ABAHEBURANIA 4

1Orwo Ruhanga akyatushuubiza okwo tulihumulira omuli wenene, twelinde omuntu n'omoi omuli inywe atalija akagwerwa mushango akalemwa kuhumulira omuli Ruhanga. 2Kuba evangeli eyo twarangiirwe niyo yonene yonene eyo barangiirwe. Kyonkai ebyo bahuliire tibyabagasire kantu, nobona bakabihulira kushai, tibabikiliize. 3Tulibona obuhumuro obwo ichwe abaikiliize nk'okwo Ruhanga wenene yagambire ati, «Nkanigara narahira nti, ‹Tibalitaaha mu nsi eyo nakubahaire bakahumuliramu.› » Eki akakigamba n'orwo kwema orwo yatonzire ensi akaba agobesheleize byona. 4Kuba aina mbali alikugambaho ekiro kya mushanju ati, «Aha kiro kya mushanju Ruhanga akosha emilimoye yona.» 5Kandi na hanu aha nagamba ati, «Tibalitaaha mu nsi eyo nakubahaire bakahumuliramu.» 6N'orwo bili bityo haliho abalitaaha omu nsi egyo bakahumura, n'orwo abarangiirwe evangeli bali ba mbere batagitahire aha rw'okutahulira kwabo. 7Aha rw'ekyo Ruhanga aina ekiro ekyo yataireho, yakyeta «Kir'eki,» orwo aha nyuma yaizire akagamba omu kanwa ka Daudi, omu bigambo ebyajuliziibwe nk'ebi ati, «Kir'eki kamurahulira eirakalye, mutakugumangana mitima.» 8Abantu abo kuba Yoshua yabahaire ensi egyo, ekiro ekindi Ruhanga tiyakukigambire. 9Kityo n'abali ba Ruhanga bakyainayo Sabato y'ekyosi. 10Aha rw'okuba kaishe muntu wena ataaha omu nsi ya Ruhanga akahumura, ayosha n'emilimo nk'okwo Ruhanga yayosire. 11Ahonu tutemu amani kutaaha omu buhumuliro obwo tukaikya, omuntu n'omoi atalija akagwerwa mushango aha rw'okutahulira nk'okwo. 12Kuba ekigambo kya Ruhanga kiina oburora n'amani, nikishara kushaaga embanda y'amogi gabili. Nikichumita nikigoba mbali omwoyo n'amagezi biteranira, mbali engingo ziteranira n'eminoita, kimanya eby'omutima gulikutekeleza n'ebyo gulikugendelera. 13Ekitondwa ekyo Ruhanga atabona tikibayo. Byona nabibona geigeigei, kabutekire. Tulimwetondera obusigire. 14Mbwenu orwo twagizire Omukuhani Nyamukuru ayagiire omw'iguru, n'iwe Yesu Omwana wa Ruhanga, tugume muno omu kwesiga kwaitu okwo twebuga. 15Twina Omukuhani Nyamukuru alikutumanya obujege bwaitu, akalengesibwa omu ngeli zona nka ichwe, kyonkai tiyakozire bufu. 16Tugiire nu obwesige, tugye aha nketo ya Ruhanga mbali ekisha kisingiire, tugende atuganyire, atugilire n'ekisha ky'okutujuna omu bwetage bwaitu.

will be added

X\