EBIKORWA EBIKORWA BY'ENTUMWA 4

1Ka Petero na Yohana babaire bakyafumolera abantu, lileta abakuhani n'omukuru wa Rwensinga n'Abasadukayo. 2Baija batamirwe aha rw'okuba entumwa zombili zikaba nizegesa abantu okwo Yesu yahimbukire omu bafu, ekilikwoleka okwo abafu balihimbuka. 3Babakwata babateka rumande babarazamu, nobona kiro kyonene likaba lyatobeire. 4Kyonkai abantu abandi abahuliire ekigambo bakaikiliza. Nikwo orubara rw'Abakirisito kugoba nka 5,000. 5Bukeire abatwazi b'Abayahudi n'abagurusi n'Abeegesa b'Amateka bagira omuterano omuli Yerusalemu. 6Omu muterano ogwo hakaba halimu Anasi Omukuhani Nyamukuru, na Kayafa, na Yohana na Alekisanda, n'ab'eka y'Omukuhani Nyamukuru bona. 7Babateka omugati y'orukiiko bababaza bati, «Ebyo mulikukora ebi nimubikoza bushoboraki, anga nimubikora omw'ibara ly'ohai?» 8Aho Petero aijwirwe Mwoyo Mutakatifu abagambira ati, «Inywe batwazi b'eihanga n'abagurusi, 9kir'eki kamuraba nimutubaza aha rw'enshonga y'ekigiro kirungi ekyo tukoleire omulema, kumanya omuntu ogu yakizibwa muhandaki, 10inywena n'Abaisiraeli bona mumanye okwo eibara lya Yesu Kirisito owa Nazareti, owo mwabambire, kyonkai Ruhanga akamuhimbura omu bafu, nilyo likilize omuntu ogu ayemeleire omu maisho ganyu. 11Eli nilyo ibaare elyayangirwe abombeki likashuba likaba ibare likuru omu pembe. 12Taliho ondijo n'omoi ayakushobora kurokora muntu, kuba omu nsi yona taliho muntu n'omoi owo Ruhanga atutungire kuturokora atali ogu.» 13Abanyarukiiko kabaaboine obumanzi bwa Petero na Yohana, mara nibamanya n'okwo batashomire, bantu ba buli kiro, batangara. Aho bamanya okwo baturaga na Yesu. 14Eky'okuhakana tibakiboine, kubona omushaija owo bakilize abemeleire aha rubaju. 15Babaragira kuba barugire omu rukiiko bakashohora aheru, aho bonene begeya bonkai. 16Bebaza bati, «Abantu aba tubagiire tutai? Buli omoi omuli Yerusalemu namanya okwo ekitangazo eki ekitali kya buli kiro kikozirwe bonene, mara titwina kukyanga. 17Kyonkai mbwenu tubatange batakufumolera muntu weena weena omw'ibara lya Yesu, amakuru aga galeke kuranda omu bantu.» 18Nirwo babesire kugaruka omu rukiiko bakabatanga kutaziza kufumora anga kwegesa mw'ibara lya Yesu. 19Ndi Petero na Yohana babashubamu bati, «Inywe nywenene nimuragirwa muramure ekisaine omu mibonere ya Ruhanga, kuhulira inywe anga Ruhanga wenene. 20Kuba ichwe titwakulekera kugamba byo twayeboneire n'ebyo twahuliire.» 21Orukiiko rutina abantu ruburwa okwo rurababonabonyia; aho rubatinisa kushaagaho rushuba rubataishura, kuba abantu bona bakaba nibahaisiliza Ruhanga aha rw'ekyo ekyabaire kibaireho. 22Omushaija ogu ayakiziibwe omu kitangazo ekyo akaba nashaaga emyaka 40. 23Orwo Petero na Yohana bamazire kutaishurwa, bakwata omuhanda bagya owa bataahi babo bababarulira ebyo abakuhani bakuru n'abagurusi babagambira. 24Abaikiliza kabahuliire ebyo, bashaba hamoi ahali Ruhanga bati, «Nyakutununta Omukama ayatonzire eiguru n'ensi n'enyanja na byona ebili omwo, 25iwe ayagambiire omu kanwa ka tataichwe Daudi, omwiru wawe, akagamba omu mani ga Mwoyo Mutakatifu ati, ‹Ekyatamisa Abanyamahanga kiki; kubaki amahanga nigatensa etabuli? 26Abakama b'ensi bekomire kutabaara, n'abatwazi bahurwire kutabalira Omukama n'Enkorwamajuta ya wenene.› 27Omu mazima Herode na Ponsio Pilato bakaterana omu kigo eki hamoi n'Abanyamahanga n'Abaisiraeli kuramura Yesu, Omukozi wawe Omutakatifu, owo wahindwire Masiha. 28Bakaterana kukora byona ebyo iwe omu bushobora bwawe wabaire waramwire kabibaho. 29Mbwenu Mukama, singa obone okwo balitutinisa kubi, oshube ichwe abairu bawe otushoboze kugamba evangeli yawe tumanzaliire kimoi. 30Imukya omukono gwawe okize abarwaire, oshube osinge ebitangazo n'obubonero bikorwe omw'ibara lya Yesu Omukozi wawe Omutakatifu.» 31Orwo bamazire enshara egyo, mbali babaire bali hagira omusisi; baijurwa Mwoyo Mutakatifu; ekigambo kya Ruhanga bakigamba n'obumanzi. 32Abaikiliza bona okwo babaire nibatura hamoi, taliho yagambaga ati, «Ebi bintu byange.» Ebyo babaire bainabyo bakaba nibabikwatirana. Batekelezaga kimoi bakora kimoi. 33Entumwa zayegesa okuhimbuka kw'Omukama Yesu n'amani gangi, mara bona bakaba batungirwe omugisha gungi. 34Omu baikiliza abo hakaba hatalimu muntu alikuburwa kantu. Kuba ababaire baina amataka anga amaju, ebyo bakabiguza. Empiya ezo baihiremu 35bazileta baziteka omu mikono y'entumwa; kityo buli muntu omuli bonene yahabwaga ebyo alikwetaga mara asanirwa. 36Kutyo na Yozefu owo entumwa zayesire eibara elindi elya Barinaba, (nikwo kugir'oti Muntu alikuchumbiza banu), akaba ali Mulevita mara muzarwa wa Sipuro, 37akaguza eitakalye, na wenene empiha ezo yaihiremu yazileta yaziteka omu mikono y'entumwa.

will be added

X\