EBIKORWA EBIKORWA BY'ENTUMWA 19

1Apolo kayabaire ali Korinto, Paulo ashuba obunyaruguru bw'omukoa agoba Efeso; agya ashangamu abegesibwa. 2Ababaza ati, «Kuruga mwikilize muratungirwe Mwoyo Mutakatifu?» Bamuhorora bati, «Chei, nangu n'okuhulira titukahuliraga kwo habayo Mwoyo Mutakatifu.» 3Ababaza ati, «Aho mukabatizibwa mutai?» Bamugarukamu bati, «Okubatiza kwa Yohana.» 4Paulo abagambira ati, «Yohana akabatiza okubatiza kw'okwechuza amafu, nagambira abantu kwikiliza ayabaire naija kumuruga enyuma, n'iwe Yesu.» 5Kabamazire kuhulira batyo, bebuga Omukama Yesu, babatizibwa. 6Paulo abataho emikono, batungwa Mwoyo Mutakatifu. Bagamba endimi ezitalikumanyika, baba barangi. 7Bona hamoi bakaba bali 12. 8Paulo ataaha omu sinagogi, amara emyezi eshatu nagambisa obumanzi, nahakana mara narabira obukama bwa Ruhanga. 9Kyonkai orwo abandi bajemire bakanga kwikiliza, bakagamba kubi aha muhanda gw'Omukama omu maisho g'enteko, yabenyururamu. Yagenda n'abegesibwa, buli kiro ata nahakana n'abandi omu shule ya Tirano. 10Ekyo akakikora emyaka ebili, nangu abantu bona ba Asia, Abayahudi n'Abagiriki, bahulira ekigambo ky'Omukama. 11Ruhanga akatunga Paulo obushobora bw'okukora eby'amani obutali bwa buli kiro. 12Abantu bakwata ebitambara n'eaporoni ebyo yakozaga babitwalira abarwaire bakira endwara n'amasitani gabarugamu. 13Aho Abayahudi abagendaga nibabanduruza amasitani babanza kugabinga omu bo gabaire gakwete nibakoza eibara lya Yesu, nibagamba bati, «Ninkutaho Yesu owo Paulo arangaho.» 14Omukuhani Nyamukuru Omuyahudi, eibaralye Sikeva, akaba aina abatabani mushanju; babanduruzaga amasitani. 15Kyonkai Sitani omoi aija abagambira ati, «Yesu nimumanya, na Paulo nimumanya; nawe inywe mwaba baahai?» 16Nikwo omuntu ayabaire abanzirwe eisitani kubachokera, bona abakiza amani, abajura mara abahutaza, barug'omwa wenene bairukire. 17Abantu ba Efeso bona bakimanya, Abayahudi n'Abagiriki. Batina; eibara ly'Omukama Yesu lisingizibwa. 18Abaikiliza nabo baija bangi, bagamba omu maisho g'abantu ebyo bashangirwe bakora. 19Abandi abaraguraga baleta ebitabo byabo babyokya abantu bona nibabona. Kababazire eiguzi lyabyo likagoba ebichweka 50,000 by'efeza. 20Kityo ekigambo ky'Omukama kiranda kigira amani. 21Ebyo kabyahoire, Mwoyo akyanura Paulo, aramura kuraba Masedonia na Akaya kugya Yerusalemu, ati, «Kandaba nagobaireyo ndaragirwa kugya Roma kugibona.» 22Abahwezi ba wenene babili Timotheo na Erasito abasindika Masedonia, wenene abanza aikara Asia. 23Omu bir'ebyo haimuka orushengo rutali ruke rw'okushenga omuhanda gw'Omukama. 24Omuhesi omoi w'ezahabu eibaralye Demetirio, ayakoleraga Aritemi, ruhanga omukazi, ebiikaro by'efeza, yaboneraga ababuya ebyashara bingi. 25Aho abahuruza, ahuruza n'abandi ab'eikora nk'elyo abagambira ati, «Inywe nimumanya okwo tutungira omu byashara ebi. 26Mbwenu mwaboine mara mwahuliire okwo Paulo ogu ti muli Efeso mwonkai kyonkai Asia yona, yayohize abantu bangi muno yabakukumbire, nagamba okwo baruhanga abakozirwe abantu ti baruhanga. 27Akabi kali omwo ti kugira oti ebyashara byaitu byonkai nibyo biragaywa, kyonkai na rwensinga ya Aritemi, ruhanga waitu omukazi rubamba eraba etakiina kantu. Aritemi wenene araba atakiina kitinwa, mara Asia yona n'ensi n'iwe bafukamira.» 28Kabahuliire batyo basinsimuka n'eiraka lihango bati, «Aritemi w'Abaefeso aba mukuru!» 29Aho nikwo ekigo kutabanguka, bakasibutukira omu izaniro, bakurura Gayo na Arisitariko, Abamasedoni abo Paulo yagendaga nabo. 30Paulo ayenda kutaaha omu mbaga kyonkai abegesibwa bamutanga. 31Abatwazi ba Asia kwakwo, ababaire bali batahibe, bamutumaho nibamushaba kutaziza kutaaha mw'izaniro. 32Orukiiko rugira etabangu, aba nibagamba eki, aba nibagamba kili; bangi muno baba batakimanya kyo baba bateraniire. 33Abandi omu mbaga bachumbiza Alekisanda, Abayahudi bashangwa bamusindikire omu maisho. Alekisanda ogwo abatelera omukono kabesiza, agondize kugira ekyo yashoborora embaga. 34Kyonkai kabamanyiire okwo ali Muyahudi bamara esaa ibili zona nibaashana bati, «Aritemi w'Abaefeso aba muhango!» 35Omuhandiki mukuru w'ekigo kayamazire kutekanisa embaga, agamba ati, «Inywe Baefeso, ni muntuki atalikumanya okwo ekigo ky'Abaefeso kigiramu rwensinga ya Aritemi rubamba n'ekishushanikye ekyarugire omw'iguru? 36Mbwenu orwo mulikubona okwo ebintu ebi taliho muntu wa kubihakana, muragiirwe mwesize mara mutanguhiliza. 37Abashaija abo mwaleta hanu aha tibakahenire anga kurogota ahali ruhanga waitu. 38Aha rw'ekyo Demetirio n'ababuya batahibe kabaraba baina owo bainaho ekigambo, amaramuliro gakingwire, n'abaramuzi baliho, baije batoijelangane. 39Kamuraba mwina ekindi ekishagireho ekyo mulikuhiiga, kiraramurwa orukiiko oruhondera Amateka. 40Kuba kir'eki tuli omu kabi k'okukwatwa omushango gw'okwimukya orushengo; mara titwina nshonga yotwakugamba ey'okugira tuti niyo yatwimukisa orushengo oru.» 41Orwo yamazire kugamba ebyo, ataishura embaga.

will be added

X\