ABAHEBURANIA 11

1Okwesiga nikwo kumanya hatalimu kulengeshanyia aha byo tushuubira mara bitalikuboneka. 2Abantu ab'eira Ruhanga akabasiima aha rw'okugira okwesiga kw'engeli egi. 3Okwikiliza nikwo kutuha okushobokerwa okwo ekigambo kya Ruhanga nikyo kyatonzire ensi egi, kityo ebilikuboneka bikaruga omu bintu ebitalikuboneka. 4Omu kwesigakwe Abeli akatambira Ruhanga ekitambo ekirungi yashaga Kaini. Okwesigakwe nikwo kwamuhindwire okuboneka ali mugorogoki, na Ruhanga yakunda ebihongobye kumujulira obugorogoki obwo. Abeli akafa, kyonkai aha rw'okwesigakwe na mwaha akyagambwa. 5Aha rw'okwesiga, Enoki akatwara Ruhanga omw'iguru ataija akafa. Tiyabonekire, kuba Ruhanga akamutwara. Kyonkai Ruhanga atakamutwete akabanza yamusiima, kuba akamushemeleza. 6Obuzira kwikiliza tikilikushoboka kushemeleza Ruhanga. Omuntu kwija kugoba ahali Ruhanga naragirwa kubanza kwikiliza okwo Ruhanga ogwo asingireho mara arongora abamuhiga. 7Ruhanga kayatatiire Noa, akamugambira ebilikwija kubaho, Noa aha rw'okwesigakwe akamuhulira yakora obwato kuhungya omutungogwe. Aha rw'okwesigakwe akoleka ensi okwo etagira kwesiga. Aho Ruhanga yahindura Noa mugorogoki, obugorogoki obwo obuzarukana omu kwesiga. Aho Ruhanga omugorogoki yahindura Noa mugorogoki. 8Aburahamu akagira okwesiga, Ruhanga kayamwesire yamuhulira, yafurukira omu nsi eyo alitungwa obusika, mara yafuruka atalikumanya mbali alikugya. 9Okwesigakwe okwo kwamwikaza omu nsi y'endagano ali mufuruki, omw'ihanga, yatura omu mahema na Isaka na Yakobo abasikabe b'endagano egyo. 10Akaba alindiliire ekigo ekyombekire aha misingi, eyayombekirwe Ruhanga wenene. 11Sara nawe akagira okwesiga yatungwa obushobora bw'okutwara enda, n'orwo amakiro g'okutwaliraho enda gabaire gamulengire. Kyonkai akaba namanya okwo Ruhanga ayabaire amushubiize atyo yabaire ali mwesigwa. 12Aha rw'ekyo omuntu omoi, ayabaire nashusha afire, n'iwe yatabukirweho oruganda, abaijukuru bangi nk'enyanyinyi z'aha iguru, obutabarwa nk'omushenye gw'omwaro. 13Aba bona bakagwa omu kwesiga, bafa batakatungirwe byo babaire baraganisiibwe, nibabibonera harai kushai, nibabyebuga, nibamanya kurungi okwo bonene omu nsi egi bali bahinguzi kushai mara bazahe. 14Abantu abalikugamba migambire egi nibaba nibolekya okwo balikuhiga ensi ey'okuba yabo bakagituliramu kimoi. 15Kabakutekeleize ensi eyo bafurukiiremu, bakuboine obushango bw'okugigarukamu. 16Nawe okwo kili nibegomba ensi elikushagaho oburungi, nilyo iguru. Aha rw'ekyo ti kihemu ahali Ruhanga kwetwa ishebo, aha rw'okuba yabatekatekeire ekigo. 17Aburahamu omu kwesigakwe Ruhanga akamulenga, yatamba Isaka ekitambo. Aburahamu ayabaire araganisiibwe akaikiliza kutamba omwanawe ekitambo, 18owo Ruhanga yabaire agambireho ati, «Baijukuru bawe balyetelerwa ahali Isaka.» 19Aburahamu ogu akabona okwo Ruhanga aina obushobora bw'okuhimbura abafire: Yamara yamuha obulebero bw'okuhimbuka, yamugarulira omwanawe. 20Isaka akagira okwesiga yaha Yakobo na Esau emigisha nashura ebili omu maisho. 21Omu kwesigakwe Yakobo kayabaire nafa, yaha buli mutabani wa Yozefu omugisha. Yayehigika aha mutwe gw'enkoniye, yafukamira Omukama. 22Omu kwesigakwe Yozefu kayabaire yaija kufa, akagamba okwo Abaisiraeli balifuruka Misiri, yabaragiilira n'okwo baramuziika. 23Aha rw'enshonga y'okwesiga Musa kayazairwe abazairebe bamusheleka emyezi eshatu, aha rw'okuba bakabona okwo omwana yabaire ali murungi, n'omuku gwa Farao tibagutiinire. 24Omu kwesigakwe Musa kayakuzire yayanga kwetwa mutabani wa muhara wa Farao, 25yabona hakili abone enaku n'eihanga lya Ruhanga kushaaga okushemelerwa amashemelerwa g'amafu agalikuhingura. 26Akabona okushasha aha rwa Kirisito lili itunga lihango kushaaga eitunga lyona lya Misiri, kuba omu maisho yashubiragayo erongoro. 27Okwesiga kukamwihya Misiri atatinire kiniga kya Farao; kuba akatekanira byona okw'obon'oti Ruhanga atalikuboneka namubona. 28Okwesigakwe kukamuha okwekomya Pasika n'okushaimura obwamba, Omusiliikya ayaisire emizigaijo ataija akasilikya mizigaijo ya Isiraeli. 29Okwesiga kukashoboza abantu kushabuka Enyanja Rutuku oti nibaraba aha nsi etaina maizi; kandi Abamisiri abagondize kurabamu bakamirwa enyanja. 30Aha rw'enshonga y'okwesiga enkuta za Yeriko zikakumba, ekigo kibunzirwe omubisha ebiro mushanju. 31Okwesiga kukarokora Rahabu omumalaya, kutafa na bashengi, aha rw'enshonga y'okugilira abanyomozi ekisha. 32Mbwenu ngambe kushagaha kugira ntai? Eizoba lyakumpwaho kanakugya kugamba aga Gideoni, Baraki, Samusoni, Yefuta, Daudi na Samweli n'abarangi. 33Omu kwesiga bakasinga engoma z'ensi, bakegesa abantu okukoza amazima, bakabona ebyaragainwe, basiza n'entare, 34babutamya omuliro ogulikurabagira, bahunga aha bwogi bw'embanda, obujege bwabo bwabarugiramu obumanzi bw'endashana, n'amahe g'abanyamahanga bagakinigya. 35Nangu n'abakazi bahimbulirwa ababo ababaire bafire. Abandi bakaterwa enkoni ez'okubaita, bayanga kuganyirwa, baije bashobore kuhimbuka bakabona oburora oburungi kushaagaho. 36Abantu abandi bakaterwa kubi, bajangurwa; nangu n'empingo zabagyaho, babanaga jela. 37Bakabateza amabaare, babagutuza emishumeno, bajwara emiguta y'entaama n'embuzi, baba banaku kwo, babona enaku ezibi babashasa, 38ensi yabanuga, babungira omu marungu n'omu mabanga, batura omu mpako n'omu bihokoima omw'itaka okuzimu. 39Aba bona n'orwo okwesiga kwabo kwababonesize obushongore, ebyo Ruhanga yaragaine tibabiboine. 40Kuba ichwe akashangwa yatutekatekeire ebirungi kushaagaho. Akagonza ichwe hamoi na bonene katunhindurwa bagorogoki omu kaanya kamoi.

will be added

X\