EBIKORWA EBIKORWA BY'ENTUMWA 14

1Omuli Ikonio Paulo na Barinaba bagya bataha omu sinagogi y'Abayahudi. Begesa, abantu bangi Abayahudi n'Abagiriki baikiliza. 2Kyonkai Abayahudi abatalikwikiliza bekwata Abanyamahanga babohya, babachokeza abaikiliza. 3Kyonkai entumwa ziikarayo ebiro bingi, zigamba n'obumanzi aha Mukama, nawe ajulira okwo ebyo zilikugamba aha mugishagwe bili by'amazima; yabatunga obushobora bw'okukora obubonero n'ebitangazo. 4Abanyakigo babeganuka. Abamoi bagwera rubaju orw'Abayahudi, abandi bagwera rubaju orw'entumwa. 5Orwo Abanyamahanga n'Abayahudi bagondize kubaita kubi kyere n'okubateza amabare, 6kabakimanyire bairukira Likaonia omu bigo bya Lisitira na Deribe n'omu nsi eyataineho; 7barangayo evangeli. 8Lisitira hakaba haliyo omushaija, alemaire kwema okuzarwakwe atakatambukaga, yaikaraga ashuntamire. 9Ahuliliza Paulo orwo yabaire nagamba. Paulo nawe amuleba amuhangya. Kayaboine okwo aina okwesiga okw'okumukiza 10amugambira n'eiraka lihango ati, «Yemelera bwemi.» Omushaija abaratuka ahansi atambuka. 11Embaga kayaboine ekyo Paulo yakora, egamba n'amaraka gahango omu rulimi rwa Likaonia eti, «Baruhanga batuhabukira nibashusha abantu!» 12Barinaba bamweta Zeo, Paulo aha rw'okuba n'iwe yabaire ali mugambi mukuru bamweta Herumesi. 13Rwensinga ya Zeo ekaba eli omu maisho g'ekigo; aho omukuhan'iwe aleta ente n'enkinga z'amaua aha bihigi agondize kwema n'abantu kutambira entumwa ebitambo. 14Entumwa Barinaba na Paulo kazagahuliize, zitagura ebijwaro, ziruga omu mbaga ziirukire nizigambira eiguru ziti, 15«Inywe bantu, kiki kugira mutyo? Naichwe tuli bantu b'obuhangwa bumoi nainywe. Tubaleteire amakuru garungi kamulekera ebintu ebi ebya katozi mukaikiliza Ruhanga asingire ayatonzire eiguru n'ensi n'enyanja n'ebikabilimu byona. 16Makiro agahingwire amahanga gona akagaleka kukora okwo gabaire nigenda. 17Nawe tiyalekeire kukora bya kumumanyisa. Kuba akabakora kurungi yabagwisiza enjura, mwalima mwayeza omu birumo byanyu, mwalya mwaiguta, mwashemelerwa.» 18N'orwo bagambire batyo tibashoboire n'akati kutanga bantu kubatambira bitambo. 19Abayahudi bagya baruga Antiokia na Ikonio; bohya abantu bateza Paulo amabare, mara bamwihya omu kigo nibamukurura bamanyiire yafa. 20Kyonkai abegesibwa kabamugobire, aimuka ataaha omu kigo. Bukeire akwata omuhanda na Barinaba bagya Deribe. 21Paulo na Barinaba bakaranga evangeli omu kigo kya Deribe, bakwasa n'abegesibwa bangi. Ahanyuma bagaruka Lisitira na Ikonio na Antiokia. 22Bagenda nibagumisa abegesibwa, nibabachumbiza kuguma omu kwesiga nibabagambira bati, «Kwija kutaaha omu bukama bwa Ruhanga nituragirwa kuraba omu biyengo bingi.» 23Bashoma enshara basiiba, basiga babateraho abagurusi buli nteko, babateka omu mikono y'Omukama owo baikiliize. 24Aho baraba Pisidia, bagoba Pamfilia. 25Kabamazire kuranga evangeli omuli Periga, bakwata omuhanda bagya Atalia. 26Niyo bayemire kusabara bagiire Antiokia, mbali babaire barugire, bashabiirwe omugisha gwa Ruhanga kugya kukora omulimo ogwo, ogwo bakozire. 27Kabamazire kugoba Antiokia bahuruza enteko yona bababarulira byona ebyo Ruhanga yabashoboize kukora, n'okwo Abanyamahanga yabatungire okwikiliza. 28Bakaikara Antiokia ebiro bitali bike baina abegesibwa.

will be added

X\