ABAEFESO 6

1Inywe bana, buragirwa bw'omukirisito kuhulira abazaire banyu, mara eki kisaine. 2«Okunire sho na nyoko» (nigwo muhango gwa mbere ogwinaho endagano), 3«Nirwo oligoshoka okameleera omu nsi.» 4Na inywe baishe bantu mutagiza bana banyu ntimambi kubanigaza. Mubalere n'okubegesa nk'okwo Omukama alikugonza. 5Inywe bairu muhulire bakama banyu ab'omunsi omu. Mubatine nimuchundwa, mugire omutima gutaina bugobya, nk'okwo mulikuhulira Kirisito. 6Mutabahulira orwo baliho okw'obon'oti nimugonza kushemeleza abantu, shana mube bairu ba Kirisito, nimukora ekyo Ruhanga alikwenda nibibaruga aha mutima. 7Mubakolere n'omutima gurungi oti nimukolera Omukama mutalikukolera bantu. 8Mumanye okwo ekirungi kyona kyona ekyo kaishe muntu akora, Omukama alishuba akimurongore kyonene, alikaba mwiru anga mwegeleere. 9Kandi inywe bakama babo, nainywe mube nikwo mubatwaza, muleke kubatinisa, mumanye okwo Mukama wabo mara Mukama wanyu asingiire omw'iguru, mara tagira kigonzi. 10Eky'enzindo mugume mujwangane n'Omukama nimujunwa amanige. 11Ebikwato ebyo Ruhanga alikubatunga mubijware byona, nirwo mulishobora kwemera emitego ya Sitani. 12Nobona titulikurashana na bantu, niturashana n'abatwazi, n'abanyamani, n'abatwazi b'ensi egi ey'omwilima, kandi niturwana n'amahe g'amasitani agatalikuboneka. 13Aha rw'ekyo ebikwato by'endashana ebyo Ruhanga alikubatunga mubikwate byona, nirwo mulibona kumanzara aha kiro ky'endashana. Kamuliba mwamazire endashana mubere kimoi emanzi ezitalikutengeta. 14Mwemelere nk'emanzi, omukandara gwanyu omu nyugunyu gabe mazima, omu kifuba obugorogoki mube nibwo mujwara nk'engabo, 15kandi okwetegeka kurange evangeli y'emilembe, ebyo bibe nibyo biba biratwa byanyu. 16Kandi kwongera ahali ebyo mukwate engabo y'okwesiga, egyo niyo murakoza kuraaza emyambi yona y'omubisha elikurabagira nk'omuliro. 17Okurokoka kwanyu niyo helumeta, kandi ekigambo kya Ruhanga niyo mbanda eyo Mwoyo Mutakatifu alikubatunga. 18Mushome enshara buli kanya nimwejunisa Mwoyo Mutakatifu. Mushome enshara eza buli ngeli mara mutake. Murare aha nkeera obuzira kunanukwa kulemwa kugoba aha ndekelero, mushabire abakirisito bona, 19nanye kwakwo munshabire mbone agagamba n'obumanzi, ndange ekyebisho ky'evangeli. 20Inye mba mubaka w'okuranga evangeli, n'orwo kanya aka ndi jela. Munshabire nshobore kugiranga n'obumanzi, ngirange okwo ndagiirwe kugiranga. 21Titiko murumuna wange omugonzibwa, mara omukozi wange omwesigwa omu mulimo gw'Omukama, n'iwe arabagambira byona mushobore kumanya okwo ndi n'ebyo ndikukora. 22Nikyo ndikumutwekera okwo, kamumanya okwo tuli, kandi na wenene abagaruremu akoyo. 23Ruhanga Isheichwe n'Omukama Yesu Kirisito basinge batunge abakirisito barumuna baitu emilembe n'engonzi hamoi n'okwesiga. 24Bona abagonza Omukama waitu Yesu Kirisito engonzi ezigobeleire, batungwe omugisha.

will be added

X\