ABAEFESO 4

1Inye omufungwa aha rwa Kirisito, nimbatagiliza murore oburora obulikugendanwa n'omweto gwanyu. 2Buli kaanya mugire obwetohya, obufura, obwegumisiliza, mutekanirangane nimugonzangana. 3Enkomo y'emilembe ebahe okwitanira okwikara muli bamoi omuli Mwoyo. 4Omubili guba gumoi na Mwoyo ab'omoi, nk'okwo eshubi y'omweto gwanyu eb'emoi. 5Omukama ab'omoi, okwikiliza kuba kumoi, okubatiza kumoi. 6Ruhanga mara Isheichwe chwena omoi, n'iwe akira abantu bona, akora omu bantu bona mara asingiire omuli bona. 7Buli muntu akagilirwa ekisha kuhondera okwo Kirisito yagondize kukimugilira. 8Aha rw'ekyo bagamba bati, «Orwo yatembire eiguru muno, akatwara eihe ly'endore, yatunga abantu amatungwa.» 9(Okugamba oti «Akatemba,» nikwo kugambaki kakutali kugir'oti akabanza yasongoka okuzimu? 10Yesu Kirisito ayasongokire n'iwe wenene wenene ayatembire omw'iguru eiguru muno, abone kusingira omunsi yona.) 11Wenene n'iwe yatungire abantu emyoga. Abandi akabahindura ntumwa, abandi barangi, abandi barangi b'evangeli, abandi bashumba mara begesa. 12Omu kugir'atyo Kirisito akagonza kutekateka abakirisito kabashobora kugobesheleza oburagirwa bwabo omu kwombeka omubiligwe. 13Kityo aho turashobora kugira okwikiliza kumoi, n'Omwana wa Ruhanga tumumanye emimanyire emoi, tulemwe tube bagorogoki bwoli nk'okwo Kirisito ali mugorogoki bwoli. 14Aho turaba tutakili bana ba kuchundaigurwa bilikwegesibwa eby'okutuchundaigura nk'omuyaga, nibitwihy'oku nibitunag'oku. Ebilikwegesibwa nk'ebyo by'abantu b'obwenge abaina akalyo k'ebishuba. 15Ekiliho katuragamba amazima mara okwo nitugonzangana turarondora Kirisito omuli buli kantu, wenene n'iwe mutwe gwaitu. 16Omu bushoborabwe omubili gwona nigujwangana, nigujwanganisibwa buli rugingo, mara buli rugingo niruha omubili ogwo amani kuhondera omulimo gwarwo oguli kwagwo. Kityo aho engingo z'omubili gumoi nizigonzangana n'okwombeka omubili ogwo, mara n'omubili gwonene nigukura. 17Ekigambo eki ninkigamba malize ninjuliza Omukama: Mulekere kurora emirolere ey'Abanyamahanga, abatekeleza ebya katozi. 18Amagezi gabo gakabundwa omwilima; obutamanya bwabo obulikuzarukana omu bugumangani bw'emitima yabo bukabaihya ahali Ruhanga. 19Bagumangaine bahwera omu busiyani, bajanga emijangire eya buli ngeli. 20Kyonkai inywe ebyo tibyo mwamanyire ahali Kirisito! 21Nikwo, mukamuhuliza bamubegesa, mwamanya okwo Yesu ogwo ali w'amazima. 22Kityonu mulekere emirolere yanyu ey'eirai, obuntu obwa karai mubujure, aha rw'okuba obwo buhabisibwa obunyama bwabwo obububeiyabeiya. 23Emyoyo yanyu n'amagezi ganyu bihinduke bihya kakimoi, 24mube bantu abahya, mushushe Ruhanga, mara mumanyikire aha mirolere mirungi egorogokire mara emitakatifu kwokwokwo. 25Ahonu mulekere ebishuba, omuntu na mutahiwe mugambe amazima, ahakuba ichwe chwenene tuba ngingo z'omubili gumoi. 26Kamuranigara mutafakara, eizoba kugya kutobera mube mutakiina kiniga. 27Sitani mutamuha kaanya. 28Ayaibaga atakiiba rundi. Hakili achwazikane, akore emilimo n'obwesigwa, nirwo arabona kujuna abetaage. 29Mutakufumora fumoro mbi. Kamuragyaga kugamba mugambe ekigambo ekili kirungi ekilikushoboka kugasira emyoyo, aho n'abalikukihulira babone kutungwa omugisha. 30Mutakujunaza Mwoyo Mutakatifu wa Ruhanga, aha rw'okuba mukagiibwaho akabonero ka wenene, nirwo mulibona kurokoka aha kiro ky'okuchungurwa. 31Mulekere obushanshame, obukatili, ekiniga, enkungana, okugeyangana, kandi mulekere n'orwango orwa buli ngeli. 32Mugilirangane obufura n'obuganyizi, mugarulirangane nk'okwo Ruhanga yabagaruliire aha rwa Kirisito.

will be added

X\