ABAEFESO 2

1Akabagiza oburora, kuba mukaba mufire aha rw'enshonga y'entambara zanyu n'amafu ganyu 2ago mwakozire nk'ensi egi, nimuhondera omutwazi w'omu rwerwerwe, n'iwe mwoyo alikuha abataina muhuliro amani. 3Naichwe eirai aba tukaba tubalimu orwo twanulirwaga amairu g'omubili, tukarongotokera orwoyoyo rw'omubili n'amagezi, kityo twaba b'okunigalirwa omu butondwa bwaitu, nk'abantu abandi bona. 4Kyonkai Ruhanga omuganyizi muno, omu ngonzize ezingi muno ezo yatugondize, 5n'orwo twabaire tuli bafu aha rw'entambara zaitu, akatuhindura barora hamoi na Kirisito, ekisha nikyo kyabarokoire. 6Ruhanga akatuhimbulirana na Yesu Kirisito yatwikaza omw'iguru omu bushoborabwe. 7Ruhanga omu kukora atyo akagonza kutwoleka amani agatali ga kulengwa aha rw'engonzize ezo yatugiliire. Ebyo alibitwoleka makiro agalija. 8Aha rw'okwikiliza kwanyu mukarokorwa ekisha. Ekyo timwakyekoleire inywe nywenene; okurokoka kwanyu matungwa ga Ruhanga. 9Okurokoka kwanyu tikwarugire mu bikorwa byanyu, omuntu n'omoi atakwesiima. 10Ichwe tuli bitondwabye, akatutondera omuli Yesu Kirisito katukora ebikorwa birungi, ebyo Ruhanga yaragiire kwema karai, kuba nibyo tuta nitukora. 11Inywe Banyamahanga obubili, abo Abayahudi abeyeta abatahiriirwe bayetaga ┬źAbatatahiliirwe┬╗ (ekikorwa ekyo bakoza emikono aha mibili yabo) mwijuke okwo mwabaire muli eirai. 12Bukiro buli Kirisito mukaba mutamuliho. Mukaba muli bagenyi, mutalikubalirwa mw'ihanga lya Ruhanga elironkwa. Endagano zikaba zitabakweteho kantu. Endagano ezo zikaba zili aha byo Ruhanga yaraganisize eihangalye. Inywe mwaturaga omu nsi omu mutaina shubi mara mutaina Ruhanga. 13Kyonkai mbwenu omu mani ga Yesu Kirisito inywe ababaire eirai muli harai, obwambabwe bubailiize haihi. 14Kuba Kirisito n'iwe mirembe yaitu. Ichwe Abayahudi n'Abanyamahanga akatujwanganisa twaba omoi. Orukuta orwabaire nirututanurana, nibwo bwiko, akarukambura. 15Akachwa Amateka g'Abayahudi n'emihango yaho, n'emigenzo, agendeleire omu Bayahudi n'omu Banyamahanga kwihyamu eihanga limoi elijwangaine nawe, yaba nikwo aleta atyo emilembe. 16Orwo Kirisito yafeleire aha musaraba akachwa obwiko bw'Abayahudi n'Abanyamahanga. Akakoza omusaraba kubatonganisa, Abayahudi n'Abanyamahanga baba oti muntu omoi, mara yabagarura ahali Ruhanga. 17Kityo Kirisito kayaizire akaranga evangeli y'emilembe omu bantu bona. Yarangira inywe Abanyamahanga, orwo mwabaire muli harai na Ruhanga, yagirangira n'Abaayahudi ababaire bamuli haihi. 18Kirisito n'iwe alikutushoboza ichwena, Abayahudi n'Abanyamahanga kwija omu mabona ga Isheichwe twemirwemu Mwoyo omoi. 19Kityo timukili bagenyi anga bafuruki; mwabaire bamoi n'abakirisito kandi muli b'eka ya Ruhanga, 20eyombekire aha musingi gw'entumwa n'abarangi, aho Yesu Kirisito wenene ali ibare ly'epembe. 21Eibare elyo ly'epembe niho enju yona elikuteranira ekakura ekarugwamu Rwensinga Ntakatifu omu mani ga Ruhanga. 22Orwo mujwangaine na Kirisito nainywe nimwombekeranwa n'abandi bona omu mani ga Mwoyo mubone kurugwamu obusingiro bwa Ruhanga.

will be added

X\