EBIKORWA EBIKORWA BY'ENTUMWA 17

1Paulo na Sila baraba Antipolisi na Apolonio bagoba Tesalonika mbali habaire ali esinagogi y'Abayahudi. 2Paulo ataaha omu sinagogi omwo nk'okwo yakagiraga, amara amalimansi gashatu nahakana nabo najuliza Ebihandiko Bitakatifu. 3Abashoborora naboleka okwo Kirisito yabaire asaine kufa mara akahimbuka omu bafu. Abagambira ati, «Yesu ogu owo ndikubagambira n'iwe Kirisito.» 4Abandi omuli abo kabahuliire ebyo bahya, bekwata Paulo na Sila, nk'okwo Abagiriki bangi abanyadini n'abakazi abashongore bagizire. 5Kyonkai Abayahudi bakwatwa eihagiko, bakwata abashuga, bashombokya n'embaga etali nke, ekigo bakyagaraza, omwa Jasoni bagiitabara bahigire kwihyamu Paulo na Sila kubaletera abantu. 6Orwo batababoine, bakurura Jasoni n'abegesibwa abandi babatwalira abakuru b'ekigo, nibagambira eiguru bati, «Abashaija aba abalikujurungura ensi baizire na kunu; 7Jasoni n'iwe abanyegeize. Bona nibachwa emiku ya Kaisari, nibagamba okwo haliyo omukama ondijo Yesu.» 8Abantu n'abakuru b'ekigo kabahuliire batyo bafa bosha. 9Jasoni n'abandi babenza omusimbo, aho babataishura. 10Abaikiliza banguha basindika Paulo na Sila kugya Berea omu kiro. Kabagobaireyo bataha omu sinagogi y'Abayahudi. 11Abayahudi aba bakaba bali batesi kukira aba Tesalonika. Ekigambo ky'Omukama bakakitoza ekihika kyona, buli kiro nibaleba omu Bihandiko Bitakatifu kumanyuruza nk'ebigambo ebyo bili by'amazima. 12Aha rw'ekyo abali bangi bakaikiliza, n'Abagirikikazi ab'ekitinwa bangi n'Abagiriki batali bake. 13Nawe Abayahudi ba Tesalonika kabahuliire okwo n'omuli Berea Paulo arangireyo ekigambo kya Ruhanga, nayo bagyayo, barahura embaga nibagyohya. 14Aho abaikiliza barabya Paulo ogw'enyanja, kyonkai Sila na Timotheo basigara Berea. 15Abayolekire Paulo omuhanda bamugobya Atenzi. Paulo kayamazire kubaragira kugya kumwetera Sila na Timotheo omu bwangu, baimukya bagenda. 16Orwo Paulo ali Atenzi alindiliire Sila na Timotheo, alibaliibwa omu mwoyo kubona ekigo kijwire ebihuuku. 17Kityo ata nagya omu sinagogi nahankana n'Abayahudi n'abantu abanyadini, kandi buli kiro omu katare yahakanaga n'abo yashangagamu. 18Nangu n'abafilosofi: Abaepikureo n'Abasitoiki bakabonangana nawe. Abandi bagamba bati, «Kanyamagambo ogu nayenda kugambaki!» Abamoi bati, «Nazoka oti naranga ahali baruhanga abanyamahanga.» Okugamba batyo enshonga akaranga ahali Yesu n'aha kuhimbuka. 19Bamukwata bamutwara omu Areopago nibagamba bati, «Otugambire ebihya ebi eby'olikwegesa biina nshongaki? 20Kuba notugambira ebihya ebyo tutakahuliraga. Aha rw'ekyo ebigambo ebi nitugonza kumanya enshonga yabyo.» 21Abaatenzi bona n'abanyamahanga abaturaga Atenzi tibakoraga kintu kindi shana kugamba anga kuhuliliza amakuru gahya ago. 22Paulo ayemelera omugati ya Areopago agamba ati, «Inywe Baatenzi, nimbona okwo buli kimoi ekyo mulikukora nimukikora nk'abanyadini. 23Mbali ndabire hona mboine ebyo mufukamira, nagwamu na alutare eina ekihandiko eki: ‹Ya ruhanga atalikumanyika.› Aha rw'ekyo ogwo owo mufukamira mutalikumanya n'iwe ndikubagambira. 24N'iwe Ruhanga ayatonzire ensi n'ebintu byona ebikagibamu. Aba Mukama w'eiguru n'ensi, taikara mu biikaro ebyombekirwe bantu, 25anga kugir'oti nayetaaga muntu k'amukolera, kuba wenene n'iwe aha abantu oburora na buli kantu. 26Amahanga gona g'abantu akagaihya omu muntu omoi, mara n'iwe yabataire omu nsi zona kuzituramu, yabateraho amakiro ago yaragiire, na mbali abantu batwire yataho embibi. 27Akakora atyo kabamwetaho, bashushe abalikumuhiga nibakorakora oku n'oku, n'orwo atatuli harai, 28nk'okwo abahoyi b'amashairi bagambire bati, ‹Ahakuba tuba baanabe,› nikwo kwonene, enshonga, ‹N'iwe atuha oburora okwo tuli n'ebyo tukora n'iwe aba atwemiremu.› 29Orwo tuli baana ba Ruhanga, tituli bakutekeleza ngu Ruhanga wenene ashusha ezahabu, anga efeza, anga eibare, anga ekihuuku ekibuyabuyirwe omubuya akakikora. 30Amakiro ag'abantu batamumanyaga tiyagetaireho. Kyonkai mbwenu buli hantu nahangira abantu kwechuza amafu gabo. 31Yataireho ekiro orwo omuntu owo yaronzire aliramuza ensi yona amazima. Kumanyisa buli omoi okwo ebintu ebyo bilibaho kwo, omuntu ogwo akamuhimbura omu bafu.» 32Abamoi kabahuliire okuhimbuka kw'abafu, basheka. Kyonkai abandi bagamba bati, «Twakugondize k'oshuba kutugambira aha kigambo eki!» 33Kityo Paulo abarugamu agenda. 34Kyonkai abandi bamukunda baikiliza. Omuli abo ni Dionisio owa Areopago n'omukazi eibaralye Damarisi n'abandi.

will be added

X\