ABAEFESO 3

1Inye Paulo omufungwa wa Yesu Kirisito ninturwa inywe, Banyamahanga; 2Nindenga nti mwahuliire okwo ndi musigire w'ekisha kya Ruhanga aha bwanyu, 3okwo ekyebisho nakimanyiire omu kushurulirwa, nk'okwo nabandize kubahandikira omu bigambo bike. 4Kamurashoma ebi muramanya emishobokelerwe eyo ndikushobokerwa ekyebisho kya Kirisito 5eky'abantu batamanyisiibwe mu mizarwa endijo nk'okwo bir'ebi kishuruliirwe entumwaze ezitakatifu n'abarangi omu mani ga Mwoyo. 6Nikwo kugir'oti Abanyamahanga basika batahi baitu, ngingo z'omubili gwonene gwonene, kandi nabo aha rw'okurangirwa evangeli, ebyo Ruhanga yaragaine nibabitungwa omu mani ga Yesu Kirisito. 7Kuhondera amatungwa g'ekisha kya Ruhanga ekyo natungirwe omu mani g'obushoborabwe, leba nkahinduka murangi w'evangeli egi. 8N'orwo omu bakirisito ndi muke kushaaga bona, nkatungwa omugisha ogu: Kurangira Abanyamahanga eitunga lya Kirisito elitalengwa. 9Kandi n'okumanyisa abantu bona, bakashobokerwa ekyebisho ekyakashelekirwe akarai kona omuli Ruhanga ayatonzire ebintu byona. 10Mara omu kaanya aka mbwenu, omw'ikora ly'enteko, abakuru n'abatwazi b'omw'iguru bashobore kumanya obumanyi bwa Ruhanga obw'engeli zingi. 11Ruhanga akakora ekigambo ekyo kuhondera entegeka ya wenene ey'eirai lyona eyo agobesheleize omuli Yesu Kirisito Omukama waitu. 12Orwo twamazire kujwangana na Kirisito aha rw'owikiliza twina obumanzi n'obwesige kugoba ahali Ruhanga. 13Kityo nimbashaba mutashuburugukwa aha rw'enshonga y'obushasi obwo ndikubona aha rwanyu; kanshashe mubone kugasirwa. 14Niyo nshonga nimbandama omu mabona ga Isheichwe, 15entabuko ya buli ka omw'iguru n'omu nsi. 16Nintaka ahali Ruhanga, nk'okwo ekitinwakye kili kingi, omu mani ga Mwoyo we asinge abatunge amagara omu myoyo yanyu mube manzi. 17Kandi na Kirisito aikare asingiire omu mitima yanyu aha rw'okwesiga kwanyu. Alikasinga inye nimushaba mugire emizi mara mugume omu ngonzi 18mushobore kushobokerwa hamoi n'abakirisito abandi bona obukiika n'oburaiburai, n'obwemi n'oburaiburai bw'okuzimu, 19mumanye n'engonzi za Kirisito ezishaaga obumanyi bwona, mushobore kwijurwa Ruhanga. 20Ruhanga omu bushoborabwe obulikukora omuli ichwe, alikushobora kukora buli kantu akashaaga ebyo tushaba n'ebyo tutekeleza, 21ahabwe ekitinwa omu nteeko n'omuli Yesu Kirisito amakiro gona, eirai lyona. Amina.

will be added

X\