EBIKORWA EBIKORWA BY'ENTUMWA 26

1Agiripa agambira Paulo ati, «Nojuburwa kwegambilira.» Aho Paulo aimukya omukono abanza kwetonganira ati, 2«Mukama Agiripa, n'inyebona ndi muberwa kwetonganira ahali iwe kir'eki ahali byona eby'Abayahudi balikuntoijela, 3kandi okukiraho kubona iwe nomanya emichwo yona n'empaka z'Abayahudi. Aha rw'ekyo ninkutagiliza oyegumisilize ompulilize. 4«Emirolere yange kwema buto omw'ihanga lyange n'omuli Yerusalemu, Abayahudi bona nibagimanya. 5Kwema karai, kabakuba nibaikiliza kugamba amazima, nibamanya okwo nabaga Mufarisayo ow'omuteko ogulikukira endijo yona okuhikya Amateka g'edini yaitu. 6Mbwenu aha nyemeleire aha kuramurwa omushango aha rw'eshubi y'ekyo Ruhanga yashuubiize batat'enkurw'ichwe 7eshubi etegeleziibwe enganda zaitu 12 ezilikufa nizosha kufukamira Ruhanga waitu kiro na mushana. Kandi nanye aha rw'eshubi egyo, Mukama Agiripa, niyo nshonga Abayahudi nibantoijela! 8Kubaki inywena mutalikwikiliza okwo Ruhanga ahimbura abafire? 9«Nanye nyenene nabonaga ndagiirwe kukora ebintu bingi aha bikwete okwanga Yesu owa Nazareti. 10Nikwo nagizire ntyo Yerusalemu. Abakuhani bakuru bampaga obushobora bw'okufunga abegesibwa, mara nkafunga bangi; kandi n'abaitwaga nashemelerwaga kabafa. 11Omu sinagogi zona nkabashasa mara nabalengesa kurogota. Nkaba mbatamwa muno munonga, mbagingiiza nangu n'okubahondera omu bigo omu mahanga. 12«Abakuhani bakuru bampaga obushobora bantuma ngya Damasiko. 13Rugaba, ekiro kimoi omw'ihangwe ningenda, mbona omushana oguli kwagwo niguruga omw'iguru, nigumyansa kukira eizoba, gumbunda n'abo nabaire nyinabo omu rugendo. 14Aho chwena tubutama ahansi, mpulira eiraka omu Ruyahudi nilimbaza liti, ‹Sauli, Sauli, nongingililizaki? Eby'olikukora noyeshasiza busha.› 15Mbaza nti, ‹Rugaba wab'ohai?› Omukama angarukamu ati, ‹Ndi Yesu ow'olikugingiiza. 16Kyonkai oimuke oyemelere bwemi, kuba nakuhabukira nyina omugendelero gw'okukuronda k'oba mukozi wange mara mujulizi w'okwo wambona n'okwo olikambona. 17Ndikurokora omu mikono y'eihanga eli n'omu mikono y'Abanyamahanga abo ndikukutumamu 18kubabuuruza amaisho bakahinduka bakaruga omu mwilima bakagya omu mushana, kandi baruge omu mikono ya Sitani bahindukire Ruhanga, bahaabwe omugaruliro gw'amafu n'emigisha nk'abatakatifu abalikunyikiliza.› 19«Aha rw'ekyo, Mukama Agiripa, tinajemeire byonabonekeirwe kuruga mw'iguru. 20Nkabanza nabigambira aba Damasiko, ahanyuma nabigamba Yerusalemu n'omu nsi yona ya Buyahudi, nabigambira n'Abanyamahanga kwakwo, okwo balikuragirwa kwechuza n'okugaruka ahali Ruhanga, bakore n'ebikorwa bilikwolekya okwo bechulizekwo amafu gabo. 21Ekyo nikyo Abayahudi bankwatiire Rwensinga bakahiga kunyita. 22Kuturuka kir'eki Ruhanga aikara nanjuna, na mbwenu nikwo nyemeleire aha ningambira abake n'abahango, ti kindi shana eby'abarangi na Musa bagambire okwo bilibaho; 23okwo Kirisito aragiirwe kushasha n'okuba wa mbere kuhimbuka omu bafu, n'okwo aligambira eihangalye n'Abanyamahanga ebilibarokora.» 24Paulo kayabaire akyayetongelera atyo, Fesito agamba n'eiraka lihango ati, «Paulo wararuka; okega bingi byakurarura.» 25Ndi Paulo amuhorora ati, «Mukunirwa Fesito, tinararuka. Ningamba amazima gonkai. 26Kuba Omukama Agiripa ebi nabimanya, nikyo ndikumugambilira ntatiinire. Nindenga nti ebi byona nabimanyakwo, kuba taliho kyakoleirwe mu rubaju. 27Mukama Agiripa, eby'abarangi bagambire nobiikiliza? Nimanya okwo olikwikiliza.» 28Agiripa agambira Paulo ati, «Notekeleza kumpindura mukirisito omu kaanya kagufi?» 29Paulo amugarukamu ati, «Ninshaba Ruhanga, kaba kaanya kagufi anga karai, t'iwe wenkai, nawe na bona abalikumpulira kir'eki bahinduke babe okwo ndi, shana eminyororo egi etabulimu.» 30Ahanyuma omukama aimuka, na Fesito, na Berinisi, n'abo babaire bashuntamire nabo. 31Kabashohoire bagambirangana bati, «Omuntu ogu taina ky'akozire eky'okumwisa anga kumufungisa.» 32Agiripa agambira Fesito ati, «Omushaija ogu kyakushobokire kumutaishura k'atakujuliize Kaisari.»

will be added

X\