EBIKORWA EBIKORWA BY'ENTUMWA 18

1Ebyo kabyahoire Paulo aruga Atenzi agya Korinto. 2Agya agwamu Omuyahudi eibaralye Akila, omuzarwa wa Ponto. Akaba arugire juba Italia na mukaziwe Purisila. Kalaudio akaba aragiire Abayahudi kuruga Roma. Aho Paulo agenda kubabona, 3kandi aikara nabo enshonga yakoraga omulimo gumoi na bonene, bakaba bali bakozi b'amahema. 4Buli Sabato ata kugya omu sinagogi, ahankana n'Abayahudi n'Abagiriki abagweleza. 5Orwo Sila na Timotheo barugire Masedonia, Paulo akaba ali omu kuranga, nayoleka Abayahudi okwo Kirisito n'iwe Yesu. 6Kabamuhakanisize bakamushekelera, yabakunkumulira echuuchu omu bijwarobye yabagambira ati, «Kamulifa mulyemanya! Inye tinyina mushango. Kwema mbwenu nagya omu Banyamahanga.» 7Kurug'okwo agya omw'omuntu omoi eibaralye Tisio Yusito, akaba ali muntu ayafukamiraga Ruhanga. Enjuye ekaba eyataine esinagogi. 8Kirisipo, omutwazi w'esinagogi hamoi n'omutungogwe gwona baikiliza Omukama. N'AbaKorinto kabahuliire Paulo baikiliza babatizibwa. 9Omu kiro kimoi Paulo abonekerwa, Omukama amugambira ati, «Otatina, mara ogambe obutesiza. 10Inye nkwemeire; taliho muntu arakutabalira kukukora kubi; enshonga omu kigo eki nyinamu abantu bangi.» 11Paulo akamara Korinto omwaka gumoi n'enusu, yabarangira ekigambo kya Ruhanga. 12Orwo Galio yabaire ali muragirwa wa Akaya, Abayahudi bema hamoi batabalira Paulo, bamutwara omw'iramuliro 13nibagamba bati, «Omushaija ogu nalemba abantu kufukamira Ruhanga kutali kw'Amateka galikuragira.» 14Paulo kayabaire yaija kugamba, Galio agamba ati, «Inywe Bayahudi! Kayakuba aina ekyo yashobya anga akakora kubi muno, aho nakugizire enshonga y'okubahuliliza. 15Mbwenu orwo mulikufa ebigambo n'amabara n'Amateka ganyu, ebyo mubyemalire inywe nywenene. Ebigambo ebyo tindikukunda kubiramura.» 16Ababinga omw'iramuliro. 17Aho bona bakwata Sositenesi omutwazi w'esinagogi, bamutelera omu maisho g'eiramuliro. Kyonkai ebyo Galio tiyabifireho kantu. 18Ebyo kabyahingwire, Paulo aikarayo ebiro ebindi bingi, aho nirwo yasigireho abegesibwa akasabara na Akila na Purisila bagiire Siria. Kayabaire ali Kenikirea ashara eishokelye, kuba akashangwa aina ekiragano. 19Kabagobaire Efeso aba niho abasiga. Kyonkai abanza ataaha omu sinagogi ahakana n'Abayahudi. 20Orwo bamushabire kuba akyaikaireyo akandi kake, ayanga. 21Naimukya kubarugaho abagambira ati, «Ruhanga k'aligonza ndigaruka.» Nikwo kwimukya akaruga Efeso akasabara. 22Kayagobaire Kaisaria agenda akeisa ab'enteko ya Yerusalemu, ahanyuma agya Antiokia. 23Akamarayo ebiro bitali bingi yarugayo yagya kurambura emikoa ya Galasia na Firijia, yagumisa abegesibwa bona. 24Omu biro ebyo, Omuyahudi eibaralye Apolo omuzarwa wa Alekisandiria aija Efeso. Akaba ali mushaija engambi mara namanya muno Ebihandiko Bitakatifu. 25Akaba yayegesiibwe aha bikwete aha muhanda gw'Omukama mara omwoyogwe gwina ekihika, n'ebikwete ahali Yesu nabigamba n'okubyegesa kabutekire, n'orwo yabaire namanya okubatiza kwa Yohana kwonkai. 26Abanza kugambisa obumanzi omu sinagogi. Purisila na Akila kabamuhuliire bamutwara bamushoborora aha muhanda gwa Ruhanga kurungi kushaagaho. 27Orwo yagondize kushaabuka kugya Akaya, abegesibwa bamuchumbiza, bahandikira n'abegesibwa aba kulinya kumunyegeza. Kayagobaireyo akajuna muno ab'Omukama yabaire agiliire ekisha bakaikiliza, 28aha rw'okuba akahakanisa muno Abayahudi omu rwatu yabasinga, najuliza Ebihandiko Bitakatifu okwo Yesu n'iwe Kirisito.

will be added

X\