EBIKORWA EBIKORWA BY'ENTUMWA 16

1Paulo agendera kimoi Deribe na Lisitira. Hakaba haliyo omwegesibwa omoi nayetwa Timotheo, mutabani w'Omuyahudikazi ayaikiliize. Kyonkai ishe akaba ali Mugiriki. 2Abegesibwa ba Lisitira na Ikonio bakaba nibamugambage. 3Paulo agonza Timotheo kumushagara. Amukwata amutahiri aha rw'enshonga y'Abayahudi ababaire bali omu bigo biliinya, kuba bakaba nibamanya okwo ishe yabaire ali Mugiriki. 4Kababaire nibaraba omu bigo ebyo, bagambira abaikiliza ebyagambirwe entumwa n'abagurusi ba Yerusalemu; babakomeleza kubyekomya. 5Kityo enteko bazigumisa omu kwikiliza, n'abaikiliiza bata nibeyongera buli kiro kukanya. 6Paulo na Timotheo baraba omu mukoa gwa Firijia na Galasia; Mwoyo Mutakatifu akaba abatangire kugamba ekigambo omuli Asia. 7Orwo bagobaire omu rubibi rwa Misia balenga kutaaha Bitinia, kyonkai Mwoyo wa Yesu tiyabajubwire. 8Kityo Misia bagihingura bagya Toroasi. 9Orwo babaire bali Toroasi omu kiro Paulo abonekerwa: abona omuntu wa Masedonia namutagiliza ati, «Oshaabuke oije Masedonia otujune.» 10Kayamazire kubonekerwa atyo, tumanya okwo Ruhanga yatweta Masedonia kurangayo evangeli, aho turamura kugenda aho n'aho. 11Twema Toroasi tusabara tugoba Samotirasi, bukeire bunu tugoba Neapoli 12mbali twayemire kugya Filipi ekigo ekilikukira ebindi omu wilaya ya Masedonia eyabaire netwarwa Abaroma. Omu kigo ekyo tukamaramu ebiro. 13Ekiro kimoi eli Sabato turuga omu kigo tugya bwatana aha mwiga, kuba tukatekeleza okwo hakubayo obushomero bw'enshara. Tushuntama tufumolera abakazi ababaire bagiireyo. 14Omoi ayatuhuliire akaba ali mukazi nayetwa Lidia, w'ekigo kya Tiatira. Akaba aguza emyendo ya zambarau kandi yafukamiraga Ruhanga. Omukama amukingura omutima ahuliliza ebyo Paulo yabaire nagamba. 15Orwo yabatiziibwe n'omutungogwe, yatutagiliza ati, «Mbwenu orwo mwabona okwo ndikwikilizakwo Omukama, mwije omwange mube nimwo mwikara.» Aikara atutagiliize atyo. 16Katwabaire nitugya mbali bashomeraga enshara, tutanganwa omwisiki omuzana. Akaba abanzirwe omuzimu naragura, naletera bakamabe amagoba gangi. 17Ahondera Paulo naichwe nagamba n'eiraka lihango ati, «Abashaija aba nibabagambira eby'okubarokora; bakozi ba Ruhanga Rukirabyona.» 18Ekyo akakikora ebiro bingi. Kyonkai Paulo alemwa atamwa. Ahinduka agambira Sitani ati, «Omw'Ibara lya Yesu Kirisito ninkuragira oruge omu mwisiki ogu.» Niho honkai amurugamu. 19Bakama b'omuzana ogwo kabaaboine okwo amagoba gabo gabafera, bakwata Paulo na Sila babatwalira abatwazi omu katare nibabakurura. 20Kabamazire kubagobaya abaramuzi bagamba bati, «Abantu aba Bayahudi mara nibaita kubi ekigo kyaitu. 21Nibegesa emichwo elikuzira ahali ichwe Abaroma kugikunda anga kugikwata.» 22Aho embaga nayo ebayokera. Abaramuzi nabo babatagulira emyendo babajura, bashuba baragira kubatera enkoni. 23Orwo bamazire kubatera enkoni zingi babanaga jela, baragira omulinzi wa jela kubalinda kurungi. 24Kayamazire kuragirwa atyo abateka jela ey'omunda mara abakoma empingo omu maguru. 25Nk'omu kiro eitumbi Paulo na Sila nibashoma enshara, nibahoyera Ruhanga empoya, abafungwa abandi babahuliliize, 26omusisi gw'amani gwija kibandagara. Emisingi ya jela etengeeta, niho honkai enyigi zona zikinguka, kandi buli omoi akomorogoka empingo. 27Omulinzi wa jela kayasisiimukire akabona okwo enyigi zikingukire, aihya embanda omu kiraro aija kweita, amanyire abafungwa bairuka. 28Ndi Paulo agamba n'eiraka lihango ati, «Otayehutaza kuba chwena tuli aha.» 29Omulinzi ogwo agambira ab'okumwakiza, ataaha jela bwangu bwangu n'obutini najugumba, agwa Paulo na Sila omu maguru. 30Abaturukya aheru ababaza ati, «Waitu baami, nindagirwa nkoleki kurokoka?» 31Bamushubamu bati, «Oikilize Omukama Yesu, iwe n'omutungo gwawe, murarokoka.» 32Bamugambira ekigambo ky'Omukama n'ab'omwa wenene bona. 33Omw'itumbi omwo mwonene abatwara abogya amahuta, niho honkai abatizibwa n'ekaye yona. 34Paulo na Sila abatwara omwa wenene abaha ekyakulya, ashemelerwa n'omutungogwe gwona kubona okwo yaikiliza Ruhanga. 35Obwire kabwakeire, abaramuzi batweka abaisherukare nibagamba bati, «Mutaishure abashaija abo bagende.» 36Omulinzi wa jela amanyisa Paulo amakuru ago ati, «Abaramuzi batuma ab'okugamba kamugenda. Mbwenu muturuke mugende n'emilembe.» 37Kyonkai Paulo agambira abaisherukare abo ati, «Batuteire tuli Baroma omu maisho g'embaga tutaramwirwe, mara batufunga jela. Mbwenu kandi nibatwihyamu bwesheleke? Chei! Baije bonene batweihiremu.» 38Abaisherukare bamanyisa abaramuzi ebigambo ebyo. Kabahuliire okwo bali Baroma batina. 39Kityo baija babatonganaho. Babashohoza mara babagambira kuruga omu kigo ekyo. 40Nikwo Paulo na Sila kuruga jela bakagya owa Lidia. Kabamazire kubona abegesibwa basiga babamaramara bagenda.

will be added

X\