EBIKORWA EBIKORWA BY'ENTUMWA 13

1Omu nteko ya Antiokia hakaba halimu abarangi n'abegesa: abalimu Barinaba, Simeoni owo bayetaaga Nigeri, Lukio owa Kirene, Manaeni ayabaire akuzire hamoi na Herode omugavana, na Sauli. 2Kababaire nibashoma enshara aha Mukama nibasiba, Mwoyo Mutakatifu abagambira ati, «Munyahulire Barinaba na Sauli bakore omulimo ogwo mbeteire.» 3Kabamazire kusiiba n'okushoma enshara, babataho emikono babatuma. 4Kityo batumirwe Mwoyo Mutakatifu Barinaba na Sauli bagya Selusia; bemayo basabara bagya Sipuro. 5Kabaagobaire Salami, baranga ekigambo kya Ruhanga omu sinagogi z'Abayahudi. Yohana akaba nabahwera. 6Orwo barabire omu kizinga kyona bakagoba Pafosi, bagwamu omukonikoni omoi omurangi w'ebishuba Omuyahudi eibaralye Bariyesu. 7Akaba naikara n'omuragirwa Serigio Paulo, omuntu omugezi. Serigio Paulo ayeta Barinaba na Sauli agondize kuhulira ekigambo kya Ruhanga. 8Kyonkai Elimasi omukonikoni (kuba egyo niyo nshonga y'eibaralye) abahakanisa, agondize kutanga omuragirwa kwikiliza. 9Nawe Sauli, alikwetwa Paulo, aijwirwe Mwoyo Mutakatifu amukomeeka eliisho 10amugambira ati, «Iwe mwana wa Sitani iwe, iwe mubisha wa buli karungi, oijwire obugobya n'orwango, olekere kuhindura amazima g'Omukama kabiba bishuba. 11Mbwenu obone, Omukama yakuha ekibonabonyio: Orahuma, omare ebiro otalikubona mushana.» 12Aho omuragirwa kayaboine okwo byaba bityo aikiliza, kuba ebyo bamwegesize aha Mukama bikamushobeza. 13Ahanyuma Paulo na batahibe baruga Pafosi basabara bagoba Periga omuli Pamfilia. Yohana yabasigayo yagaruka Yerusalemu. 14Bonene baruga Periga bagya Antiokia eya Pisidia. Aha kiro kya Sabato bataha omu sinagogi bashuntama. 15Kabamazire kushoma omu Mateka n'omu Barangi, abatwazi b'esinagogi babatumaho bati, «Barumuna, kamuraba mwina ekigambo kyona kyona eky'okuchumbiza abantu, mukigambe. 16Nikwo Paulo kwemelera, aimukya omukono agamba ati, «Inywe Baisiraeli abatina Ruhanga muhulire. 17Ruhanga w'eihanga eli lya Isiraeli akaronda batat'enkurw'ichwe, yamara yabahindura ihanga lihango orwo baturaga Misiri, yashuba yabaihisamu obushobora bungi. 18Emyaka 40 yabegumisiliza omw'irungu. 19Kayabaire yasilikize amahanga mushanju omuli Kanaani, ensi egyo yagibaha obusika bagilya emyaka nka 450. 20Ahanyuma yabaha abaramuzi kugoba ahali Samweli omurangi. 21Aho bamushaba omukama, yabateraho Sauli eya Kishi ow'oruganda rwa Benjamini yabatwara emyaka 40. 22Kayabaire yamwihireho, omukama wabo yabateraho Daudi owo yayebugire ati, ‹Mboine Daudi mutabani wa Yese omuntu owo ngonza, n'iwe alikora byona ebyo ndikwenda.› 23Omuli baijukuru ba Daudi nimwo Ruhanga aihire Isiraeli omurokozi, Yesu, nk'okwo yaragaine. 24Ogwo kayabaire atakaizire Yohana yarangiraga Abaisiraeli bona okwechuza entambara bakabatizibwa. 25Yohana ogwo kayabaire yaija kumara eikoralye abaza ati, ‹Nimulenga muti ndi ohai? Tindiwe. Chei, haliyo alikunduga enyuma, owo ntasaine kujura biratwa.› 26«Barumuna bange, baijukuru ba Aburahamu n'Abanyamahanga abali aha abalikutina Ruhanga, ekigambo eki ky'okuturokora Omukama akitwekeire ichwe. 27Aba Yerusalemu n'abatwazi babo, aha rw'okutamumanya anga kushobokerwa ebyabagambirwe abarangi ebishomwa buli Sabato, ebyo bakabigobesheleza orwo bamuramwire kufa. 28N'orwo babuzirwe omushango gw'okumutaho kumwisa, bakagambira Pilato kumuramura kufa. 29Kababaire bagobaesheleize byona ebyabaire bimuhandikirweho, bamuhanantura aha muti, bamuziika omu nyanga. 30Kyonkai Ruhanga akamuhimbura omu bafu; 31yamara ebiro bingi nahabukira abo yarugire nabo Galilaya kwija Yerusalemu, mbwenu nibo bajulizi omu bantu. 32Mbwenu tubaleteire amakuru garungi okwo ekyo Ruhanga yashuubiize batat'enkurw'ichwe 33akigobesheleize ahali ichwe baijukuru babo orwo yahimbwire Yesu. Nk'okwo kyakahandikirwe omu Zaburi ya kabili kiti, ‹Oli mwana wange, kir'eki nakuzara.› 34Nk'okwo yamuhimbwire omu bafu atalishuba kujunda, akaba akigambire karai ati, ‹Ndibaha emigisha emitakatifu, nyatahinduka eyo nashuubiize Daudi.› 35Nikwo alikushuba kugamba omu Zaburi endijo ati, ‹Omutakatifu wawe tolimuleka kujunda.› 36«Aha rw'okuba Daudi kayamazire kugobesheleza ebyo Ruhanga yamuragiire omu burorabwe, yafa, bamuziika omu nziiko za baishenkuru mara yajunda. 37Kyonkai owo Ruhanga yahimbwire tiyajunzire. 38Aha rw'ekyo barumuna mumanye okwo omugaruliro gw'amafu ogwo tulikubagambira niguletwa aha muntu ogu. 39Mara n'iwe achungura buli muntu amwesiga, akamuchungura omuli buli kantu ako Amateka ga Musa gatakubachungwiremu. 40Kityo mulimanya mutaligwerwa ekyo abarangi bagambire bati, 41‹Leba inywe abaruulira banu, mutangare mara muhweho; kuba ekyo ndikubakolera mbwenu, omuntu talikibagambira mukakiikiliza.› » 42Ka Paulo na Barinaba babaire nibaruga omu sinagogi, abantu babatagiliza kubashubiramu ebigambo ebyo eli Sabato eyabaire nehonderaho. 43Orwo abantu barugire omu sinagogi bakataha, Abayahudi bangi n'Abanyamahanga ababaire baina ekihika omu dini y'Abayahudi bahondera Paulo na Barinaba, aba babafumolera mara babachumbiza kuguma aha mugisha gwa Ruhanga. 44Sabato eyahondeireho, nk'ekigo kyona kihurura kuhulira ekigambo kya Ruhanga. 45Nawe Abayahudi kababoine okwo abantu baba embaga bakwatwa eihagiko, bahakanisa ebyo Paulo yagambire mara bamuleerura. 46Paulo na Barinaba bagambira kimoi n'obumanzi bati, «Kibaire nikyetagwa ekigambo kya Ruhanga kubanza kukigambira inywe. Mbwenu orwo mwakyanga, mukagamba okwo oburora obutalihwaho mutabusaine, leba twagya omu Banyamahanga. 47Enshonga Omukama n'iwe atuhangiire ati, ‹Nkutaireho k'oba mushana gw'Abanyamahanga, oshobore otyo kurokora ensi zona.› » 48Abanyamahanga kabahuliire batyo bashemelerwa, basingiza n'ekigambo kya Ruhanga; n'ababaire baronkeirwe oburora obutalihwaho baikiliza. 49Ekigambo ky'Omukama kigoba omu mukoa ogwo gwona. 50Kyonkai Abayahudi bohya abakazi n'abashaija abalikumanyika mara abashongore ab'amani omu kigo, babachokeza Paulo na Barinaba babagingiza, bababinga omu wilaya yabo. 51Bonene aba basiga babakunkumulira echuuchu aha maguru nibabakeena, bakwata omuhanda bagya Ikonio. 52Kyonkai abegesibwa baijurwa ebyera, na Mwoyo Mutakatifu abasingiramu wena.

will be added

X\