III YOHANA 1

1Inye omugurusi n'inye ndikukuhandikira iwe Gayo omugonzibwa, owo ngonza kakimoi. 2Omugonzibwa, ninkushabira egoshoko n'amani. Nimanya okwo aha mwoyo ogumire. 3Nkashemelerwa muno orwo barumuna baitu abamoi baizire nibakugambahoge aha mirolere yawe, okw'olikurora geigeigei eby'amazima. 4Tinaikubona byera bihango kushaaga ahali ebi, kuhulira okwo abaana bange balikukora eby'amazima. 5Omugonzibwa, nokora kurungi omulimo gw'obwesigwa ahali byona byona eby'olikukolera barumuna baitu, obwa muno abagenyi 6abakugambiire omu nteko okw'oina engonzi. Oraba okozire kurungi kubakomera entanda, manyasi ekyo kigiro ekilikushemelera Ruhanga. 7Etabaro eyo balimu bagilimu aha rwa Kirisito mara tibakatoraga bujuni bwona bwona kuruga omu batakansi. 8Kityo tuli b'okujuna abantu aba, tushobore kuhwerana nabo aha aha rw'okujulira amazima. 9Haliho ekyo nahandikiire enteko; kyonkai Dioterefe agonza okweshutuura, takunda kubonakwo nyina bushobora. 10Kityo kandaija, ebyo alikukora ndabigamba. Nangambaho ebigambo ebijunzire. Talikugarukir'aho honkai. Nayanga kyere n'okunyegeza barumuna baitu, n'abandi abalikwenda kubanyegeza nabatanga mara ashuba abashenda omu nteko. 11Mugonzibwa, otalirondora muntu mubi, orondore omurungi. Omuntu akora kurungi aba wa Ruhanga; kandi akora kubi ogwo takabonaga Ruhanga. 12Demetirio ogwo najulirwa buli omoi, n'amazima gonene nigamujulira, kandi nanye nyenene nimujulirakwo, mara nainywe nimumanya okwo ngamba amazima. 13Naba nkyaina bingi eby'okukuhandikira, kyonkai tinakugondize kuhandikisa kalamu na bwino. 14Ninshuubira kukubona juba, twije tubonangane tufumore. 15Ogire emilembe. Banywanyi baitu nibakukeisa. Naiwe onshulire banywanyi baitu bona.

will be added

X\