EBIKORWA EBIKORWA BY'ENTUMWA 23

1Paulo ahanga orukiiko amaisho, agamba ati, «Barumuna bange, omu burora bwange bwona kugoba kir'eki, tingira kyakwebabara n'akati ahali Ruhanga.» 2Aho Omukuhani Nyamukuru Anania, aragira abamwemeleire haihi bamutera omunwa. 3Paulo nawe amugambira ati, «Naiwe, rukuta rusiigire einoni, Ruhanga alikutera! Oshuntamire kundamura okwo Amateka galikuragira, kandi washuba waragira kabantera, eky'Amateka galikutanga?» 4Abemeleire aho bagamba bati, «Nojuma Omukuhani Nyamukuru wa Ruhanga?» 5Paulo abagambira ati, «Barumuna bange, naba ntamanyire okwo ali Mukuhani Nyamukuru. Aha rw'okuba kikahandikwa kiti, ‹Otaligamba kubi omutwazi w'eihanga lyawe.› » 6Paulo kayamanyire okwo ekichweka ekimoi bali Basadukayo, ekindi bali Bafarisayo, yagamba n'eiraka lihango omu rukiiko ati, «Barumuna bange, inye mba Mufarisayo, kandi mba mwana w'Abafarisayo. Nibenda kundamura kuntura eshubi yonyinayo omu kuhimbuka kw'abafu.» 7Kayamazire kugamba atyo, Abafarisayo n'Abasadukayo bahakana kubi bonene bonkai, orukiiko rweyatamu kabili. 8Enshonga Abasadukayo bagamba okwo hatabayo kuhimbuka; bati n'omumalaika tabayo, n'omwoyo nagwo chei. Kyonkai Abafarisayo babiikiliza byona. 9Baimukwamu akatabure kangi. Aho abegesa b'Amateka ab'orubaju orw'Abafarisayo bemelera, bahakana bati, «Omushaija ogu titulikumubonamu kabi. Isi kayakushangwa agambiirwe Mwoyo anga omumalaika?» 10Empaka zabo kazagizire amani gangi muno, omukuru w'eihe atina, yamanya ngu Paulo nibaija kumutagatagura. Nikwo kuragira abaisherukare kugenda kumubaihyamu n'amani kumugarura omu boma. 11Kir'ekyo omu kiro Omukama yamwemelera aha rubaju yamugambira ati, «Guma omutima. Kuba okwo onjulire Yerusalemu, nikwo olikuragirwa kunjulira na Roma.» 12Kabwakeire, Abayahudi baterana hamoi barahira kutalya, n'okunywa chei, batakaisire Paulo. 13Abarahiire batyo bakaba nibashaga abantu makumi ganai. 14Bagya aha bakuhani bakuru n'abagurusi babagambira bati, «Turahiire muno kutaroza kyakulya tutakaisire Paulo. 15Aha rw'ekyo inywe mweme n'orukiiko mugambire omukuru w'eihe amubaletere, mwekore oti nimugonza kulebage ebigambobye. Ichwe turaba twetekatekire kumwita atakabagobaire.» 16Kyonkai mwihwa wa Paulo agya ahulira enaama yabo y'obwenge. Nikwo kukwata omuhanda akataaha omu boma akabigambira Paulo. 17Paulo ayeta omukuru w'abaisherukare omoi amugambira ati, «Otware omusigazi ogu omugobye aha mukuru w'eihe. Kuba aina eky'okumugambira.» 18Ogu amutwara, amugobya omukuru w'eihe amugambira ati, «Paulo omufungwa yanyeta yanshaba kukuletera omusigazi ogu, ngu aina ekyo alikwenda kukugambira.» 19Omukuru w'eihe amukwata omukono amutwara aha rubaju amubaza bali bonkai ati, «Noyenda kungambiraki?» 20Ogu amugambira ati, «Abayahudi bategekire ekigambo kimoi ngu nyenkya karai osongore Paulo omu rukiiko, nibehindura oti nibenda kumanyage ebigambobye. 21Kyonkai otabaikiliza. Abashaija babo abalikushaga 40 barahiire burahira kutalya kantu anga kugira kyobanywa batakamwisire. Mbwenu betekatekire, bategeleize ekyo orabashuubiza.» 22Kityo omukuru w'eihe ataishura omusigazi, amuragira ati, «Otakugambira muntu n'omoi okwo wammanyisa kigambo ekyo.» 23Omukuru w'eihe ayeta abakuru babili b'abaisherukare, abaragira ati, «Mutekateke abaisherukare 200, n'ab'efarasi 70, n'ab'amachumu 200, baimukye aha saa ishatu omu kiro bagye Kaisaria. 24Kandi mutekatekere Paulo efarasi y'okumutwara, bashobore kumugobyage ahali Gavana elikisi.» 25Yahandika ebarua elikugamba eti: 26«Omukunirwa muno Gavana Felikisi, inye Kalaudio Lisia ninkuramya. 27Omushaija ogu akwetwe Abayahudi, bayenda kumwita. Kamanyire okwo ali Muroma nabagendera n'abaisherukare namurokora. 28Kandi kanyenzire kumanya ebyo balikumutoijela, namutwara omu rukiiko. 29Nashanga nibamutoijela aha bikwete Amateka gabo, kyonkai gutali mushango gwa kumwisa anga gwa kumufungisa. 30Mbwenu orwo bammanyisize okwo balikunnama kumwita, namukutwekera bwangu, n'abalikumutoijela nabaragira kwija kukugambira ebyo balikumutoijela.» 31Kityo abaisherukare batwara Paulo nk'okwo omukuru w'eihe yabaragiire. Omu kiro bamugobya Antipatirisi. 32Bukeire bagaruka omu boma yabo, bamusigira ab'efarasi kumutwara. 33Orwo abo baagobaire Kaisaria, baheleza gavana ebarua, na Paulo bamumuteka omu maisho. 34Gavana kayamazire kushoma ebarua egyo abaza Paulo omukoa gwa wenene. Kayamanyire okwo ali wa Silisia, 35amugambira ati, «Ndakuhuliliza orwo abalikukutoijera baraija.» Yaragira kumuta omu kikaare kya Herode.

will be added

X\