ABAHEBURANIA 3

1Bakirisito barumuna bange, inywe abo nainywe Ruhanga yayesire! Mutekeleze Yesu, entumwa mara Omukuhani Nyamukuru owo twebuga. 2Akaba mwesigwa ahali Ruhanga ayamutumire, yaba munyamazima, nk'okwo Musa yabaire mwesigwa omuli Rwensinga ya Ruhanga. 3Kyonkai kandi Yesu yasana kugira ekitiinwa kihango kushaaga Musa, nk'okwo omwombeki w'enju agira ekitiinwa kushaaga enju yonene. 4(Buli nju egira agyombeka, kyonkai omwombeki wa buli kantu aba Ruhanga). 5Musa akaba ali mwiru omuli Rwensinga ya Ruhanga yona, yashuba yagamba ebyabaire nibija kugambwa aha nyuma. 6Kyonkai Kirisito yaba Mwana wa Ruhanga kandi mugelezi omwesigwa wa Rwensinga y'Omukama. Aho ichwe tuli Rwensinga ya wenene katuraguma n'obwesige nitwebuga eshubi yaitu. 7Aha rw'ekyo nk'okwo Mwoyo Mutakatifu alikugamba ati, «Kir'eki kamurahulira eirakalye, 8mutakugumangana mitima nka bashw'enkurw'inywe abashengire Ruhanga kiro kiliinya omw'irungu orwo bamulenga. 9Omw'irungu bashw'enkurw'inywe bakandenga, n'orwo emyaka makumi ganai yona babaire baboine ebyo nabaire mbakoleire. 10Omuzarwa gulinya gukantamisa, nanye nagamba nti, ‹Baliikara n'emitima mibi; kuba bangire kwekomya emihango yange.› 11Nkanigara narahira nti, ‹Ensi eyo nakubahaire bakahumuliramu tibaligitahamu.› » 12Muramanya barumuna bange, omuntu n'omoi omuli inywe atakugira mutima gubi ogutalikwesiga, akaija akaruga ahali Ruhanga asingire. 13Orwo tukyagamba «Kir'eki» mute nimwemanganamu buli kiro, omuntu ataija akalembalembwa bufu akagumanganirayo. 14Tuli hamoi na Kirisito katuraguma n'obwesige obwo twabandize nabwo kulemwa kugoba aha ndekelero. 15Leba nk'okwo kyakagambirwe kiti, «Kir'eki kamurahulira eirakalye mutakugumangana mitima, nka bashw'enkurw'inywe abashengire Ruhanga.» 16Ni baahai abo abahuliire bakashuba bakashenga? Ti balinya abo Musa yaihire Misri? 17Isi emyaka 40 yona, abamutamisize ni baahai? Ti balinya abafakaire bakashuba bakagwa omw'irungu? 18Isi ni baahai abo yarahiire okwo batakutaahire mu nsi eyo yabaire naija kubaha bakahumuliramu, kabatali abayangire kumuhulira? 19Kityo nitubona okwo batashoboire kutaaha mu nsi egyo aha rw'enshonga y'okutesiga kwabo.

will be added

X\