ABAKOLOSAI 3

1Ahonu kamuraba mwahimbukire na Kirisito muhige ebili omwiguru, mbali Kirisito ali, asingiire aha bulyo bwa Ruhanga. 2Mutekeleze ebili omwiguru, mutatekeleza bili mu nsi. 3Aha rw'okuba mukafa, mara oburora bwanyu bushelekire omuli Kirisito ajwangaine na Ruhanga. 4Orwo Kirisito, wenene ali burora bwaitu, aliboneka, nainywe kwakwo muliboneka nawe mwina ekitinwa. 5Ebiraba bili bintu by'ensi omuli inywe mubiite: obusiyani, obujanga, obunyama, amairu gabi n'okufukamira ebihuuku. 6Aha rw'enshonga y'emize egyo Ruhanga naija kunigalira kubi abashengi. 7Eirai ebyo byabaga byanyu orwo mwabikoraga. 8Kyonkai mbwenu mubilekere: Ekiniga, obushanshame, omutima gubi, okugeyangana n'okugamba kubi omu kanwa. 9Mutabeiyangana, nobona timukili kwo mwabaire muli, kandi n'ebyo mwakoraga mukabilekera. 10Mukaba bantu abahya, mwaba bahya orwo mwamazire kumanya Omutonzi wanyu mukamurondora. 11Aha rw'enshonga egyo, hataziza kubaho nshororo ya Muyahudi n'atali Muyahudi, omuntu atahiriirwe n'atatahiriirwe, omuntu agendeleire n'atagendeleire, omwegelere n'omwiru. Manyasi Kirisito niwe rumara gona, mara asingiire omuli bona. 12Ahonu orwo muli ndonkwa za Ruhanga, abatakatifu mara abagonzibwa, mube bantu b'embabazi, ekisha, obwetohya, obufura n'obutekani, 13mugumisilizangane, aragira ekigambo ahali mutahiwe mugarulirangane. Okwo Omukama yabagaruliire kutyo nainywe mugarulire. 14Kyonkai ekishaagire ebyo byona mugonzangane. Engonzi nizo zijwanganisa abantu bona bakagira obuchulezi obuhikilire. 15Mugire emilembe ya Kirisito omu mitima yanyu, nobona muketwa kuba mubili gumoi kamugira emilembe egyo. Kandi mube bantu b'esiimi. 16Ekigambo kya Kirisito kisingiire muno omuli inywe, mwegesangane n'okuhanangana nimukoza obumanyi bwa buli ngeli, muhoye ezaburi n'etenzi n'empoya z'edini emitima yanyu eijwire esiimi ahali Ruhanga. 17Ekyo murakakoraga kyona kyona, kibe kigambo anga kikorwa, mukikorega omw'ibara ly'Omukama Yesu, nimusima Ruhanga Isheichwe mumutaireho Kirisito. 18Inywe bakazi muhulire bashaija banyu nk'okwo Omukama alikugonza. 19Inywe bashaija mugonze bakazi banyu mara mutabagilira bukatili. 20Inywe bana, omuli byona mugire omuhuliro aha bazaire banyu, aha rw'okuba omuhuliro gushemelera Omukama. 21Inywe baishe bantu mutakwema kubi bana bataija bakagira rwetamwo. 22Abairu muhulire abakama banyu ab'omu nsi. Mara kutaba kubashemeleza aha maisho kushai, kibaruge aha mutima, mutine Omukama. 23Ekyo murakakoraga kyona kyona mukikorega nimukihya aha mutima, mukolere Omukama, mutakolera bantu, 24mumanye okwo Omukama alibarongora obusika. Manyasi nimukolera Omukama Kirisito. 25Omufakare alirongorwa ebibi byoyakozire, mara talibaho kigonzi.

will be added

X\