EBIKORWA EBIKORWA BY'ENTUMWA 28

1Katwabaire twahungire tutyo, nirwo twamanyire okwo ekizinga ekyo kyabaire nikyetwa Malita. 2Abanyansi bamwo bakatugilira obufura obutali bwa buli kiro. Batunyegeza ichwena, batuhembera omuliro, kuba hakaba haliyo embeho, n'enjura ekaba yabanza kugwa. 3Paulo akaba ashenyire enkwi, akwata omuganda aguteka omu muliro. Enkwi ezo zirugwamu enjoka, ebingwamu omuliro emutema, eshuba emwezinga aha mukono. 4Abanyansi kabagiboine elerembire aha mukono, bagambirangana bati, «Taliho kulengeshanyia, omushaija ogu naita abantu. Namwita ruhanga ayetwa Mazima, n'orwo yaruhonokaho ataisirwe maizi.» 5Kyonkai Paulo agishaimura omu muliro atabaireho kantu. 6Bonene batekeleza bati naija kuzimbagatana anga agwe ahansi afe. Kyonkai kabalinda omwanya gurai bataboine kyoyaba, batekeleza kundi bati, «Ni ruhanga.» 7Bwatana honene halinya hakaba haliho amataka g'omukuru w'ekizinga nayetwa Pubulio. Yatunyegeza omwa wenene ebiro bishatu, yatukolerage. 8Ishe akashangwa arwaire omushwago n'ensheshe. Paulo agya kumuleba, amushabira, ashuba amutaho emikono amukiza. 9Ekyo kakyamazire kubaho, abantu abandi omu kizinga ababaire baina endwara nabo baija, Paulo abakiza. 10Bakatuha ebintu bingi; n'omu kubarugaho kusabara bakatuletera ebindi byona omu meli ebyo twabaire nitwetaaga. 11Emyezi eshatu ehoire tusabara omu meli ya Alekisandiria, ekaba neyetwa Baruhanga Abarongo. Ekirumo ky'embeho emeli egyo nayo ekaba ekimaliire Malita. 12Tugya twemelera Sirakuse, tumarayo ebiro bishatu. 13Turugaho tuzingora tugoba Regio. Twikaraho ekiro kimoi, aho omuyaga gwa kasi gwihya, aha kiro kya kabili tugoba Puteoli. 14Tushangamu abegesibwa batunyegeza, tubamaraho ebiro mushanju. Tuba nikwo tugoba tutyo Roma. 15Omuli Roma abegesibwa kutuhulira baija batuchwekelera omu Katare ka Apio n'ahali Hoteli Ishatu. Paulo kayamazire kubabona yasiima Ruhanga mara yaguma omutima. 16Orwo twataahire Roma, bajubura Paulo kutura wenkai, kyonkai bamuha omwisherukare kumulinda. 17Kabyahingwire ebiro bishatu ayeta abebembezi b'Abayahudi ba Roma. Kabamazire kuterana abagambira ati, «Barumuna bange, n'orwo ntaina kyonashobeize ihanga lyaitu anga kushaaga michwo ya batat'enkurw'ichwe, bakanfunga bamara banyihya Yerusalemu bannaga omu mikono y'Abaroma. 18Abaroma abo kabamazire kuleba ebigambo byange bagonza kuntaishura, enshonga nkaba ntaina mushango gwa kunyisa. 19Abayahudi kabayangire mbona njulize Kaisari, kyonkai ntaina mugendelero gwa kutoijera ihanga yange. 20Aha rw'ekyo egi niyo nshonga eyo nashabira kubabona kufumora nainywe. Ekinkomesize empingo ezi shubi ey'Abaisiraeli batura bategeleize.» 21Bamugambira bati, «Titukaboine barua kuruga Buyahudi ezilikutugambira ahali iwe. Kandi taliho murumuna waitu Omuyahudi ayaizire kunu akakutugambiraho anga akakufumoraho kubi. 22Kyonkai nitugonza kuhulira ebitekelezo byawe. Nitumanya okwo omuteko ogu buli hantu hona nigwangwa.» 23Kabamazire kumuha ekiro, baija bangi muno mbali yabaire nashura. Kwema bwankya kuturuka bwaigoro Abashoborora ebigambo ebyo, najulira obukama bwa Ruhanga. Alenga kubakomeleza kabaikiliza Yesu asimbiize aha Mateka ga Musa n'ebyagambirwe abarangi. 24Abamoi baikiliza ebyo yagambiire kyonkai abandi tibabikiliize. 25Kityo bonene bonkai bahakana, bakwata omuhanda bagenda, orwo Paulo yamazire kugamba ati, «Mwoyo Mutakatifu akaba ayemeleire omu mazima orwo yagambire omu kanwa k'Omurangi Isaya ati, 26‹Ogende ogambire abantu aba oti: Mulihulira kyonkai timuliziza kushobokerwa, okubona mulibona, kyonkai timuligira kyomwaihyamu n'akati. 27Aha rw'okuba abantu aba bagumangaine emitima, baigaire amatwi tibalikuhulira, bebunzire amaisho bataija bakabona bakashobokerwa, bakahuliza matwi gabo, emitima yabo ekataburura, kuhinduka bakaija ahali inye nkabakiza.› 28Mpahonu mumanye okwo ekigambo eki kya Ruhanga eky'okubarokora kyagya omu Banyamahanga, mara bonene balikihulira.» 29[Paulo kayamazire kugamba ebyo, Abayahudi barugaho bagenda nibahakanisangana bingi.] 30Paulo omuli Roma akamaramu emyaka ebili yona. Enju eyo yashuragamu amahera gayo yagegiliraga. Abamukyaliraga bona yabanyegezaga, 31abarangira obukama bwa Ruhanga, n'okubegesa aha by'Omukama Yesu Kirisito n'obumanzi bwona, ataina amutangire.

will be added

X\