ABAHEBURANIA 6

1Aha rw'ekyo evangeli ya Kirisito katuleke kugyema aha mbandizo, twegese eby'obukuru. Tutashuba nyuma kwombeka misingi, nikwo kugir'oti kubegesa okwechuza amafu kwikiliza Ruhanga; 2kubegesa aha kubatiza, okutebwaho emikono, okuhimbuka kw'abafire, n'eiramu ely'eira lyona. 3Kyonkai ebyo turabikora ka Ruhanga arajubura. 4Ababaire bakyanuliirwe, barolizeho ebirungi by'eiguru, bajwangaine na Mwoyo Mutakatifu, nikiguma kushuba kubahindura bakechuza 5kuba bakaba barolizeho obunuzi bw'ekigambo kya Ruhanga, n'amani g'obusinge obulija. 6Abo kabakugwa bakaba bashengi omu dini, nikiguma kubahindura bakechuza, kuba nibashemelerwa okubamba Omwana wa Ruhanga n'okumugahisa omu bantu. 7Ensi k'etaahwa enjura egwire emirundi nyingi, ekashuba ekameza emikubi y'omugasho ekagasha abalimire ensi egyo, ensi egyo Ruhanga aba agitungire omugisha. 8Kyonkai eitaka kalileta amahwa n'amatojo liba litakiina mugasho, mara lisigara kake kukeenwa. Endekelero yalyo kwokibwa. 9Bagonzibwa bange, n'orwo tulikugamba tutyo, twina eshubi nyingi okwo muli b'okurokoka. 10Kuba Ruhanga omunyamazima nayekomya ebyo mwamukoleire, n'engonzi ezo mwamugondize aha rw'ebyo mwakoleire abakirisito omw'ibaralye, nk'okwo mukyakora na mwaha. 11Ichwe ekyo tulikwetaga muno ni buli omoi omuli inywe kugira ekihika kugoba aha nzindo, nirwo mulibona ebyo mulikushubira. 12Titulikwenda kamunafara, nitugonza mushushe abaikiliza bakashuba bakagira obwegumisiliza, ahanyuma bakabona ekyo Ruhanga yaragaine. 13Orwo Ruhanga yaraganisize Aburahamu, akerahira wenene, aha rw'okutagira wa kwerahira alikumushaaga 14ati, «Omu mazima ndikuha omugisha nkanyise n'oruzaro rwawe.» 15Nikwo Aburahamu yayegumisiliize atyo obutananukwa akalemwa akatungwa ekyo yaraganisiibwe. 16Nimumanya okwo abantu berahira abalikubashaaga, kandi empaka zabo zona zimarwa okurahira. 17Kityo orwo Ruhanga yayenzire kwoleka bwoli abasika b'ebyo yaragaine, okwo entegekaye etahinduka, entegekaye egyo yagihamisa narahira, 18ebintu bibili ebitahinduka, ebyo Ruhanga atashobora kubeiya, bibone kugumisa emitima yaitu geigeigei, ichwe abamuhungiireho tubone kuguma nitushubira ebyo twashubiziibwe. 19Eshubi egi eyo twinayo niyo nanga y'omwoyo etetengya anga kuyuga. Niyo shubi eraba omu rutimbe ekataaha ahatakatifu 20mbali Yesu yatwebembeire orwo yamazire kuba Mukuhani Nyamukuru alikwigana Melikisedeki.

will be added

X\