EBIKORWA EBIKORWA BY'ENTUMWA 15

1Haliho abantu abarugire Buyahudi bakaija Antiokia bakegesa abegesibwa bati, «Kamutatahiriirwe kuhondera omuchwo gwa Musa, timwakurokoka.» 2Paulo na Barinaba lihankana muno, bahakana. Ahanyuma Paulo, Barinaba n'abandi barondwa kugya Yerusalemu kubona entumwa n'abagurusi aha kigambo ekyo. 3Enteko ebatuma bagenda, baraba Fenisia na Samaria, nibabarulira abegesibwa okuhinduka kw'Abanyamahanga; abegesibwa bona bashemelerwa muno amakuru ago. 4Orwo baagobaire Yerusalemu banyegezibwa enteko, n'entumwa n'abagurusi, nabo bababarulira byona ebyo Ruhanga yabashoboize kukora. 5Kyonkai abegesibwa abandi ab'orubaju orw'Abafarisayo baimuka bagamba bati, «baragiirwe kutahirirwa n'okukwata Amateka ga Musa.» 6Entumwa n'abagurusi baterana kuleba ekigambo ekyo. 7Kababaire bahakaine muno, Petero aimuka abagambira ati, «Barumuna bange, nimumanya okwo obubere Ruhanga akandonda omuli inywe, kurangira abanyamahanga evangeli kabahulira bakaikiliza. 8Ruhanga wenene ogwo amanya ebitekelezo bya buli omoi, akasiima Abanyamahanga yabatunga Mwoyo Mutakatifu nk'okwo yamutungire ichwe. 9Tiyayolekize nshororo ahali ichwe na bonene; shana akabagarulira amafu gabo aha rw'okuba bakaikiliza. 10Mbwenu aha rw'ekyo kubaki nimwenda kulenga Ruhanga, kukomaho barumuna baitu enkomo eyalemire batat'enkurw'ichwe naichwe chwenene? 11Ekikuru nitwesiga Omukama Yesu alitugilira ekisha aturokore, na bonene kutyo.» 12Orukiiko rwona rwesiza. Bahuliliza Barinaba na Paulo orwo balikubatengera obubonero n'ebitangazo ebyo Ruhanga yabashoboize kukora omu Banyamahanga. 13Kabamazire kugamba Yakobo ahorora ati, «Barumuna, mumpulilize. 14Simoni yashoborora okwo Ruhanga kwija kusingira Abanyamahanga abaihiremu abantu ab'okuba ba wenene. 15Ekyo nikyo kyonene eky'abarangi bagambire bati, 16‹Ebyo kabiliba byahoire ndigaruka, ngarureho engoma ya Daudi eyakambukire. Ndyombeka buhya amatongo gayo, ngiimukye, 17nirwo abantu abandi balinyijaho, nibo Banyamahanga bona abo nyesire kuba bantu bange nyabwange. 18Nikwo Omukama alikuhanga ayamanyisize ebigambo ebi kwema karai.› 19Aha rw'ekyo inye nimbona Abanyamahanga abalikwikiliza tutabaita kubi. 20Shana ekiliho tubahandikiire kubatanga kulya ebyakulya bihagaire ebitambiirwe ebihuuku; belinde obusiyani; batalya kitunganwa ekimyoirwe bikya, n'obwamba bwona bwona. 21Kuba kwema karai Amateka ga Musa gashomwa buli Sabato omu sinagogi, kandi ebyo yagambiire birangwa buli kigo.» 22Aho entumwa n'abagurusi n'enteko yona, babona berondemu abantu ab'okugya Antiokia, kugenda na Paulo na Barinaba. Batweka Yuda alikwetwa Barisaba, na Sila ababaire bali bakunirwa omuli bonene. 23Bakabaha ebarua egi: «Barumuna baitu Abanyamahanga ba Antiokia na Siria na Silisia, ichwe entumwa n'abagurusi nitubakeisa. 24Tuhuliire okwo haliho abantu abarugire kunu bakabagambira eby'okubaita kubi bakabachundaigura emitwe, mara titubibaragiire. 25Katwamara kwikilijanyia ichwenene chwenkai, twabona tugire abo twaronda tubabatwekere na Barinaba na Paulo abagonzibwa baitu. 26Bonene abo bantu abayehoiremu aha rw'Omukama Yesu Kirisito. 27Aha rw'ekyo twabatwekera Yuda na Sila, na bonene barabagambira ebigambo byonene byonene. 28Kuba Mwoyo Mutakatifu naichwe, tuboine tutabongeraho byakubashasa shana ebi byonkai ebilikwetagwa: 29Mwelinde ebyo batambiire ebihuuku, mutalya bwamba n'ebitunganwa ebimyoirwe ebikya, mushube mwelinde obusiyani. Kamurayelinda ebyo muraba mukozirege. Mwikarege.» 30Abatumirwe baimukya bagya Antiokia. Kabamazire kweta enteko bagiha ebarua egyo. 31Kabamazire kugishoma bashemelerwa kubona okwo babamaramara. 32Yuda na Sila okwo babaire bali barangi, bagambira abegesibwa ebigambo bingi by'okubamaramara, babagumisa. 33Kabamazireyo ebiro bike, abegesibwa bashuba babatwekera ababaire babatumire. 34[Nawe Sila aramura kwikarayo.] 35Paulo na Barinaba bakasigara Antiokia, bema n'abandi baranga ekigambo ky'Omukama. 36K'ebiro byabaire byakeireho bike, Paulo agambira Barinaba ati, «Tugaruke omu bigo mbali twarangire ekigambo ky'Omukama turambure barumuna baitu, tubone okwo bali.» 37Barinaba agonza kabagenda na Mariko ayayetwaga Yohana. 38Paulo abona nikigasha muno kutagenda na muntu ayabasigire Pamfilia, akabura kugenda nabo omw'ikora. 39Aho bahakana muno, nangu bataishukana. Barinaba akwata Mariko basabara bagya Sipuro. 40Abegesibwa kabamazire kushabira Paulo, bakamugondeza omugisha gw'Omukama, yaronda Sila yaimukya yagenda. 41Araba Siria na Silisia nagumisa enteko.

will be added

X\