ABAGALASIA 5

1Kirisito akatuchungura twabona obwegeleere. Aha rw'ekyo mwemelere muhamisize entege, mutakugaruka mu nkomo ya bwiru. 2Mbwenu inye Paulo, nimbagambira: Kamurakunda bakabatahiri, Kirisito taina kyo arabagasira. 3Buli omoi alikukunda kabamutahiri nshube mwomesheze okwo alikuragirwa kukwata Amateka gona. 4Inywe abalikwitanira kukora okwo Amateeka galikuragira ngu mube bagorogoki nimwetaanura ahali Kirisito; mwataanukaine n'ekisha. 5Kyonkai ichwe, aha rwa Mwoyo n'aha rw'okwesiga kwaitu, tutegeleize n'eshubi okwo tulihindurwa bagorogoki. 6Katuraba tujwangaine na Kirisito, okutahirirwa anga okutatahirirwa tikukwete kantu, shana okwesiga okwinamu engonzi. 7Mubaire nimukora kurungi. Mbwenu alikubahimbira mutakwata amazima n'ohai? 8Ruhanga ayabesire tiwe alikubohya. 9Nobona eitumbyo like litumbisa engano yona. 10N'inyesiga Ruhanga okwo mutakiiliza bindi ebitali byange. Araba nabaita kubi, arab'ohai, arakwatwa omushango. 11Barumuna bange, kyonkai kandi inye, kandaba nkyagamba kamutahirirwa, kubaki nkyagingizibwa? Kabyakubaire bityo, aho orwo narangire okwo Kirisito yabambirwe aha musaraba ekyo tikyakulesire mwaga. 12Kyakugasire, abo abalikubatamu oruchuku bagende beshumure! 13Barumuna bange, muketwa kubona obwegeleere. Kyonkai obwegeleere bwanyu butaba bushango bwa kwitanira mairu g'omubili. Ekiliho mujunangane nimugonzangana. 14Ahakuba Amateka gona nigagobeshelezibwa ekigambo kimoi, kiti, «Ogonze mutahi wawe nk'okwo iwe olikwegonza.» 15Kyonkai kamuragyaho mukarumangana, mukanenangana, muramanya mutakwitangana. 16Nimbagambira, Mwoyo mube niwe muhondera. Muleke kushemelerwa amairu g'omubili. 17Nobona amairu g'omubili tigashobokeranwa na Mwoyo, n'ebyo Mwoyo ayenda tibigendanwa na mairu ga mubili. Mwoyo tashobokerwangana na mairu ga mubili. Aho nainywe nimuba mutakikora byomwakwenzire. 18Kyonkai kamurahaburwa Mwoyo, aho Amateka tigakibageleera. 19Eby'amairu g'omubili gakoza nibimanyikage: Obusiyani, obuhwanshoni, okwegomba eby'obusiyani, 20kufukamira ebihuuku, okuroga, enobi, endwano, eibuba, ekiniga, okweyenda, amaiko, okurwanira omu bisimba, 21ekiisho, etamiiro, omururu n'ebindi nk'ebyo. Inye nimbatatira nk'okwo nabatatiire orwa mbere, okwo abalikukora batyo tibalisika bukama bwa Ruhanga. 22Ebiraba bya Mwoyo ziba ngonzi, ebyera, emilembe, obwegumisiliza, obufura, oburungi bw'omutima, obwesigwa, 23obuchulezi, okwetanga; ebintu nk'ebi taliho Mateka gabitanga. 24Kandi abali ba Yesu Kirisito obunyama bwabo bakabubambijanyia n'emize yabwo n'amairu gabwo. 25Katuraba tuli barora omu mani ga Mwoyo, ahonu tuhondere Mwoyo. 26Tuleke kwebeiyabeiya, kunigazangana n'okuchubirangana.

will be added

X\