EBIKORWA EBIKORWA BY'ENTUMWA 22

1«Barumuna bange na batata, muhulire nyetongelere ahali inywe.» 2Kabahuliire okwo yabagambira omu Ruyahudi lero aho bachulera kushaagaho. Agamba ati: 3«Inye mba Muyahudi omuzarwa wa Tariso omuli Silisia. Kyonkai nkalererwa omu kigo eki, Gamalieli n'iwe yanyegesize. Nkegesibwa muno kukwata bwoli Amateka ga batat'enkurw'ichwe, mara Ruhanga mugilira ekihika nka inywe inywena kiro ekya mbwenu. 4Nkaba ngingiiza Abakirisito kubaita, nimboha abashaija n'abakazi nimbafungisa. 5Omukuhani Nyamukuru n'orukiiko rw'abagurusi ebigambo ebi nibabimanyage. Nibo bampaga ebarua z'okutwalira barumuna baitu aba Damasiko mbali nagyaga kukwata abayo n'okubaleta Yerusalemu babohirwe kabahaabwa ekibonabonyio. 6«Kanabaire ningenda naija kugoba Damasiko nk'omu ihangwe, omushana oguli kwagwo gwema omw'iguru kibandagara gumbunda. 7Ngwa ahansi, mpulira eiraka nilimbaza liti, ‹Sauli, Sauli, nongingililizaki?› 8Mbaza nti, ‹Rugaba wab'ohai?› Anshubamu ati, ‹Inye ow'olikugingiiza ndi Yesu owa Nazareti.› 9Abo nabaire nyinabo bakabona omushana oguli kwagwo gwonkai; eiraka ly'ayabaire nangambira tibalihuliire. 10Aho mubaza nti, ‹Nkoreki Rugaba?› Omukama amporora ati, ‹Oimuke ogye Damasiko, niyo barakugambilira byona eby'oragiirwe kukora.› 11Emyakire y'omushana oguli kwagwo ogwo ekampumisa naba ntakibona, aha rw'ekyo abo nabaire nyinabo bankwatilira nagoba ntyo Damasiko. 12«Omushaija omoi Anania, omunyadini, alikukwata Amateka, ayabaire nasiimwa Abayahudi bona ba Damasiko, 13aija anyemelera aha rubaju angambira ati, ‹Murumuna wange Sauli, humuruguka.› Omu kaanya ako mpumuruguka, mubona. 14Angambira ati, ‹Ruhanga wa batat'enkurw'ichwe akuronkire k'omanya eby'ayenda, omanye Ow'amazima mara ohulire n'ebyo arakugambira. 15Olimubera mujulizi omu bantu bona aha rw'eby'oboine n'eby'ohuliire. 16Mbwenu olinzireki? Imuka obatizibwe, omutakiire oshube oyoge amafu gawe.› 17«Orwo nabaire nashubire Yerusalemu ndi Rwensinga ninshoma enshara, mbonekerwa. 18Mbona Omukama nangambira ati, ‹Yanguha oruge bwangu Yerusalemu enshonga eby'orabagambira ahali inye tibabikiliize.› 19Nanye mugambira nti, ‹Rugaba, bonene bonene nibamanya okwo omu sinagogi zona nakwete abaikiliza bawe nkabatera mara nkabafunga. 20Kandi orwo baita Sitefano omujulizi wawe, nkaba nyemeleireho nimbisiima. Abamwisire n'inye nabaire ndinzire ebijwaro byabo.› 21Angambira ati, ‹Iroko, ninyija kukutuma harai omu Banyamahanga.› » 22Kurug'enyuma bakaguma bamuhuliliize kuhika orwo yagambiire ekigambo ekyo. Kwema aho bayomba muno nibagamba bati, «Omushaija ogwo mumwihye omu nsi ti wa kurora.» 23Kababaire nibomba muno, nibakunkumura emyendo yabo, batuntumulira echuuchu eiguru. 24Nikwo omukuru w'eihe kuragira kumutaahya omu boma mara kumutera muno, ngu amanye ekyo balikumutelera enduru. 25Kabamazire kumubohesa enkoba, Paulo yabaza omukuru w'abaisherukare ayabaire ayemeleire haihi ati, «Amateka nigabaikiliza kutera Omuroma ataramwirwe?» 26Omukuru ogwo kayakihuliire yagya aha mukuru w'eihe yamubaza ati, «Noyenda kukoraki? Kuba omushaija ogu Muroma.» 27Omukuru w'eihe aija amubaza ati, «Ngambira, iwe oli Muroma?» Paulo ati, «Ego.» 28Omukuru w'eihe ati, «Inye Oburoma obu nkabugura empiya zingi muno.» Ndi Paulo ati, «Inye nkazarwa ndi Muroma.» 29Kityo aho honkai ababaire baija kugira ebyo bamubaza bamurugaho. Omukuru w'eihe nawe atina orwo yamanyire okwo Paulo ali Muroma, mara kandi okwo yamubohire. 30Omukuru w'eihe agonza kumanyuruzage ekyo Abayahudi balikutoijelera Paulo. Aho bukeire amubohorora, aragira abakuhani bakuru n'orukiiko rwona kuterana. Aleta Paulo amubateka omu maisho.

will be added

X\