ABAGALASIA 6

1Barumuna bange, k'omuntu aragwa omu ntambara, inywe abalikuhaburwa Mwoyo mumuhabuze obufura. Murayelinda nainywe mutakulengesibwa. 2Mujunangane, mube nikwo muhikya mutyo eiteka lya Kirisito. 3K'omuntu arayelenga kuba muntu w'omugasho, okwo ataina kwo ali, nayebeiya. 4Buli muntu naragirwa kweramura emigilireye, aho k'araba aina enshonga y'okwetutumura ayetutumure omuli wenene wenkai, atetutumulira ahali mutahiwe. 5Nobona buli muntu aliragirwa kwetwalira omugugugwe. 6Omwegesibwa w'ekigambo kya Ruhanga ajunise omwegesawe ebye byona. 7Mutakulembwa; Ruhanga tashekelerwa, ahakuba eky'omuntu abiba nikyo ashuba akagesha. 8Alibiba eby'obunyama aligesha obujunde bwabwo. Kyonkai alibiba Mwoyo alimugeshamu oburora obutalihwaho. 9Okukora kurungi kutatusinda, enshoga katutananuukirwe orwo ekirumo kiligoba twagesha. 10Aho kityo orwo twina obushango, abantu bona tubakolere kurungi, nawe okukiraho abo tuli b'omutungo gumoi omu kwikiliza. 11Mubone okwo enyuguta ezo ndikubahandikira n'omukono gwange zili zihango. 12Aho abalikwetungunika aha rw'enshonga y'ebinyamubili nibo balikubagimba kamutahirirwa, nibakora batyo enshonga nibanga batakugingizibwa aha rw'omusaraba gwa Kirisito. 13Nangu n'abalikutahirirwa tibalikuhikya Mateka. Bonene nibagonza kubatahiri bashube babakoleeze aha rw'okubatahiri. 14Kyonkai ahali inye nikikabure kwetungunika, shana nyebuge omusaraba gw'Omukama waitu Yesu Kirisito. Aha rw'enshonga y'omusaraba ogwo, inye omu bwange ensi ngibona nk'eyanfireho, kandi nanye nkagifaho. 15Kwaba kutahirirwa anga kutatahirirwa ti kigambo. Ekikuru omuntu kuhinduka kitondwa ekihya. 16Kandi bona, niyo Isiraeli ya Ruhanga, abalikukwata eiteka eli, batungwe emilembe, bagilirwe n'obuganyizi. 17Kwema mbwenu omuntu n'omoi atakunyita kubi; aha rw'enshonga nyina enkoju za Yesu aha mubili gwange. 18Barumuna bange, omugisha gw'Omukama waitu Yesu Kirisito gube nainywe. Amina.

will be added

X\