ABAKOLOSAI 1

1Inye Paulo, owo Ruhanga yagondize kamba ntumwa ya Yesu Kirisito, hamoi na murumuna waitu Timotheo, 2nituhandikira abakirisito mara barumuna baitu abesigwa abajwangaine na Kirisito, abali Kolosai: Ruhanga Isheichwe abatunge n'emirembe. 3Buli kanya nitusima Ruhanga, Ishe Omukama waitu Yesu Kirisito, mara nitubashabira. 4Twahuliire okwo mulikwesiga Yesu Kirisito, kandi nimugonza n'abakirisito bona, 5aha rw'eshubi y'ebyo mushubizibwe omw'iguru. Ebi mubaire mwabihulire omu kigambo ky'amazima, niyo vangeli 6eyo mwarangiirwe, nk'okwo eliyo neraba ebiraba mara nekura omu nsi yona, n'omuli inywe kutyo, kwema kiro mwahuliire mara mukashobokerwa ekisha ekyo kya Ruhanga, 7omu ntwaza eya Epafurasi omukozi mutahi waitu omugonzibwa. Epafurasi ogwo mukozi wa Kirisito omwesigwa omw'ibara lyaitu 8mara akatumanyisa engonzi zanyu ezo Mwoyo yabatungire. 9Kwema kiro ekyo twahuliire ekigambo ekyo titukalekeraga kubashabira. Tubaho nitushaba Ruhanga k'abasingira muno mukamanya eby'alikwenda, mugire obumanyi bw'eby'omwoyo, mugire n'okushobokerwa; 10mubone kurora oburora obusaine nk'abaana b'Omukama abalikumushemelera muno. Oburora bwanyu buraba bw'ebikorwa birungi byona mara kandi murayeyongera kumanya Ruhanga. 11Amanige g'ekitinwa n'obushoborabwe bibagumise, mushobore kugira obwegumisiliza bungi n'obutekani omu mashemelerwa, 12nimusiima Isheichwe, ayabaronkire kutaha omu bukama bw'omushana. 13Akatwihya omu mani g'omwilima yatutahya omu bukama bw'Omwanawe omugonzibwa, 14ayatuchungwire akatugarulira n'entambara zaitu. 15Kirisito ashusha Ruhanga ataboneka. Niwe muzigaijo mara mukuru w'ebitondwa byona. 16Nobona ebintu byona bikatondwa omu bushoborabwe, n'omw'iguru n'omunsi, ebilikuboneka n'ebitalikuboneka, babe abaikalira nketo anga abakama, anga abategeki anga ab'obushobora, ebintu byona bikatondwa omu bushoborabwe mara aha bwa wenene. 17Akabaho ebintu byona bitakabaireho, mara ebintu byona biba omu myanya yabyo omu manige. 18Niwe mutwe aha mubili, omubili ogwo niyo nteko; niwe muzigaijo ayarugire omu bafu, abone kuba mukuru omuli buli kantu. 19Nobona Ruhanga okwo agobeleire wena akashemelerwa kusingira omuli Kirisito, 20mara aha bwa Kirisito Ruhanga yagonza kugarulira ensi yona. N'omw'iguru n'omu nsi, Ruhanga akatutunga emilembe aha rw'okwitwa kwa Yesu Kirisito aha musaraba. 21Eirai mukaba mushengire Ruhanga, mwaba babishabe omu bikorwa n'omu bitekelezo. 22Kyonkai mbwenu aha rw'okufa kw'Omwanawe akabagarulira kubatahya omu busingebwe muli batakatifu enzira kamogo, mara nyakatetere. 23Muragiirwe kwikara nimwesiiga, mwikare hamoi, mutanaga eby'evangeli eyo mwahuliire yabashuubiize, evangeli eyo buli muntu omu nsi yarangiirwe, kandi yonene egyo nanye Paulo mba murangi wayo. 24Kanya aka ninshemelerwa kushasha aha rw'enshonga yanyu, omu bushasi bwange obw'obubili ningobesheleza obushasi bwa Kirisito aha rw'omubiligwe, niyo Nteeko. 25Enteko egyo nkaba mukozi wayo, omulimo ogwo nkagukwasibwa Ruhanga kukolera inywe, kumanyisa ekigambo kya Ruhanga geigeigei omu bantu, 26ekyebisho ekitura kitamanywa bamalaika na bantu amakiro gona, kyonkai mbwenu abakirisito ba wenene abolekire ekyebisho ekyo. 27Abakirisito abo Ruhanga akabona abamanyise okwo ekyebisho ekyo omu Banyamahanga kiina eitunga lingi muno. Ekyebisho ekyo ni Kirisito asingiire omuli inywe, nikwo kugir'oti mulitungwa ekitinwa kya Kirisito ogwo. 28Kityo nituranga Kirisito omu bantu bona. Nitukoza obumanyi bwona okwo tulikubora kubatatira n'okubegesa tubone kugobya buli omoi omu businge bwa Ruhanga, buli muntu ashangwe ajwangaine na Kirisito limoi limoi. 29Egi niyo nshonga elikunchwazikya, ninfa ninyosha, ninkoza amani gona ago Kirisito alikuntunga, mara amani ago nigo nyemeleireho.

will be added

X\