ABAHEBURANIA 13

1Mugume mugonzangane mka abarumuna. 2Munyegeze abagenzi, kuba omu kugira batyo abandi baranyegeize abamalaika batabamanyire. 3Mwijuke abafungwa okw'oshusha oti muli hamoi na bonene omuli jela. Orwo nainywe muli bantu mwijuke n'abalikwitwa kubi. 4Obushwere inywena mubukunire, kandi abali omu bushwere batahagaza kitabo kyabo, kuba ensiyani Ruhanga aliziramura. 5Omu burora bwanyu mutarujuukira mpiya, mumalirwe ebyo mwinabyo; kuba Omukama akagamba ati, «Tindibarugaho anga kubasigaho.» 6Nikyo tulikugambira n'obwesige tukwese, «Omukama n'iwe aba mujuni wange, tinditina; omuntu yakunkoraki?» 7Mwijuke abebembezi baanyu ababarangiire ekigambo kya Ruhanga. Murore okwo babolekeize, mubarondore omu kwesiga kwabo. 8Yesu Kirisito owa nyeigoro n'iwe wenene wenene owa mbwenu, mara n'iwe w'eirai lyona. 9Emyegeso emijaiijo eya buli ngeli etakuubahabisa. Ahakuba kintu ky'omugasho omutima kuramirwa ekisha kya Ruhanga. Abaliire ekyakulya tikyabagasire kantu. 10Twina ealutare ey'abakozi b'omw'Ihema bataikilizibwa kulya bitambo ebigitambiirweho. 11Enshonga ebitunganwa eby'Omukuhani Nyamukuru atwara obwamba bwabyo ahatakatifu kuba kitambo ky'enyatano y'obufu, ebitunganwa ebyo babyokeza enjai y'orusisira. 12Nikwo na Yesu yashasire enjai ya Yerusalemu abone kuhindura abantu kababa batakatifu aha rw'obwambabwe. 13Aha rw'ekyo tumuhondere enjai y'orusisira, twemere ebijumi ebyo yayemeire. 14Kunu titwinayo Yerusalemu ey'eirai lyona. Yerusalemu elikwija kwija niyo tulikuhiiga. 15Mbwenu tweme na Yesu tutambire Ruhanga ekitambo ky'okumusingiza, nikyo kitambo ekilikugirwa abantu abalikumwebuga okwo n'iwe aba Mukama. 16Muteho amani kukora kurungi n'okujunisangana ebyo mwinabyo, aha kuba ebi nibyo bitambo ebishemelera Ruhanga. 17Mugire omuhuliro aha batwazi banyu, mumanye okwo muli omu mani gabo; nobona nibo bashumba b'emyoyo yanyu, kuba nibamanya okwo baliragirwa kwetonda obusigire aha rw'enshonga yanyu. Omulimo gwabo ogu bagukore n'amashemelerwa; eby'okujunara babileke, kuba ekyo nainywe tikyakubagasira kantu. 18Naichwe mutushabire. Titwina kyotulikweligomwa aha mutima, shana ekyo tulikwitanira ni buli kantu kukakora kurungi. 19Nimbatagiliza muno muteho amani gangi kutushabira, nirwo ndabona obushango bw'okugaruka okwo bwangu. 20Mbwenu Ruhanga w'emilembe, ayasingire akahimbura Yesu omu bafu, Yesu omushumba mukuru w'entaama, aha rw'obwamba bw'endagano ey'eirai lyona, 21abatunge ebirungo byona, mubone kukora ebyo alikwenda, abakoze ebilikumushemelera mujwangaine na Yesu Kirisito. Yesu Kirisito ogu ahabwe ekitinwa eirai lyona. Amina. 22Barumuna bange nimbatagiliza, ekigambo kyange ekyo nabagambira kubatamu ekihika mukikwate, nobona nabahandikira ningutura. 23Nimbamanyisa okwo murumuna waitu Timotheo bamutaishwire omu kifungo. K'arayanguha ndaija nawe okwo tubabone. 24Mutukeisheze abatwazi banyu bona n'abakirisito bona. Barumuna baitu aba Italia nibabakeisa. 25Ekisha kya Ruhanga abagilire ekisha inywena. Amina.

will be added

X\