EBIKORWA EBIKORWA BY'ENTUMWA 1

1Waitu Teofilo, omu kitabo kya mbere nkahandikamu byona ebyo Yesu yabandiizeho kukora n'okwegesa, 2kulemwa kugoba kiro ekyo yatwetwe omw'iguru, orwo yamazire kushoborora entumwaze omu mani ga Mwoyo Mutakatifu ebyo barakora. Entumwa ezo akashangwa yazironzire. 3Kayabaire yahimbukire yabahabukira nataho n'obubonero okwo n'iwe wenene ahimbukirekwo. Akabahabukira ebiro 40, nabafumolera aha Bukama bwa Ruhanga. 4Orwo yabaire akyaikara nabo akabaragira kutaruga Yerusalemu, balinde ekyo Ruhanga Ishe yaragaine, ekyo bamuhuliire nagamba. 5Yabagambira okwo Yohana yababatiize nakoza amaizi, kyonkai ati ebiro bitakakeire bingi murabatizibwa omu mani ga Mwoyo Mutakatifu. 6Orwo entumwa zabaire zili hamoi na Yesu, zimubaza ziti, «Mukama, mbwenu aha noija kugarura obukama bwa Isiraeli?» 7Azigambira ati, «Okumanya obukiro anga ebirumo byo Tata ataireho omu bushoborabwe ekyo inywe tikibakwete. 8Ekiliho, orwo Mwoyo Mutakatifu arabahabukira murahaabwa obushobora. Kandi muranjulira omuli Yerusalemu n'omuli Buyahudi yona, na Samaria, nangu n'omu nsi zona.» 9Orwo Yesu yamazire kugamba ebyo, okwo baliho balebire ashutuka agya eiguru, ekichwi kimubunda, baba batakimubona. 10Orwo babaire bali omu kitangaro balebire eiguru nagenda, bechura abashaija babili bemeleire aha rubaju, bajwete ekanzu zilikwera. 11Abashaija abo bagambira entumwa ezo bati, «Inywe bashaija ba Galilaya, kubaki mwemeleire muraramire eiguru? Yesu ogu ayabarugaho akatemba omw'iguru, emigendereye eyo mwamubona nagya omw'iguru, niyo eliba miizireye.» 12Entumwa ziruga aha Ibanga ly'Emizeituni zigaruka Yerusalemu, kagendo nk'akajuburwaga kugendwa ahali Sabato. 13Kabamazire kutaaha omu nju batemba omu kiyumba ky'omu gorofa. Bonene abo ni Petero na Yohana na Yakobo na Anderea, Filipo na Tomasi, Balitolomayo na Matayo, Yakobo eya Alufayo na Simoni Omuferaihanga, na Yuda mutabani wa Yakobo. 14Bona aba bayemaga hamoi bashoma enshara n'omutima gumoi, hamoi n'abakazi abandi na Maria nyina Yesu, na barumuna Yesu. 15Omu biro ebyo Petero ayemelera omu barumuna (omutwe gw'abantu bona hamoi nka 120), agamba ati, 16«Barumuna bange, Ebihandiko Bitakatifu, nibyo bigambo ebyo Mwoyo Mutakatifu yagambire omu kanwa ka Daudi orwa karai ahali Yuda ayalesire abantu abakwete Yesu, bikaba biragiirwe kugobeelera. 17Yuda ogwo akaba ali omoiho omuli ichwe, mara akaba aina omuruka ogwe omw'ikora eli. 18«(Empiya ezo yaboine aha rw'omutima gubi gwa wenene akaziguza ekisi; yakuntuka ahansi ajumaire, yabaruka orubunda, amara gona gazagira. 19Ekyo kikamanyika omu banyansi bona ba Yerusalemu, n'ekisi omu rulimi rwabo bakyeta ‹Akelidama,› nikwo kugir'oti, ‹Ekisi ky'Obwamba.›) 20Aha rw'okuba kikahandikwa omu Kitabo ky'Ezaburi kiti, ‹Omwa wenene hahinduke ndaara, enjuye etaliturwamu muntu; kandi omwanyagwe gukwatwe muntu ondijo.› 21Kityo omuli balinya abagendaga naichwe omwanya gwona twina Yesu, 22kubandiza ahali Yohana nabatiza, kugoba kiro ekyo Yesu aturugireho akatemba omw'iguru, omu bantu aba naragirwa kurugwamu ow'okutaha omuli ichwe, abe mujulizi okwo Yesu ahimbukirekwo.» 23Barondamu abantu babili, Yozefu ayayetwaga Barisaba, eibaralye lya kabili ni Yusito, kandi na Matia. 24Bashaba bati, «Mukama amanya emitima y'abantu bona, singa otwoleke owo waronda omu babili aba 25kuba mukozi mara ntumwa, emyoga eyo Yuda yanagireho akegyera omu ga wenene.» 26Babarasira enshoga, zera zikwata, egwera Matia. Matia ogwo abaliranwa n'entumwa ikumi n'emoi.

will be added

X\