ABAHEBURANIA 5

1Buli mukuhani arondwa omu mbaga, mara bamutaho kuba mukozi wa Ruhanga ali mubaka w'abantu, kuhonga ebihongo n'ebitambo aha rw'enyatano y'amafu. 2Abatalikumanya n'abalikuhaba nashobora kubegumisiliza akabatwaza obufura, ahakuba na wenene mujege omu ngeli zingi. 3Enshonga egyo naragirwa kutamba ebitambo kwatilira amafu aga wenene n'amafu ag'embaga. 4Omuntu ow'okweha ekitinwa ekyo tabayo, manya Ruhanga n'iwe amweta nk'okwo yayesire Aroni. 5Nikwo na Kirisito wenene atayehaire kitinwa kya Bukuhani Nyamukuru. Ruhanga n'iwe yamutaireho ayamugambiire ati, «Iwe waba Mwana wange, kir'eki nakuzara;» 6nk'okwo ahandi alikugamba ati, «Oli mukuhani eira lyona, noigana na Melikisedeki.» 7Orwo yabaire akyarora omu nsi, Yesu akashaba ahali Ruhanga namutakaho, nataaga, nalira, natakira Ruhanga ayakushoboire kumukiza ahali Rufu. Ruhanga akamuhulira, kuba Yesu ogwo yamukuniraga. 8N'orwo yashangirwe ali Mwana, omu kushashakwe akegeramu omuhuliro. 9Kayamazire kuba mugorogoki yaba ntabuko y'okurokoka okw'eira lyona ahali balinya abarakamuhuliraga. 10Ruhanga akamuronka yaba Mukuhani Nyamukuru alikwigana na Melikisedeki. 11Ekigambo eki twina bingi eby'okukigambaho, kyonkai nikiguma kukishoborora, kuba timulikukunda kuhulira. 12N'orwo kaanya aka mwakuba mwabaire begesa, mukyayetaaga ow'okushuba kubanza bubanza kubegesa ekigambo kya Ruhanga. Amata nigo mulikwetaga; ekyakulya ekilikuguma ekyo chei. 13Omuntu akyali w'okunywa amatai gonkai ogwo mwana, takamanyire kirungi na kibi. 14Ekyakulya ekilikuguma kiba ky'abakuzire, nibo balikushobora kwahurana ebirungi n'ebibi.

will be added

X\