ABAHEBURANIA 10

1Amateka ga Musa gakaba gakaba gali kinyumanyumi ky'ebirungi ebilikwija, mara kandi tigalikwoleka kurungi myemere ya birungi ebyo. Ebitambo eby'Amateka galikuragira bitambwa orubelera omwaka aha gundi. Kyonkai Amateka ago abalikugakwata tigalikushobora kubahindura bahikilire. 2Kitali kityo ebitambo ebyo byakuba bitakalekeraga kutambwa? Abafukamiraga Ruhanga kabakuuba bahasiliirwe limoi likamara, bakubaire batakimanya bufu. 3Kyonkai ebitambo ebi bitwijukya obufu omwaka aha gundi. 4Nikiguma obwamba bw'enumi n'empaya kwiza amafu. 5Aha rw'ekyo ka Kirisito yaizire omu nsi egi akagamba ati, «Tokendaga bitambo na bihongo, shana inye okantunga omubili. 6Ebihongo by'okwokibwa n'ebihongo by'enyatano y'amafu, nabyo tobishemelerwa. 7Nirwo nagambire nti, ‹Waitu Ruhanga, leba naizire kukora ekyo iwe olikwenda,› nk'okwo mpandikirweho omu mpapuro z'ekitabo.» 8Obubere akagamba ati, «Ebitambo n'ebihongo, n'ebihongo by'okwokibwa n'ebihongo by'enyatano y'amafu tokabyendaga anga kubishemelerwa.» Ebi manya bitambwa aha rw'okuragirwa Amateka. 9Yashuba yayongeraho ati, «Leba naizire kukora ekyo iwe olikwenda.» Ebitambo ebya karai akabichwa, yataho ekitambo ekihya. 10Kirisito ayakozire ebyo Ruhanga alikwenda, omubiligwe gukatambwa ekitambo limoi lyonkai, n'iwe yatusingiire akatuhindura batakatifu. 11Kandi buli mukuhani naragirwa kwemelera omu mabona ga Ruhanga buli kiro natamba ebitambo byonene byonene ebitakwiza mafu n'akake. 12Kyonkai orwo Kirisito yatambire ekitambo kimoi kushai eky'amakiro gona kwatilira amafu, akasingira aha bulyo bwa Ruhanga, 13yashuba yaikara alindiliire ababishabe kabahinduka katebeke k'okuhumuzaho ebilenge. 14Orwo yatambire ekitambo kimoi kyonkai, ab'akuhindura bahikilire nirwo yabahindwire bagorogoki ebiro byona . 15Byonene ebyo, Mwoyo Mutakatifu n'iwe mujulizi wabyo ahali ichwe; kuba kayamazire kugamba ati, 16«Amakiro ago kagalihwa, ndikora nabo endagano egi: Omu mitima yabo nditekamu Amateka gange, ngahandike omu magezi gabo.» 17Ruhanga nashuba nagamba ati, «Amafu gabo n'ebikorwa byabo ebibi tindibiijuka rundi.» 18Ebi kabiragaruliirwe, taliho kitambo kyona kyona kya nyatano ya bufu. 19Barumuna bange, nitwesiga obwamba bwa Yesu okwo bulitutahya ahatakatifu. 20Wenene akatutemera omuhanda oguhya, omuhanda gw'oburora, orwo yarabire omu rutimbe, nikwo kugir'oti orwo yayehindwire muntu. 21Mara n'iwe Mukuhani Muhango omugeleezi wa Rwensinga ya Ruhanga. 22Tumugobe n'omutima gulikwera n'obwesige nyantayuga, tutaina kabi kona kona mu mwoyo, n'emibili eyogire amaizi garungi. 23Tugume twebugire eshubi yaitu tutalikutengeeta, kuba Ruhanga ayatushubiize ebyo aba mwesigwa. 24Tumanyangane, tutekanganemu ekihika ky'okugonzangana n'okugira ebigiro birungi. 25Tutalekera kuterana nk'okwo abandi bamanyiire kuterana, shanasi tutekanganemu ekihika tugendelere kugira tutyo. Nimubona n'okwo ekiro ky'Omukama kili haihi. 26Katulikuba twamanyire amazima tukashuba tukafakaza ekyekundo, ekitambo ky'okwatilira amafu nikiba kitakiliho. 27Aho nitusigara tulindiliire eiramu elilikutinisa, n'omuliro gulikurabagira ogulikwija kwokya abashengi. 28Omuntu ayachwa Amateka ga Musa ogwo bamwita batamuganyiire orwo hamara kubaho obujulizi bw'abantu babili anga bashatu. 29Lero aho nimulenga muti omuntu alikwanga bwanga Omwana wa Ruhanga, akahagaza obwamba bw'endagano obwamurokoire, akajuma na Mwoyo omugizi w'ekisha, talibona kibonabonyio ekili kibi kushaaga? 30Ruhanga nitumumanya ayagambiire ati, «Okwehoora kuba kwange, n'inye ndyehoroza.» Yashuba ati, «Omukama aliramura eihangalye.» 31Ihano elilikutinisa omuntu kuramurwa Ruhanga asingire. 32Orwo Yesu yabakyanwire mwijuke ebiro bya mbere: mukashasha mwayemera ebiyengo; 33orundi babajumaga omu maisho g'embaga mara babakora kubi, orundi babashasa n'abandi ababonaga enaku nk'ezo. 34Aha rw'okuba mwagiliraga abafungwa ekisha, mushemelerwa kubona ebyanyu nibabibaaka rwamani, enshonga mukashangwa nimumanya okwo mwina eitunga elilikushagaho oburungi mara elitali lya kuhwaho. 35Aha rw'ekyo mugume n'obwesige, obwesige bugira emperwa mpango. 36Nimwetaga kugira obwegumisiliza, mwije mubone kukora ebyo Ruhanga alikwenda, nirwo mulitungwa ebyo yaturaganisize. 37«Akaanya akasigaireyo kagufi, kandi Ruhanga alikwija talikwija kukelererwa. 38Kyonkai omugorogoki wange okwesigakwe kulimugiza oburora; nawe k'alitina akashubanganayo aho tindimushemelerwa.» 39Nawe ichwe t'ichwe tutiina tukashubanganayo tukasiliika. Ichwe twina obwesige mara nituhyahyanira emyoyo yaitu.

will be added

X\