YAKOBO 1

1Inye Yakobo, omwiru wa Ruhanga n'Omukama Yesu Kirisito, n'inye ndikubahandikira, inywe nganda ikumi na ibili ezemaliire ensi. Nimbakeisa. 2Barumuna bange, kamurata kugwa omu bilengeso ebitali bimoi, mwebone muli baberwa muno. 3Aha rw'okuba nimumanya okwo okulengwa kw'okwikiliza kwanyu kurugwamu okuguma. 4Kandi muleke okuguma kwanyu kuhikye omulimo gwakwo, nainywe mubone kuba bagorogoki omuli byona mutaina kyomubuzirweho. 5K'omuli inywe haraba halimu omuntu ataina bumanyi, abushabe Ruhanga, niwe abutunga abantu bona buli bungi mara atalikwefuuhya, kandi omuntu ogwo arabutungwa. 6Kyonkai obushabe noyesiga otalikulengeshanyia, nobona omuntu alengeshanyia ashusha eiyengo ly'enyanja elisindikwa omuyaga gukalichundaigura. 7Omuntu ogwo atashuubira ngu Mukama naija kumutunga kintu kyona kyona, 8enshonga aina emitima ebili omu by'alikuba nakora byona; taina mbali ayemeleire. 9Murumuna waitu omunaku naragirwa kushemelerwa orwo Ruhanga alimukuza, 10kandi omutungi ashemelerwe orwo Ruhanga alimutera ahansi, nobona alihwaho nk'orwakyo rw'ekikamba. 11Eizoba kalishabuka omushana gwalyo gubabilira mara gwomesa ebimera. Aho enyakyo zabyo ziragara, n'oburungi bwabyo buhwaho. Nikwo n'omutungi ahwaho atyo, ebyo aba nakora akabisigaho. 12Omuntu ayemera ebiyengo aba muberwa, kuba k'alilengwa akasinga alitungwa orukinga rw'oburora orwo Ruhanga yashuubiize abamugonza. 13Omuntu atalilengesibwa akagamba ati, ┬źNalengesibwa Ruhanga;┬╗ kuba Ruhanga taina kulengesibwa Sitani, mara wenene taina kulengesa muntu. 14Buli muntu alengesibwa orwo ayohibwa orwoyoyorwe rukamubeiyabeiya. 15Ahanyuma k'orwoyoyo orwo rukura ruzarukanwamu obufu. Kandi obufu kabuba butachwekire buzarukanwamu orufu. 16Barumuna bange abaagonzibwa, mutabeiyabeiywa. 17Buli kirungo na buli matungwa agahikilire biruga oruguru, biruga ahali Isheichwe ayatonzire emuli z'eiguru, wenene tahinduka mara tafuba. 18Akeyendera bweyendera yatuzara aha rw'ekigambo ky'amazima, tubone kukulira ebitondwabye byona. 19Muramanya ekigambo eki barumuna bange. Buli muntu abe mwangu kuhulira, kyonkai aha kugamba n'aha kunigara agende mpora. 20Omuntu k'anigara tarondora Ruhanga mu bugorogoki. 21Kityo mwelinde emize mibi n'emigilire etaina nshonga. Mugire obwetohya mara mugume aha kigambo ekyo mwayegesiibwe, ekigambo ekyo nikyo kyakubarokora. 22Kandi mukore eby'ekigambo kilikubagambira, ti kukihulira kushai kwebeiyabeiya. 23Kuba k'omuntu arahulira ekigambo atakozire kw'alikuragirwa, araba nashusha omuntu alikweleba omu maisho omu kyoo. 24Nobona nayeleba nashuba nagenda, mara aho honkai nayebwa okwo yaba nashusha. 25Kyonkai omuntu alikwekomya Amateka agaletera abantu emilembe, mara akakwatir'aho, atahuliire kushai akashuba akebwa, shanasi akaba mukozikwo, omuntu ogwo aligoshoka omu bigirobye. 26Omuntu kwebona okwo ali munyadini, orulimirwe atarutairemu bohera, akebeiyabeiya, omuntu ogu ediniye ya bushai. 27Edini enungi etainamu kamogo mu maisho ga Ruhanga Isheichwe niy'egi: Kukebera enfuuzi n'entumbwa eziina obushaasi, n'okwelinda ensi etakutokoza.

will be added

X\