkire kuba batungi omu kwesiga, n'okuba basika b'obukama obwo yaraganisize abakamugonza? 6Kyonkai inywe omunaku ogwo nimumugaya. Abatungi tibo bababonesa enaku? Tibo babatwara rwamani omw'iramuliro? 7Tibo barogota aha Ibara elikunirwa lya Yesu elyo inywe mwetelerwaho? 8Kamuraba nimuhikya eiteka ly'Omukama kuhondera Ebihandiiko Bitakatifu, biti, «Ogonze mutahi wawe nk'okwo iwe oyegonza,» aho muraba nimukorage. 9Kyonkai kamuraba mwina akashororanagano, aho nimukora obufu, Amateka nigabaramura okwo muli bafakare. 10Nobona kaishe muntu ahikya Amateka gona kyonkai akahendamu limoi, naba ahenzire Amateka gona. 11Manyasi ayagambiire ati, «Otalisiyana,» kwakwo niwe yagambiire ati, «Otaliita.» K'otasiyaine kyonkai okaita, noba wahenzire eiteka. 12Kityo mugambe mara mukore nk'abantu ab'okuramurwa Amateka agaletera abantu obwegeleere. 13Nobona omuntu ataganyira na wenene taliganyirwa. Kandi omuntu aganyira na wenene aliganyirwa. 14Barumuna bange, k'omuntu alikugamba okwo aina okwikiliza kyonkai ataina bikorwa nagasirwaki? Okwikilizakwe kwakumurokora? 15Ka murumuna waitu, yaba mushaija anga mukazi, yakushangwa ajwete ebishaato anga ali mujara, 16mara omuli inywe omuntu akamugambira ati, «Ogende n'emilembe, oyote omuliro mara oigute,» atamuhaire eby'emubiligwe gulikwetaga, ekyo nikigashaki? 17Kityo okwesiga kushai, kakutaina bikorwa, nikuba kufire. 18Kyonkai haliho aragamba ati, «Iwe oina okwikiliza, inye nyina ebikorwa,» iwe mbwenu nyoleka okwikiliza kwawe okutaina bikorwa, nanye nyije nkwoleke okwesiga kwange okulikuboneka omu bikorwa. 19Iwe noikiliza okwo Ruhanga ab'omoi; ekyo kirungi. Nangu n'amasitani ekyo gakiikiliza nigachundwa. 20Mbwenu iwe muntu, nogonza bakwoleke okwikiliza okutaina bikorwa okwo kufire? 21Aburahamu isheichwe, ebikorwa tibyo byamuhindwire mugorogoki, orwo yabaire aizire kutamba Isaka aha alutare? 22Nobona okwo okwikilizakwe kwabaire nikugendanwa n'ebikorwa, mara ebikorwa nibyo byagobesheleize okwikiliza. 23Kandi n'ekyahandikirwe kikagobelera, ekilikugamba kiti, «Aburahamu akesiga Ruhanga, okwesigakwe kwamuhindura mugorogoki;» mara bamweta munywanyi wa Ruhanga. 24Ahonu mubone okwo ekihindura omuntu akaba mugorogoki ti kwesiga kwonkai, nawe n'ebikorwa bibulimu. 25Kandi na Ahabu omumalaya akahinduka mugorogoki aha rw'enshonga y'ebikorwa; kuba akanyegeza entumwa, omu kushubayo yazoleka muhanda gundi. 26Okwo omubili ogutaishukaine n'omwoyo guba gufire, kutyo n'okwikiliza okutaina bikorwa kufire.

will be added

X\