EBIKORWA EBIKORWA BY'ENTUMWA 24

1Ebiro kabyahingwireho bitanu, Anania Omukuhani Nyamukuru agenda n'abagurusi n'omuntu ondijo omoi eibaralye Teritulo ow'okubagambilira. Banjulira gavana omushango gwabo ogwo balikutoijela Paulo. 2Beta Paulo, Teritulo abanza kumutoijera ati: «Omukunirwa muno Felikisi, nomanya emilembe yona egi eyo tulikwebuga netabuka ahali iwe. Noshuba notaho eby'okushemeza eihanga eli. 3Ebyo nitubitora n'esiimi nyingi buli hantu. 4Kyonkai ntakukelereize ninshaba osinge otuhulilizeho kake. 5Omushaija ogu tuboine okwo ali muntu mubi muno. Nagenda nashengesa Abayahudi omu nsi zona, kandi n'iwe rwituza omu muteko gw'Abanazareti. 6Nangu alengireho n'okuhagaza Rwensinga, nirwo tumukwete. [Twagonza kumuramura nituhondera Amateka gaitu, 7nawe Lisia omukuru w'abaisherukare yaija yamutwihya omu mikono rwamani. 8Yaragira omushango ogu kagwija ahali iwe.] Naiwe k'oramwelebera orashobora kumubonaho byona ebyo tulikumutoijela.» 9Abayahudi nabo kwakwo betaba na Teritulo omu ntoija egyo, bagamba okwo byona ebyo bilikwo. 10Gavana kayaikiliize Paulo kugamba, Paulo yagamba ati, «Nimanya okwo wamazire emyaka nyingi oli muramuzi w'eihanga eli. Aha rw'ekyo ninyija kwetonganira ninshemelerwa. 11Kawakubaza omanya okwo ntalikushaga biro 12 nyizire Yerusalemu kufukamira Ruhanga. 12Tibanshangire nimpakana na muntu weena weena, anga kutabura bantu omuli Rwensinga, anga omu sinagogi, anga omu kigo. 13N'ebyo balikukutoijaho tibashobora kubigumisa. 14Kyonkai eki ninkiikiliza omu maisho gawe. Obukirisito okwo buli obwo balikweta muteko, ninfukamira Ruhanga wa batat'enkurw'ichwe. Eby'Amateka galikuragira n'ebyahandikirwe abarangi, nimbikiliza. 15Eshubi eyo nyinayo ahali Ruhanga na bonene aba bainayo, ninshubira okwo haliyo okuhimbuka kw'abarungi n'ababi. 16Kityo buli kaanya ndenga okwo ndikushobora kwikara n'inyera ahali Ruhanga n'aha bantu. 17«K'emyaka ebaire yakeireho nyija Yerusalemu ndeteire eihanga lyange eshumbusho, kandi n'okutamba ebitambo. 18Kanabaire nkyali omuli ebyo banshanga Rwensinga nahasiliirwe, ntainamu bantu abo mpurwize, anga ab'eyombo. 19Kyonkai Abayahudi ba Asia, nabo nibaragirwa kuba bali aha omu maisho gawe kuntoijela, kabaina ekigambo, nibo balesire omwaga. 20Anga bonene aba bagambe entambara yobamboineho orwo nyemeleire omu rukiiko. 21Inye orwo mbaire mbemeleiremu ngambire ekigambo kimoi n'eiraka lihango nti, ‹Ekinyemeleize omu maisho ganyu kiro ekya mbwenu kuhimbuka kw'abafire.› » 22Felikisi ashangwa yamanyurwize kurungi obukirisito, aho ababinga nagamba ati, «Omushango gwanyu ndaguramura orwo Lisia araijayo.» 23Yaragira omukuru w'abaisherukare kumulinda kyonkai n'okumuhamu obwegeleere, n'okutatanga batahibe kumujunisa ebyo alikwetaga. 24Kahahingwireho ebiro, Felikisi aija na Durusila mukaziwe, ogwo akaba ali Muyahudikazi. Yayeta Paulo yahulira eby'alikugamba aha kwikiliza Yesu Kirisito. 25Paulo kayagambire aha kukoza amazima, okwekunira, n'aha iramu eliliija, Felikisi yatina muno, yamugambira ati, «Iroko obe ogenzire! Kandakwasa akashango ndakweta.» 26Kandi akaba aina eshubi ngu Paulo aramuha empiya. Kityo yaikaraga namweta nafumora nawe. 27Kyonkai emyaka kayarabireho ebili Felikisi bamuhindura, bataho Porikio Fesito. Kandi Felikisi aha rw'okwenda kuganja Abayahudi yasiga Paulo omu kifungo.

will be added

X\