EBIKORWA EBIKORWA BY'ENTUMWA 27

1Kabaramwire katugya Roma, Paulo n'abafungwa abandi babateka omu mikono y'omukuru w'abaisherukare eibaralye Julio, ow'eihe lya Augusito. 2Katwamazire kutaaha omu meli ya Adiramasio eyabaire neshuba aha myaro ya Asia, tusabara twina Arisitariko Omumasedoni wa Tesalonika. 3Bukeire tugoba Sidoni. Julio agilira Paulo obufura, ata namujubura kukyalira batahibe bakamujunisa ebyo yabaire nayetaaga. 4Turuga aho tusabara, tukiikira ahansi ya Sipuro, kuba omuyaga gukaba niguturuga omu maisho. 5Turaba omu nyanja ya Silisia na Pamfilia, tugoba Mira eya Lisia. 6Omukuru w'eihe ashangaho emeli ya Alekisandiria negya Italia. Aho atutahya omu meli egyo. 7Ebiro bikya bingi nitubuga mpora mpora, tufa twosha, tulemwa tugoba omu maisho g'ekigo kya Nido nawe tulemwa kugobamu, nituzira omuyaga. Kirete tugiraba ahansi, ni bwatana Salumone. 8Tukiikira n'omwegego, tufa twosha, tulemwa tugoba aha mwaro gulikwetwa Mwaro gw'Emilembe, gwataine ekigo kya Lasea. 9Ebiro okwo byabaire byafire bingi omu kihanda, nangu n'ekisiibo kyahingwire, orugendo rw'enyanja rutama muno rushobeza. Aho Paulo abatatira ati: 10«Banyaishaija, nimbona orugendo oru nirwija kutama muno, habeho n'okuferwa bingi, bitali bintu byonkai, kyonkai naichwe chwenene.» 11Kyonkai omukuru w'abaisherukare afaho eby'omubugi w'emeli na mukama wayo, kukira ebya Paulo. 12Omwaro gukaba gutali gwakwikaramu mu kirumo kya mbeho, aho bangi bategeka kurugaho kugya Foinike, babe niyo bamalira ekirumo ky'embeho. Ogwo nigwo mwaro gwa Kirete ogulebire oburugaizoba kwolekera bikara, n'oburugaizoba kwolekera kasi. 13Omuyaga gwa kasi kagwabandize kwihya mpora mpora, babona okwo bakwasa ekyo bashangirwe nibenda. Nikwo kusika enanga, tusabara tutwetwe omwaro gwa Kirete, kake bwatana orukaru. 14Niho honkai aihya omuyaga gw'enkomaizi ogwa bikara bwolekera oburugaizoba, gwema orukaru. 15Enkomaizi ekiza emeli amani; naichwe kagwatulemire tubona titukina kwoturagira; aho gututwara. 16Turaba aha kazinga ka Kauda mbali omuyaga gutaina mani, tufa twosha kyonkai tukashobora kuhungya obwato bw'emeli. 17Abalimba kabamazire kubwimukya eiguru, bakwata emiguha bagizingoza emeli kugikoma. Ahanyuma batina kugya kukwatira omu mushenye gwa Siriti, aho bahanantura amatanga, baleka emeli etwarwa omuyaga. 18Bukeire enkomaizi kayatuteire ekaija kutwita, babanza kwihya ebintu omu meli kubinaga omu nyanja. 19Aha kiro kya kashatu bonene bonene bakwata emiguha egenda omu meli bagyenagira. 20Katwamazire ebiro bingi tutalikubona izoba anga nyanyinyi, n'enkomaizi ekatwema kubi, twashuburugukirwa kimoi okukira. 21Abantu bamara ebiro bingi bangire kulya. Aho Paulo abemelera omu maisho abagambira ati, «Batata, nimube mwampuliire! Kuba twaikaire Kirete titwakuboine naku ezi na kuferwa bintu. 22Mbwenu mbagambire, mugumise omwoyo. Taliho n'omoi arafa, shana emeli yonkai. 23Kir'eki omumalaika wa Ruhanga, Mukama wange owo nkolera, aizire yanyemelera aha rubaju 24yangambira ati, ‹Paulo otatina. Oli w'okwemelera omu maisho ga Kaisari; kandi Ruhanga akusingire, aha bwawe yakiza bona ab'olikusabara nabo.› 25Kityo batata mugume, kuba n'inyesiga Ruhanga okw'omumalaika yangambira birabakwo. 26Kyonkai omuyaga rwona gwina ekizinga ekyo guratunagaho.» 27Nawe aha kiro kya 14 omw'itumbi omuyaga nigututwara oku n'oku omu Nyanja ya Adiria, abalimba bamanya okwo twailira aha rukaru. 28Bapima oburai bw'amaizi bashanga buli bw'emita 40. Ahanyuma kake bashuba bapima, babona obw'emita 30. 29Batina omuyaga gutatutera aha mabare, nikwo kwema aha kagobero k'emeli bakataishura enanga inai z'emeli omu maizi, bashuba basigara baramiliize obwire kabukya. 30Abalimba bagondize kuruga omu meli kwiruka, bakwata obwato bw'emeli babusongora aha maizi, okwobon'oti nibagonza kutaishura enanga ez'omu maisho. 31Nirwo Paulo yagambire abakuru b'abaisherukare n'abaisherukare bonene ati, «Aba kabataikaire mu meli, timulikurokoka.» 32Nikwo abaisherukare kushara emiguha y'obwato bakabutaishura bukagenda. 33K'obwire bwabaire bwaija kukya, Paulo agambira abantu bona kulya ekyakulya, ati, «Kir'eki kya 14 mutura mwekazire mutaliire kantu. 34Aha rw'ekyo nimbagambira, mugire ako mwalya kabahe amani, kuba inywena okwo muli taliho n'omoi alikwija kurugwa rushoke aha mutwe.» 35Orwo yamazire kugamba atyo akwata omukate, asiima Ruhanga omu maisho gabo bona, agubegura abanza kulya. 36Aho n'aho bona baguma emyoyo, bagira ako balya. 37(Omu meli ichwena hamoi tukaba tulimu abantu 276.) 38Kabamazire kulya bakaiguta, bakehesa obusikizi bw'emeli, bakwata engano baginaga omu nyanja. 39Obwire kabwakeire, abalimba tibashoboire kumanya nsi n'ehai, shana bakabona omukono gw'enyanja gwinaho n'omwaro, aho babona kakilikushoboka babe niho basoka. 40Kityo bagutura enanga bazisiga omu nyanja, baleegura n'emiguha eyabaire ekomire engahi. 41Kyonkai kabaagobaire omw'iteraniro ly'engezi ibili, emeli omu maisho etoka omu ntuumiro y'omushenye omu maizi mwonene. Kandi ekibunu kyayo amayengo gakisinjagulikya. 42Abaisherukare bategeka kwita abafungwa ngu bataija bakaziha bakairuka. 43Kyonkai omukuru wabo aha rw'okugonza kukiza Paulo, abatanga kukora batyo. Yaragira abalikumanya kuziha kwetuura omu nyanja, bebembere nibaziha bagobe aha rukaru; 44abandi bagendere aha mbaho anga aha bichwagulika by'emeli. Bagoba batyo aha rukaru, bakira.

will be added

X\