1 Emyaka ekaba ekeire 14, aho ngya Yerusalemu. Nkagenda na Barinaba, na Tito ntamusigiire. 2 Kwija kugenda ntyo nkashurulirwa. Aho mbonangana n'abakuru omu kyama mbabarulira evangeli eyo nabaire nindanga omu Banyamahanga. Nkakora ntyo ntaija nkaba narangire nkashanga ndangire obushai. 3 Nangu na Tito owo twabaire tuli hamoi, tiyagimbirwe kutahirirwa, n'orwo wenene yabaire ali Mugiriki. 4 Kyonkai hakaba haliho abegesibwa engobya abatutahiremu tutabamanyire kutunyomoza kumanya obwegeleere bwaitu obwo twinabwo aha rw'okuba hamoi na Kirisito. Bakaba bagendeleire kutuhindura bairu. 5 Titwabafireho n'akake, tubone kulinda amazima g'evangeli aha rwanyu. 6 Kandi ababaire nibasimwa kuba bantu b'ekitinwa, (okwo babaire bali, inye tibinkwete; kuba Ruhanga tagira kigonzi), ab'enshonga abo ndikugamba, tibaina kyobanyongeireho. 7 Shana ekiliho bakabona okwo Ruhanga yampaire omuruka gw'okurangira abatatahiliirwe evangeli, nk'okwo Petero yabaire ahairwe ogw'okugirangira abatahiriirwe. 8 Ayahaire Petero obushobora bw'okuba ntumwa y'abatahiriirwe, niwe wenene wenene ayahaire inye obushobora bw'okuba ntumwa y'abatatahiriirwe. 9 Yakobo, Petero na Yohana abazokaga kuba nyomyo, kababoine okwo Ruhanga yabaire antungire omugisha nk'ogwo, batukunda inye na Barinaba, batuha omukono gwa bulyo batukora omu buganja. Batwikiliza kugya omu batatahiriirwe, bonene bagya omu batahiriirwe. 10 Ekikuru bakatukomeleza katwijuka abaanaku; kandi ekigambo ekyo nanye nashangwa nkitaireho ekihika ninkikora. 11 Orwo Petero yaizire Antiokia nkamuhakanisa orubona, ahakuba akaba nasingwa. 12 Abo Yakobo yabaire atumire kababaire batakaizire, Petero yalyaga n'abanyamahanga. Orwo bamazire kwija yayenyurura yayegunga, yatina ekisimba ky'abakirisito Abayahudi abayendaga abakirisito abanyamahanga kutahirirwa. 13 N'Abayahudi abandi bayema nawe bayekoza obugobya, nangu obugobya bwabo obwo na Barinaba bwamukukumbirana. 14 Kanaboine okwo amazima g'evangeli batalikugahondera, nagambira Kefa omu maisho gabo bona nti, «Iwe n'orwo oli Muyahudi, k'olikukora nk'Omunyamahanga, otakozire nka Muyahudi, wakugimba otai Omunyamahanga kukora nk'Omuyahudi?» 15 Ichwe chwenene Abayahudi omu buzarwa bwaitu, tutali banyamahanga abafakare, 16 nitumanya okwo Amateka tigahindura muntu kuba mugorogoki. Okwesiga Yesu Kirisito nikwo kumuhindura mugorogoki. Nangu na ichwe tukesiga Yesu Kirisito. Ti Mateka agatuhindwire bagorogoki. Amateka tigaina kutuhindura bagorogoki. 17 Kyonkai katuraba nitufa nitwosha kuhinduka bagorogoki aha rw'amani ga Kirisito, ichwe chwenene tukashangwa tuli bafakare, isi aho Kirisito aba mufakare? Ekyo nikikabure! 18 Kandabanza kwombeka buhya entwaza z'Amateka ezo nakambwire, aho mpaho ndaba ninchwa Amateka. 19 Nobona inye aha bikwete Amateka tigakinkomire. Amateka nkataana nago, mbone kurora ndi wa Ruhanga. 20 Nkabambwa hamoi na Kirisito. T'inye ndikurora; Kirisito niwe alikurora omuli inye. N'oburora obwo ndikurora nkyali omu nsi, nindolera aha kwesiga Omwana wa Ruhanga ayangondize, akamara akehayo aha bwange. 21 Ekisha kya Ruhanga tindikugira nti tikibayo; Amateka kagaraba gahindura abantu kuba bagorogoki, aho mpaho Kirisito akafera bushai.
