EBIKORWA EBIKORWA BY'ENTUMWA 21

1Katwabarugireho tusabara, tukwatira kimoi ogulikugya Kosi, bukeire tugoba Rodesi, niho twayemire tugiire Pataara. 2Orwo twashangire emeli negya Fenisia, twagigyamu twasabara. 3Katwalengeire Sipuro, twagisiga aha rubaju rwa bumosho twagya Siria, twayemelera Tiro, aha rw'okuba niho babaire nibagya kwihiramu ebintu omu meli. 4Aho tuhiiga abegesibwa, tukamaramu ebiro mushanju. Omu mani ga Mwoyo bagambira Paulo kutagya Yerusalemu. 5Ebiro byaitu bya Tiro kabyahoire, tugendelera n'orugendo rwaitu. Bona, n'abakazi babo n'abaana babo, batushendekeleza batuturukya omu kigo. Aha mwaro tubandama tushoma enshara, turagangana. 6Aho tutaaha omu meli, bonene bashuba omuka. 7Orwo twamazire orugendo rw'okuruga Tiro, tugoba Tolemaisi, tukeisa abegesibwa tushuba turaramu ekiro kimoi. 8Bukeire twimukya tugoba Kaisaria. Tutaha omw'omwegesa w'evangeli, n'iwe Filipo, omoi omu bashemasi mushanju, twikara nawe. 9Akaba aina abahara banai batashweirwe, nibashasha. 10Katwabaire twamarayo ebiro bingi aija omushaija omurangi eibaralye Agabo, aruga Buyahudi. 11Orwo yatugobire yakwata orufufu rwa Paulo yayekoma emikono n'amaguru yagamba ati, «Mwoyo Mutakatifu nagamba ngu: Mukama w'orufufu oru, Abayahudi omuli Yerusalemu nikwo baramukoma bakamunaga omu mikono y'Abanyamahanga.» 12Katwahuliire ekyo, ichwe n'embaga tutagiliza Paulo kutagya Yerusalemu. 13Wenene Paulo atuhorora ati, «Nimugiraki inywe kulira kumpenda omutima? Aha rw'okuba tindikwikiliza kufungwa kushai, nawe n'okufa nkagwa Yerusalemu aha rw'eibara ly'Omukama Yesu.» 14Kayayangire kugwelezibwa twagamba tuti, «Okwo Omukama arayenda nikwo.» 15Ebiro ebyo kabyahoire twayetekateka twagya Yerusalemu. 16Abegesibwa abandi aba Kaisaria bagenda naichwe, batutwara omwa Muasoni owa Sipuro omwegesibwa wa karai katuba nimwo tushura. 17Katwagobaire Yerusalemu abegesibwa batunyegeza n'amashemelerwa. 18Kabwakeire Paulo yagenda naichwe owa Yakobo; kandi abagurusi bona bakaba bali aho. 19Kayamazire kubakeisa yababarulira ebyo Ruhanga yamushoboize omw'ikoralye omu banyamahanga. 20Nabo kababihuliire basingiza Ruhanga. Ahanyuma bamugambira bati, «Murumuna waitu obone, Abayahudi enkumi baikiliize; bona Amateka nibagataho ekihika. 21Kandi babagambiire amakuru gaawe okwo oyegesa Abayahudi bona abatwire omu Banyamahanga nobatanga ebya Musa, kandi obagambira kutatahiri baana babo anga kukwata michwo yabo. 22Mbwenu eky'okukorwa ni kihai? Mara tibalikwija kuburwa kuhulira kwo oizire. 23Aha rw'ekyo okore okwo turakugambira. Twinaho abantu banai abakomirwe ekiragano. 24Oyeme n'abashaija aba oyeshemeze, obashashulire ebyo baragiirwe kugira, bashobore kumoisa eishoke lyabo. Aho bona baramanya okwo ebyo bakuhuliireho bili bishuba mara bashobokerwe okwo okwata Amateka. 25Kandi Abanyamahanga abaikiliize tukabahandikira ebarua, nitubaragira kwelinda eby'abantu batambiire ebihuuku, n'obwamba n'ebimyoirwe ebikya, n'obusiyani.» 26Aho Paulo akwata abashaija abo bukeire bwaho, ayehasilira hamoi nabo, yataha nabo Rwensinga kumanyisa mbali ebiro by'okuhasilirwa kwabo biragobaera, na buli omoi okwo bali kutambilirwa ekitambo. 27Ebiro ebyo mushanju kabyabaire bili haihi kugoba, Abayahudi ababaire barugire Asia, kabamazire kumubona bati Rwensinga barahura embaga yona, bamuhyokera bamukwata. 28Bomba bati, «Inywe Baisiraeli muratujuna! Omushaija ogu n'iwe ayegesa abantu buli hantu kugaya eihanga lyaitu n'Amateka na Rwensinga egi. Kandi atahize Abagiriki Rwensinga yagihagaza.» 29Aha rw'okuba bakaba barugire kumubona na Tirofimo owa Efeso omu kigo, batekeleza ngu amutahize Rwensinga. 30Aho ekigo kyona kisinsimuka, abantu bahyokera Paulo, bamuturukya Rwensinga nibamukurura, niho honkai ebihigi bikingwa. 31Kababaire nibenda kumwita, amakuru gaagobaa omukuru w'eihe okwo Yerusalemu yona eli omu katabure. 32Aho n'aho ahurura n'abaisherukare n'abakuru babo agenda airukire. Kabamuboine n'abaisherukare balekera kutera Paulo. 33Aho omukuru ogwo w'eihe agoba Paulo amukwata, aragira kabamukoma empingo ibili. Abaza ati, «Ogu n'ohai, yakoraki?» 34Omu mbaga abamoi bakunga nibagamba eki, abandi bagamba kindi. Aho omukuru w'abaisherukare kayabuzire kushobokerwa amazima aha rw'eyombo, yaragira kabamutwara omu boma y'abaisherukare. 35Paulo kayagobaire aha matembero, abaisherukare bamutwara bamushutwire kumukiza aha bukatili bw'embaga, 36eyabaire emuhondeire nekunga eti, «Afe!» 37Orwo Paulo yabaire yaija kutaaha omu boma y'abaisherukare, agambira omukuru w'eihe ati, «Ninshaba ngire ekyo nakugambiraho!» Ogu amubaza ati, «Orugiriki norumanya? 38Iwe toli Mumisiri, torumusha kushengesa abaisi b'abantu 4,000 okabatwara omw'irungu?» 39Paulo yamushubamu ati, «Inye mba Muyahudi wa Tariso omuli Silisia, ndi w'ekigo ky'ekitinwa. Ninkushaba onjubure ngambire abantu aba.» 40Kayamujubwire, Paulo yayemelera aha matembero, yatelera abantu omukono kabesiza. Orwo obuchulezi bwabaireho bungi, abagambira omu Ruyahudi ati:

will be added

X\