ABAHEBURANIA 8

1Mbwenu ekyo tukagambire niky'eki: Twina Omukuhani Nyamukuru, Omukuhani asingiire aha mukono gwa bulyo gwa Ruhanga Omukama asingiire omw'iguru. 2N'iwe mukozi w'ahatakatifu, mukozi w'omw'ihema nyakabara, elitateirwe muntu, likaterwa Omukama. 3Nobona buli Mukuhani Nyamukuru bamutaho kuhonga ebihongo n'okutamba ebitambo; kityo omukuhani ogu aragiirwe kugira ekihongo ekyo arahonga. 4Ka Kirisito yakubaire hali omu nsi tiyakubaire mukuhani n'akati, enshonga aliho abakuhani abahonga ebihongo nibaragirwa Amateka. 5Ebyo balikukora nibashubilira ebilikukorwa omw'iguru; kinyumanyumi ky'ebyo. Orwo Musa yaizire kutera eihema, Ruhanga n'iwe yamuragiire ati, «Oramanya okore buli kantu nk'okwo nakwolekire aha ibanga.» 6Kyonkai okwo kili, Kirisito akabona omuruka ogulikushaaga ogwa karai oburungi, aha rw'enshonga endagano enungi kushaaga ekwete ahali wenene, esimbagilize aha biragano ebirungi kushaaga. 7K'endagano eya mbere eraba ekaba etaina kamogo, eya kabili teina kugira kamogo. 8Kyonkai Ruhanga akakwata eihangalye omushango, orwo yagambire ati, «Ebiro bilija, alikugamba Mukama, orwo ndikora endagano empya, ngikore n'oruganda rwa Isiraeli n'oruganda rwa Yuda; 9etali ndagano nk'eyo nakozire na baish'enkurubo, kiro ekyo nabakwete nkabaihya omu nsi ya Misiri. Enshonga tibayekomize ndagano yange, nikyo nanye nabaihireho omutima, alikugamba Mukama. 10Omukama nagamba ati, K'amakiro ago galiba gahingwire, egi niyo ndagano eyo ndikora n'oruganda rwa Isiraeli; ndibateka amateka gange omu magezi gabo, ngabahandike aha mitima, ndiba Ruhanga wabo, na bonene baliba ihanga lyange. 11Taliho muntu alyegesa mutahiwe, anga buli omoi kwegesa murumuna nagamba ati, ‹Omanye Omukama,› enshonga balimanya bona kwema aha muke bwoli kugoba aha muhango bwoli. 12Ndibagarulira entambara zabo, amafu gabo ndiba ntakigaijuka rundi.» 13K'Omukama alikugamba endagano empya, aho eya mbere naba atakigilimu. Ekyakura kikahwa aha ishasha ekyo kiba kiraliire kuhwaho.

will be added

X\