ABAHEBURANIA 7

1Melikisedeki, omukama wa Salemu, omukuhani wa Ruhanga Rukirabyona, akatanganwa Aburahamu natabaruka omu ndashana asigire yaita abakama, yaha Aburahamu omugisha. 2Kandi Aburahamu wenene ahali buli kimoi kyona ekyo yabaire ainakyo yaihyaho ekichweka kya ikumi yakiha Melikisedeki. Melikisedeki n'iwe mukama wa mbere omugorogoki, nk'enshonga y'eibaralye, mara nashuba naba mukama wa Salemu, nikwo kugir'oti, «Mukama w'emilembe.» 3Tagira ishe, tagira nyina, n'oruganda chei, talikumanyika akazarwa maki yafa maki. Melikisedeki mukuhani eira lyona, nashusha Omwana wa Ruhanga. 4Mubone okwo aba muhango! Aburahamu akamuha ekichweka kya ikumi aha minyago. 5Baijukuru ba Levi abagira omuruka gw'obukuhani, Amateka garagira abantu kubaha ekichweka kya ikumi, nikwo kugamba oti ekichweka kya ikumi ekyo nibakihabwa barumuna babo n'orwo na bonene bali baijukuru ba Aburahamu. 6Kyonkai Melikisedeki atalikutabuka mu baijuukuru ba Aburahamu, leba Aburahamu akamuha ekichweka kya ikumi, kandi Melikisedeki wenene yaba n'iwe aha Aburahamu omugisha, Aburahamu ayabaire aina endagano. 7Taliho kya kuhakanaho, nikimanyika okwo omugisha omuke aguhabwa omuhango. 8Okwo bili mwaha, ekichweka kya ikumi nibakiha abantu abafa, kyonkai rulinya, nyamugira burora n'iwe yahairwe ekichweka kya ikumi. 9Twakugira tuti Levi wenene owo balikuha ekichweka kya ikumi, na wenene rulinya ekichweka kya ikumi akakigira orwo kyagizirwe Aburahamu, 10enshonga akashangwa naija kuzarwa Aburahamu orwo Melikisedeki yatangainwe Aburahamu ogwo. 11Obukuhani bw'Abalevita nibwo bwahinduraga abantu bagorogoki (kuba orwo obukuhani obwo bwabaire buliho nirwo abantu bahairwe Amateka.) Aho omukuhani alikwigana na Aroni kayakubaire ahikiliire hakubeleirehoki omukuhani alikwigana na Melikisedeki? 12Nobona obukuhani kabuhinduka n'Amateka gahinduka. 13Owo tulikugambaho amakuru aga akaba ali wa ruganda rundi orutalikurugwamu mukuhani wa kutamba kitambo ahali altare. 14Kili aha mushana okwo Omukama waitu yatabukire omu ruganda rwa Yuda, oruganda orwo Musa atagambireho orwo yagambiire aha bakuhani. 15Eki nikigya aha mushana bwoli k'alikwija omukuhani nka Melikisedeki, 16akaba mukuhani obuzira kukomwa Mateka, kuleba mbali alikutabuka, kuba wenene ogu w'oburora obw'eira lyona. 17Enshoga najulirwa ati, «Oli mukuhani eira lyona, alikwigana na Melikisedeki.» 18Omuhango ogwa karai nigurugaho aha rw'obujege bwagwo n'okutagira mugasho 19(kuba Amateka tigahindura muntu kuba muhikiilire); aha rw'okuba eshubi enungi kushaaga ey'okututwara ahali Ruhanga twagiboine. 20Eshubi egyo tukagiragwa. 21Eirai ababaga bakuhani tibagiraga kiragano. Kyonkai ogu Omukuhani Nyamukuru akaragwa ati, «Omukama akarahira, mara talihindura kigambokye, akagamba ati, ‹Iwe oli mukuhani eira lyona.› » 22Kityo Yesu n'iwe kabonero nyakabara ak'endagano enungi kushaaga. 23Abakuhani aba karai bakaba bali bangi, ahakuba rufu yabainuraga aha rubimbi rwabo. 24Kyonkai Yesu obukuhanibwe naikara nabwo amakiro gona, orwo wenene ali nyakumelera. 25Aha rw'ekyo buli kaanya aina obushobora bw'okurokora abalikukunda k'abarokora bakamara bakaija ahali Ruhanga, kuba wenene asingireho ebiro byona kubatelera omushango. 26Kikaba kisainekwo ichwe kugira Omukuhani Nyamukuru nk'ogu, omutakatifu nyakatetere, enzira kamogo, enzira bufu, ow'ekitinwa kingi omw'iguru. 27Wenene ogu ti nka bakuhani bakuru ab'eira, kuragirwa kutamba bitambo buli kiro, ekya mbere kwatilira amafu age, kushuba akatilira amafu ag'embaga. Ekitambo akakitamba limoi lyonkai yamara orwo yayetambire wenene. 28Amateka gatekagaho Abakuhani Nyamukuru bali bajege; kyonkai ekiragano kya Ruhanga ekyarugire nyuma, Amateka gabaireho, kikataho Omwanawe ayahindwirwe mugorogoki eira lyona.

will be added

X\