ABAGALASIA 4

1Ningamba nti: Omusika orwo aba akyali mwana taina ky'akiza mwiru, n'orwo eitunga lyona aba ali mukama walyo. 2Aba akyali omu mikono y'abalezi, n'eitunga liba likyali omu mikono yabo balikwasire kuhika kiro ekyo ishe yasigire yaragira. 3Naichwe kutyo, orwo twabaire tukyali baana bato twabaga bairu b'amasitani agatwara ensi egi. 4Nawe k'obukiro bwagobire Ruhanga yatuma Omwanawe, Omwanawe ogwo akazarwa omukazi, mara nawe yaragirwa kuhondera Amateka, 5kuchungura ababaire nibatwarwa Amateka tubone kuhinduka baana. 6Ahakuba muli baanabe. Ruhanga akatuma Mwoyo wa Mwanawe omu mitima yaitu, akaija nayeta ati, «Aba! Tata!» 7Kityo omu mani ga Ruhanga iwe tokili mwiru, wabaire mwana, kandi k'oli mwana aho oli musika wa Ruhanga. 8Eirai orwo mutamanyaga Ruhanga mwabaga bairu ba baruhanga abatali ba mazima. 9Kyonkai mbwenu orwo mwamanyire Ruhanga, anga nti Ruhanga wenene yabamanyire, mwakushuba mugaruka mutai aha michwo etaina kwo eli eya katozi? Nimugonza kushuba kuba bairu bayo? 10Nimumanya ebiro, n'emyezi, n'ebirumo, n'emyaka! 11Nintina, ebyo nabakoleire amani gange gakafa bushai. 12Barumuna bange, nimbatagiliza munshushe, kuba nanye mbashusiire. Timwankozire kubi. 13Nimumanya okwo orwo nabarangiire evangeli elya mbere ni kuba nkaba ndwaire. 14Kyonkai n'orwo kili kityo okurwara kwange kukaba kilengeso ahali inywe. Kandi timwanjumire anga kungaya. Mukantora oti ndi mumalaika wa Ruhanga, oti ndi Yesu Kirisito. 15Mukaba mushemeleirwe! Mbwenu kandi mubaireki? Inye nimbajulira okwo rulinya, kuba kyabaire nikishoboka, mwakwenonkoiremu n'amaisho mugampa. 16Mbwenu kambagambire amazima naba mubisha wanyu? 17Abantu abandi nibezora kubagonza muno, kyonkai omugendelero gwabo ti gurungi. Nibagonza kubanyihyaho, ngu mwije mubagonze nk'okwo bonene bagondize inywe. 18Rwona rwona okugonzibwa kuba kurungi, nangu kutaba orwo ndi hamoi nainywe, kyonkaisi mugonzibwe aha rw'ebirungi. 19Twana twange, mulebe mushubire mwanshasa nk'omukazi alikurumwa kuhika orwo mulishobokerwa Kirisito. 20Nakugondize kuba ndi hamoi nainywe mbwenu aha nkahinduramu eiraka, aha rw'okuba mwanshobeza. 21Mungambire inywe abalikwegomba kutwarwa Amateka, isi ebyo Amateka galikugamba timulikubihulira? 22Kuba kikahandikwa okwo Aburahamu yabaire aina abaana b'abojo babili, omoi namuzara aha muzana, ondijo namuzara aha mukazi omwegeleere. 23Omwana w'obwojo w'omuzana omu mani g'omubili. Kyonkai omwana w'obwojo ow'omukazi omwegelere akazarwa aha rw'enshonga y'endagano. 24Egi migambire: Abakazi aba bombili ndagano ibili. Endagano emoi neruga aha Ibanga lya Sinai, netabukwamu abairu; niwe Hagari. 25Mbwenu Hagari niwe Ibanga lya Sina omuli Arabia, niwe omoi na Yerusalemu eya kanya aka, aha rw'okuba wenene n'abaanabe bali omu bwiru. 26Kyonkai Yerusalemu ey'oruguru egyo y'obwegeleere, mara ogwo muzaire, ni nyinabantu. 27Nobona kikahandikwa kiti, «Shemelerwa iwe mugumba atazara; shanduka ogire ebyera iwe atarumwa kuzara; ahakuba omukazi agungirwe azara abaana bangi kushaga omukazi atagungirwe.» 28Mbwenu ichwe abali baana nka Isaka, tuli baana b'endagano. 29Kyonkai nk'okwo omu biro bilinya olinya ayazairwe omu mani g'omubili yagingiize ayazairwe omu mani ga Mwoyo, na mbwenu nikwo bili. 30Isi Ebihandiko Bitakatifu nibigamba bitai? «Tambya omuzana n'omwanawe, kuba omwana w'omuzana talikwija kusika na mwana wa mukazi omwegeleere.» 31Kityo barumuna bange, tituli baana ba muzana; tuli baana b'omukazi omwegeleere.

will be added

X\