ABAKOLOSAI 4

1Inywe bakama mukolere abairu banyu amazima. Mumanye okwo nainywe mwina Mukama wanyu omw'iguru. 2Mwikare nimushoma enshara obutalekera. Mushome enshara omutima mugutaire hamoi mara nimusima. 3Naichwe mutushabire Ruhanga atutunge obushango bw'okuranga ekigambo, niwe Kirisito ekyebisho ekyo banfungiire, 4mbone kukitoitora omu migambire eyo ndikuragirwa kugamba. 5Ab'aheru mubaturemu n'obwegendeleza, kandi n'omwanya mutagwita bushai. 6Efumoro yanyu eshemere, erungwemu akonyu, nirwo muramanya okwo murahorora buli muntu. 7Tikiko niwe arabagambira agange gona. Wenene ogwo ni murumuna waitu omugonzibwa, mukozi mwesigwa kandi mwiru mutahi waitu w'Omukama. 8Namubatwekera aha rw'omugendelero ogu gwonene gwonene, mushobore kumanya okwo tuli, kandi abagumise emitima. 9Namutweka na Onesimo murumuna waitu omwesigwa mara omugonzibwa, kandi nainywe ni murumuna wanyu. Barabamanyisa gona agalikufa kunu. 10Arisitariko, omufungwa mutahi wange nabakeisa, hamoi na Mariko mwihwa wa Barinaba (owo babagambiire okwo k'alija mumutore), 11na Yesu owo beta Yusito nawe nabakeisa. Aba nibo bonkai abakozi batahi bange Abayahudi abakirisito, abo twemire hamoi kukolera obukama bwa Ruhanga mara bammaramazire. 12Murumuna wanyu Epafurasi, omwiru wa Yesu Kirisito, nabakeisa, buli kanya nabaijuka muno omu nsharaze, mubone kuguma obutatengetana kandi mumanyire kimoi ebyo Ruhanga ayenda. 13Epafurasi inye nimujulira okwo abakoleire omulimo guhango hamoi n'aba Laodisea na Hierapoli. 14Luka, omutambi omugonzibwa, na Dema nibabakeisa. 15Munshulire barumuna baitu aba Laodisea, munshulire na Nimfa hamoi n'enteko y'omwa wenene. 16Kamuramara kushomerwa ebarua egi mugishome n'omu bakirisito b'enteko ya Laodisea. Kandi ebarua eraruga Laodisea nainywe mugishome. 17Mugambire Arikipo muti, «Oramanya okore kurungi omulimo ogwo Omukama yakukwasize.» 18Inye Paulo, ebishuro ebi n'inye ndikubyehandikira Muraijuka okwo ndi jela. Omugisha gw'Omukama gube na inywe.

will be added

X\