ABAEFESO 1

1Inye Paulo, entumwa ya Yesu Kirisito aha rw'okwenda kwa Ruhanga: Nimbahandikira inywe bakirisito ba Efeso mara abesigwa abajwangaine na Yesu Kirisito. 2Ruhanga Isheichwe n'Omukama waitu Yesu Kirisito babatunge omugisha n'emilembe. 3Ahaisilizibwe Ruhanga mara Ishe Omukama waitu Yesu Kirisito, ayatungire emyoyo yaitu kaishe mugisha ogw'omw'iguru, aha rw'okujwangana kwaitu na Kirisito. 4Ensi etakatonzirwe, Ruhanga akashangwa yaturonkire katujwangana na Kirisito tukaba batakatifu enzira katalizi omu maishoge. 5Aha rw'engonzize, Ruhanga akaturonka katuba banabe omu kujwangana na Yesu Kirisito, nk'okwo yayenzire omu bweyendezibwe, 6ekishakye eky'ekitinwa ekyo yatugiliire kisingizibwe omu mani g'Omwanawe omugonzibwa. 7Yesu Kirisito akatuchunguza obwambabwe, yatugarulira n'entambara zaitu nk'okwo amani g'ekishakye gali, 8ekisha ekyo yatugiliire. 9Omu bumanyibwe bwona n'omu magezige gona, yatumanyisa ekyebisho ekyo yayendaga, nikyo yabaire agendeleire kugobesheleza omuli Kirisito. 10Entegeka egyo akashangwa nagonza kugigobesheleza orwo akaanya nyakabara kakugobire kushoroza ebitondwa byona, buli kitondwa omw'iguru n'omu nsi, Kirisito akaba Mukama wabyo. 11Ebintu byona bikorwa kuhondera entegeka ya Ruhanga n'okwo yaramura. Aha rw'enshonga y'omugendelerogwe, ogwo yakagendeleire kwema obubere nyabubere, Ruhanga akaturonka katuba bantube tukajwangana na Kirisito. 12Aho ichwe ababaire ba mbere kugira eshubi omuli Kirisito, tusingize ekitinwa kya Ruhanga. 13Nainywe kwakwo mukaba bantu ba Ruhanga orwo mwamazire kuhulira ekigambo ky'amazima, niyo vangeli eyabarokoire. Mukaikiliza Kirisito, aho Ruhanga yabataho akamanyiso k'okuba bantube orwo yabatungire Mwoyo Mutakatifu owo yabaire aragaine. 14Mwoyo Mutakatifu n'iwe mukwato gw'obusika bwaitu obwo Ruhanga yaraganisize abantube, mara eki nikimanyisa okwo Ruhanga alitunga abalibe obwegeleere nyakabara. Tusingize ekitinwakye. 15Aha rw'enshonga egi, kwema mpuliire okwo mulikwesiga Omukama Yesu n'okwo mulikugonza abakirisito bona, 16tindikulekera kubasiimira n'okubaijuka omu nshara zange, 17Ruhanga w'Omukama waitu Yesu Kirisito, Isheichwe ow'ekitinwa asinge abatunge Mwoyo, Mwoyo ogwo abahe obumanyi mara abashurulire mumanye Ruhanga ogwo. 18Abakyanure emitima mumanye eshubi eyo yabeteire, n'emigisha y'okutangaza eyo alikushuubiza abakirisito okwo eina amani. 19Mumanye n'okwo aina obushobora bungi obutalengwa omuli ichwe abalikumwesiga. Obushobora obu obuli omuli ichwe nibwo bwonene bwonene 20obwo yahimbwize Kirisito omu bafu akamara akamushuntamya aha bulyobwe omw'iguru. 21Ruhanga akakuza muno Kirisito yashaga abatwazi bona n'abaina obushobora n'abaina amani, n'abakama, mara yakira na buli ibara elikagambwa, ti mu bukiro obu obwa mbwenu bwonkai nawe n'omu bukiro obulija. 22Ebintu byona akabimuteka omu maguru, n'omu nteeko yamuhindura Mukama wa buli kantu. 23Enteko nigwo mubiligwe, nibwo buhikilirebwe, ebintu byona buli hantu bigorogoki aha rwa Yesu ogwo abindura atyo.

will be added

X\