EBIKORWA EBIKORWA BY'ENTUMWA 20

1Orushengo karwachuleire, Paulo ayeta abegesibwa. Kayamazire kubachumbiza abarugaho, aimukya agya Masedonia. 2Arambura ebichweka ebyo n'okubatamu ekihika kingi, agoba Bugiriki. 3Bugiriki akamaramu emyezi eshatu. Kayabaire naralira kusabara kugya Siria, Abayahudi banaama kumwita. Aho nikwo kuramura omu magaruka kuraba Masedonia. 4Sopateri owa Berea mutabani wa Piro, amushagara. Abatesalonika abamushagaire ni Arisitariko na Sekundo; Gayo owa Deribe, na Timotheo; n'Abaasia abalimu Tikiko na Tirofimo. 5Aba bakagendera kimoi batulindira Toroasi. 6Ebiro bikuru by'Omukate Gutatumbisiibwe kabyahoiremu twasabara twemire Filipi. Omu biro bitanu tugoba Toroasi, omwo tukamaramu ebiro mushanju. 7Aha kiro kya mbere ekihondera Sabato, tuteraine kulya omukate, Paulo afumolera abantu naraalira kwimukya bukeire. Akataho ehotuba ndai yagoba omu kiro eitumbi. 8Omu gorofa mbali twabaire tuteraniire hakaba halimu etara zingi nizaka. 9Omusigazi eibaralye Eutiko akashangwa ashuntamire omw'idirisha. Paulo kayagambiire orurai, ogu akwatwa oturo tungi tumukiza amani, ayema omu gorofa ya kashatu akuntuka ahansi, bakamwihyaho yafire. 10Kyonkai Paulo asongoka amwinamaho amubumbatira, abagambira ati, «Mutashasha, narora.» 11Paulo ashuba atemba eiguru. Abegura omukate alya, ashuba afumora nabo obwire bukya, aho aimukya. 12Omwana bamutwara narora, mara bakashemelerwa muno. 13Ichwe twebembera n'emeli tugya Asosi, mara tukaba twenzire kusabara na Paulo, kyonkai wenene aramura kutwarwa ogw'orukaru. 14Aija atushanga Asosi, aho tusabara nawe omu meli tugya Mitilene. 15Katwarugireyo bukeire tugoba omu maisho ga Kiosi. Bukeire bunu tugoba Samosi; bukeire obundi tugoba Mileto; 16kuba Paulo akaba aramwire kuhingura Efeso ataija akakelererwa Asia. Akaba narahuka kakilikushoboka ekiro kya Pentekosite kimushange Yerusalemu. 17Paulo kayabaire ali Mileto yatuma Efeso kwetayo abagurusi b'enteko. 18Kabamugobire yabagambira ati, «Inywe nywenene nimumanya okwo natwire nainywe ebiro byona kwema kiro ekyo nalibasire Asia. 19Nkakolera Omukama n'obwetohya bwona, nindira, natekanira n'ebiyengo ebyangwireho eby'Abayahudi kunaama kunyita. 20Nimumanya okwo ntayefunyire kubagambira kigambo kyona kyona eky'omugasho, nimbegesa omu maisho g'embaga, kandi n'omu maju ganyu nindug'omu ningy'omu 21ninkomeleza Abayahudi n'Abagiriki kwechuza amafu bakagaruka ahali Ruhanga mara bakaikiliza Omukama waitu Yesu Kirisito. 22Mbwenu leba ningya Yerusalemu, kuba nikwo Mwoyo alikundagira, n'orwo ntalikumanya garangwaho kandaba nagobaireyo. 23Shana ekiliho Mwoyo Mutakatifu nangambirage okwo ekifungo n'obushasi bindindiliire buli kigo. 24Tindikulenga nka burora bwange ahali inye buli bw'eiguzi. Ekyo ndikwenda kili kimoi: Kugobesheleza omulimo gwange n'eikora ely'Omukama Yesu yankwasize, kujulira evangeli elikugamba aha kisha kya Ruhanga. 25Mbwenu leba nimanya okwo inywena abo narabagamu nindanga obukama bwa Ruhanga mutalimbona rundi. 26Aha rw'ekyo kir'eki mbagambirege okwo taliho muntu n'omoi omuli inywe alifa nkakwatwa mushango, 27kuba tinayefunyire kubagambira byona ebyo Ruhanga alikwenda. 28Mwelinde, kandi mumanye n'obuhyo bwona bw'entaama obwo Mwoyo Mutakatifu yabakwasize kulebelera, kumanya enteko ya Ruhanga eyo yagiire kubona akagira obwamba bw'Omwanawe. 29Nimanya okwo orwo ndikumara kubarugaho, emishega erumbire neija kubatabalira mara teganyire buhyo. 30Kandi n'omuli inywe nywenene hararugwamu abantu ab'okugamba ebichulikire, bohye abegesibwa babahondere. 31Aha rw'ekyo mwikarenu mulebire, mwijuke okwo emyaka eshatu yona na kiro na mushana tinalekeraga kubahana buli omoi mara nindira. 32Mbwenu nimbakwasa Ruhanga n'ekigambokye eky'ekisha ekilikushobora kubombeka n'okubabonera emigisha eyo Ruhanga atunga abatakatifu bona. 33Tinayegombire feza ya muntu weena weena anga zahabu anga kijwaro. 34Inywe nyweena nimumanya okwo omu mikono yange egi nimwo naihyaga eby'okuntunga n'abo nabaga nyinabo. 35Mbabeleire bulebero omuli buli kantu, okwo omu kukora mutyo emilimo yanyu muragiirwe kujuna abataina mani, nimwijuka ebigambo by'Omukama Yesu ati, ‹Okuha kuhaisa omugisha kushaaga okuhaba.› » 36Kayamazire kugamba atyo ateka amajwi, ashoma enshara nabo. 37Bona balira muno bamugwa omu bikya, bamunywegera. 38Bakajunara muno, kyonkai okushaagaho aha rwe'kigambo kyoyabaire agambire ngu tibalimubona rundi. Bamushendekeleza bamugobya aha meli.

will be added

X\