ABAGALASIA 3

1Inywe Bagalasia abalenga! N'ohai abarogire? Titwabagambiire etali shelekwa okwo Yesu Kirisito yabambirwe aha musaraba? 2Leka mbabaze eki kyonkai: Okugobesheleza Amateka nikwo kwababonesize Mwoyo, anga mukamubona aha rw'enshonga y'okuhulira mukaikiliza? Mwaba balenga mutyo? 3Mukabanza mwina amani ga Mwoyo, mbwenu mwayenda kwemalira? 4Obushasi obwo obungi butyo obwo mwayegumisiliize bubafere bushai? 5Ruhanga abaha Mwoyo, akabakolera n'eby'amani, ebyo abikora aha rw'enshonga inywe kuhikya Amateka anga aha rw'enshonga mukahulira mwaikiliza? 6Aburahamu akesiga Ruhanga, okwesigakwe kwamurugiramu okuboneka okwo ali mugorogoki. 7Kityo mubone okwo abantu abaina okwesiga nibo baba baana ba Aburahamu. 8N'Ebihandiko Bitakatifu bikabona karai okwo Ruhanga alihindura Abanyamahanga babe bagorogoki aha rw'enshonga y'okugira okwesiga. Ebihandiko Bitakatifu ebyo bikanguha byatona Aburahamu evangeli nibigamba biti, «Omuli iwe nimwo amahanga gona galiherwa omugisha.» 9Kityo abantu abaina okwesiga baberwa nka Aburahamu, ayabaire aina okwesiga. 10Kyonkai abalikwegamira okuhikya Amateka abo baraamwa; nobona kikahandikwa kiti, «Nakaraamwe wena aliba atahikize byona ebihandikire omu kitabo ky'Amateka.» 11Mbwenu kili aha mushana, «Amateka tigahindura muntu kuba mugorogoki ahali Ruhanga; enshonga omugorogoki okwesigakwe kulimugiza oburora.» 12Kyonkai okwesiga tikwegamire aha Mateka, Manya Ebihandiko Bitakatifu nibigamba biti, «Alihikya eby'Amateka garagiire alirora.» 13Kirisito akatuchungura aha muraamo ogwo twaleteirwe Amateka, orwo kyahandikirwe kiti, «Alikahanikwa aha muti aliba ali muraamwa.» 14Kityo omu mani ga Yesu Kirisito omugisha ogwa Aburahamu gukagoba Abanyamahanga, okwesiga kwaitu kubone kutubonesa Mwoyo owo Ruhanga yaragaine. 15Barumuna bange, kangambe omu migambire ey'abantu. Omuntu kumara kuhamisa omurago gwa wenene, taliho n'omoi ayakwiza anga ayakugira ekyo yayongeraho. 16Mbwenu Aburahamu na baijukurube baina endagano ezo bahairwe. Ebihandiko Bitakatifu kabilikugamba biti, «Abaijukuru» tibilikuba nibigamba bantu bangi; nibiba nibigamba, «Omwijukuru omoi,» owo bilikugira biti, «Na mwijukuru wawe,» niwe Kirisito. 17Ekyo ndikugamba niky'eki: Amateka kwema gagiireho emyaka 430 yahingwireho, kyonkai tigalikwiza ndagano eyo Ruhanga yashangirwe yahamisize, kugir'oti endagano tekiina nshonga. 18Amateka kagaraba nigo gabonesa omuntu obusika, obusika obwo tiyakushuba kububonesibwa ndagano. Kyonkai Ruhanga akaha Aburahamu obusika obwo aha rw'endagano egyo. 19Mbwenu aho Amateka gaki? Gakagyaho ahanyuma aha rw'enshonga y'entambara, kuhika aha kwija kwa mwijukuru wa Aburahamu ayaraganisiibwe. Amateka ago gakaletwa abamalaika, bagarabya aha muntu. 20Mara k'omuntu omoi aba nayemalira, omuntu nk'ogu ow'okurabwaho tayetagwa. Mbwenu okwo kili Ruhanga nayemalira. 21Amateka nigasingangana n'ebyo Ruhanga yaragaine? N'akati! Amateka agashangirwe gatairweho kagaraba gagilize omuntu oburora, mpaho aho Amateka gonene ago gakuhindwire omuntu kuba mugorogoki. 22Kyonkai Ebihandiko Bitakatifu nibigamba okwo ensi yona obufu bukagikiza amani, abesiga Yesu Kirisito babone kutungwa ebyo baraganisiibwe aha rw'enshonga y'okumwesiga. 23Kyonkai okwesiga kutakabaireho, twakomwaga Amateka, kulemwa kugoba orwo okwesiga okwo twinakwo kwakushurwirwe. 24Kityo Amateka gatulindaga kuhika orwo Kirisito yaizire, aho okwesiga kubone kutuhindura bagorogoki. 25Mbwenu orwo okwesiga kwabaireho titukyayetaga kulindwa Mateka, 26aha rw'enshonga okwesiga kwanyu kukabashoboza kwetaba na Yesu Kirisito; aho inywena muli baana ba Ruhanga. 27Inywena mukabatizibwa kujwangana na Kirisito, mwajwangana nawe. 28Taliho Muyahudi atali Muyahudi, taliho mwiru anga mwegeleere, taliho mushaija anga mukazi, aha rw'okuba inywena mukajwanganira omuli Kirisito mwaba bamoi. 29Kandi kamuraba muli ba Kirisito, aho muli baana ba Aburahamu mara basika b'ebyo Ruhanga yaragaine.

will be added

X\