ABAHEBURANIA 12

1Na ichwe, abazingoirwe eihe lihango liti ly'abajulizi, tunage ebilikutusikilira byona, n'entambara ezatubaireho, tugume twiruke omwiruko ogwo turagirwe kwiruka, 2amaisho tugahangire Yesu omwebembezi waitu omu kwesiga kwaitu, n'iwe atuhindura bahikilire omu kwesiga kwaitu okwo. Yesu ogu akatekanira obushasi bw'omusaraba, bamugaya tiyabifaho, nawe aho ashuubiire ebyera eby'alikwija kubona. Mbwenu leba asingiire aha bulyo bw'enketo ya Ruhanga. 3Mwijuke Yesu Kirisito ayatekaniire kuterwa atyo abafakare, mutaija mukayuga mukananukwa. 4Omu kurashana n'obufu timukagobire aha kwitwa. 5Manya inywe muba baana! Isi mwayebirwe ebigambo ebi ebilikubahana biti, «Mwana wange, eby'Omukama akutanga otabijajaaraho, kandi k'alikuha ekibonabonyio otalinanukwa. 6Aha rw'okuba Omukama abonabonyia ow'agonza, kandi omwana enjanga n'iwe atera.» 7Ebyo mubitekanire bibahane. Ebyo Ruhanga alikubagira nabibagira muli baanabe. Ni mwanaki owo ishe atahana? 8Kamutahanirwe nka bandi bona nimuba mutali baana abazarwa, nimushusha abaana b'ebisisi. 9Kandi omu nsi omu twagiraga batataichwe abatukaliraga, mara tushuba tubakunira. Mbwenu aho Isheichwe atuzara emyoyo tiragiirwe kumuhulira kushaagaho tukaba nirwo tubona oburora? 10Mara bonene bakatukalira ebiro bike orwo babonaga nikiragirwa kuba kityo. Mbwenu Ruhanga wenene natukalira katugasirwa, tubone kujwangana nawe omu butakatifubwe. 11Omuntu orwo aba akyalerwa ashasha, tashemelerwa. Kyonkai abamanyire okukalirwa, okukalirwa okwo ahanyuma kubahindura bagorogoki mara kubarugiramu emilembe. 12Niyo nshonga, mugorore emiikono yanyu egyo elikworoba, n'amajwi agalikwinogelerwa. 13Kandi, ebigere byanyu mubitemere emihanda eyemeleire, abalemaire batakusitara, bakire. 14Mwitanire okugira emilembe n'abantu bona. Mushube mugire ekihika ky'okuba batakatifu; Omuntu aliba atabaire mutakatifu talibona Mukama. 15Muramanya omuntu n'omoi ataburwa kugira kisha kya Ruhanga. «Omuzi ogulikushalira» gutaturura na gumoi, kwija kubatuntuza kandi kwisa banu bangi emize. 16Kandi hatabaho musiyani, anga omuntu atalikwetaho dini nka Esau ayagulize obusikabwe bw'obuzigaijo aha rw'akakulya aka limoi. 17Nimumanya okwo ahanyuma kayagondize kuhaba obusika bw'omugishagwe gw'omuzigaijo ishe akanga, kuba akashango k'okwechuza tiyakaaboine, n'orwo yagushabire nalira. 18Inywe timwizire kuhiiga kyomwakukwata: Tugambe omuliro ogulikurabagira, anga omwilima, anga ekiire, anga enkomaizi, 19okujuga kw'enzamba, anga ebigambo eby'abantu bahuliire bakegomba kutagambirwa bindi ebishaagireho. 20Ahakuba tibashoboire kwemera muku ogwagiireho guti, «Arakwataho eibanga eli, kilikaba kitunganwa, kiterwe amabaare.» 21Mazima ebyakozirw'aho bikaba nibitinisa muno nangu na Musa yagamba ati, «Nyina obutini bungi, ninjugumba.» 22Kyonkai inywe mugobire aha Ibanga lya Sioni mbali ekigo kya Ruhanga asingire kili, niyo Yerusalemu ey'omw'iguru. Mwagoba aha mahe g'akanyahwera ag'abamalaika obukumbititi. 23Mwagoba n'enteko y'omuzigaijo, ab'amabara gabo gahandikire omw'iguru. Mwagoba Ruhanga omuramuzi w'abantu bona, n'emyoyo y'abantu abafura abagobire omu buhikilire. 24Mwagoba Yesu omubaka w'Endagano Empya, n'obwamba obushaimwirwe obulikutushubiza ebirungi kushaaga obwamba obwa Abeli. 25Mwelinde, Yesu Kirisito alikugamba mutakwanga kumuhulira. Kabalinya abayangire kumuhulira nagamba ali omu nsi baraba baboine ekibonabonyio, lero ichwe turakira tutai katulikwanga kumuhulira nagamba ayemire omw'iguru! 26Eirakalye likatengeesa ensi; kyonkai kandi mbwenu arahiire ati, «Ninyija kushuba kutengeesa ensi elindi; kyonkai ti nsi yonkai, n'Eiguru libulimu.» 27Ekigambo eki «Elindi» nikimanyisa okwo ebitondwa ebiratengeesibwa bikahwaho. Kandi ebitalikutengeesibwa ebyo bibone kurama. 28Aha rw'ekyo tusiime aha rw'okutungwa engoma etali ya kutengeesibwa, mara tufukamire Ruhanga kurungi, tumutiine nitubomba, 29aha rw'okuba Ruhanga waitu aba muliro ogusosotora.

will be added

X\