ABAHEBURANIA 9

1Endagano eya karai ekaba eina entwaza z'okufukamira Ruhanga n'ez'ahatakatifu ez'omu nsi egi. 2Hakaba haliho Eihema elikozirwe ely'aheru. Omwo nimwo habaga ekinara ky'etara n'emeza y'Omukate gw'Obusinge. Elyo nilyo lyayetwaga «Mwanya Gutakatifu.» 3Enyuma y'orutimbe rwa kabili niyo habaga Eihema elyayetwaga «Ahatakatifu Muno.» 4Elyo lyagiragamu ealutare y'ezahabu ey'obunuuma n'Esanduku y'Endagano, yona esiigire ezahabu, omwo nimwo habaga epakuli eyabaire ebikirwemu manu, enkoni ya Aroni eyatuturaga n'embengo z'endagano. 5Eiguru yalyo abakerubi b'ekitinwa, amapapa gabo gabunzire enketo y'obuganyizi. Ebi titwakubigamba tukabitoitora mbwenu aha. 6Kabamazire kutebekanisa ebyo byona, abakuhani obutosha batahaga omw'Ihema ely'aheru kukora emiruka yabo y'obukuhani. 7Kyonkai Eihema elya kabili elyo lyatahwagamu Omukuhani Nyamukuru, mara nawe limoi lyonkai omu mwaka, kandi yatahagamu aina obwamba bw'okweyatilira n'okwatilira entambara z'abantu. 8Aho Mwoyo Mutakatifu yamanyisaga okwo omuhanda ogw'okutaaha ahatakatifu gwabaire gutakakingukire orwo Eihema ely'aheru lyabaire likyaliho. 9(Eihema ly'aheru lyabaga kabonero k'amakiro aga ago tulimu). Omu ntwaza nk'ezi bahongaga ebihongo, batamba n'ebitambo, kyonkai omuntu ayashangwa nafukamira Ruhanga tibyamuhinduraga muhikiilire aha mutima. 10Ebyo byayolekeraga aha nyakalya, n'eby'okunywa, n'okunaaba okw'engeli etali emoi; gabaga Mateka ag'obunyamubili kuhika orwo obukiro bwakugobire akaijwa ebihya. 11Kyonkai orwo Kirisito yaizire ali Mukuhani Nyamukuru ow'ebintu ebirungi ebyabaire nibishuubirwa kwija, akaletwa omw'Ihema elilikukira omu kitinwa n'obuhikiilire (elitakozirwe muntu, elitatonzirwe). 12Yataaha Ahatakatifu limoi lyonkai yamara, tiyatahiremu na bwamba bwa mbuzi anga bwa nyana: akatahamu n'obwamba obwe, yaba nikwo atuchungura atyo eirai lyona. 13Kuba k'obwamba bw'empaya z'entaama n'obwamba bw'enumi, n'eijwi ly'enyana y'enkiraiziba biraba byashoboire kweza abahagaire, abashaimuliirwe obwamba obwo n'eijwi elyo, babone kurugwaho obuhagare aha mubili, 14isi aho obwamba bwa Kirisito burashurwaki? Kirisito ayayetambiliire Ruhanga ekitambo enzira kamogo, omu mani ga Mwoyo ow'eirai lyona! Obwambabwe obwo nibwija kubeza emitima, bubaihye omu mafu, mukolere Ruhanga asingire. 15Kityo Kirisito n'iwe mubaka w'endagano empya, kuba wenene akafa kurokora abantu omu ntambara ezo bafakaire omu ndagano eya mbere, abayesirwe kutungwa obusika obw'eirai lyona. 16Kuba k'omurago guraba guliho, mukama wagwo naragirwa kushangwa yafire. 17Omurago gugira amani orwo mukama wagwo aba yafire. Mukama w'omurago k'aba akyarora, omurago ogwo tigugira mani. 18Kityo endagano eya mbere tiyakuhamire k'obwamba butaliho. 19Kuba orwo Musa yagambiire abantu bona okwo balikuragirwa Amateka, akakwata obwamba bw'enyana n'empaya z'entaama, hamoi n'amaizi n'esufu katuku na hisopo, obwamba obwo n'amaizi ago yabishaimulira ekitabo ky'Amateka n'embaga yona, 20nagamba ati, «Obu nibwo bwamba bw'endagano eyo Ruhanga abahangiire.» 21Omu migilire yonene Eihema n'ebikwato ebyakozibwaga omu michonchozo y'okufukamira Ruhanga, nabyo yabishaimulira obwamba obwo. 22Twakugira tuti Amateka nigaragira buli kantu kushaimulirwa obwamba nirwo karayezibwa, kandi obuzira kwita kitambo omugaruliro gw'amafu tigukabaireho. 23Kityo kikaba kiragiirwe ebilikushusha eby'omw'iguru kuhasilirwa omu michonchozo egi, kandi eby'omw'iguru byonene ebyo bikaba bili by'okuhasilirwa ebitambo ebirungi kushaaga ebya karai. 24Kirisito tiyatahire hatakatifu ahakozirwe bantu, nikwo kugir'oti ahalikushusha ahatakatifu komo. Wenene akataaha omw'iguru lyonene lyonene, abone kutukuratira omu masinge ga Ruhanga. 25Kandi akaba atali wa kwikara nayetamba, nk'okwo Omukuhani Nyamukuru yatahaga ahatakatifu n'obwamba obutalibwe. 26Enshonga aho yakubaire ali w'okwikara nashasha kwema ensi kutondwa. Nawe okwo bili akagya yaija aha nzindo y'amakiro kwetamba ekitambo kuchwa obufu. 27Kandi okwo abantu bali b'okufa limoi mara bakaramurwa, 28nikwo na Kirisito yatambirwe ekitambo omurundi gumoi gwonkai, kwatilira entambara z'abantu bangi. Mara aligaruka omurundi gwa kabili, ti kwatilira mafu shana kurokora abamulindiliire.

will be added

X\